អ្នកជំនាញ៖ ការបោសសម្អាតយោធារបស់ CCP នឹងកើនឡើង

បុគ្គលិករបស់ទស្សនាវដ្តី FORUM

ខណៈដែលឆ្នាំ 2023 ឈានចូលដល់ទីបញ្ចប់នោះ ការបោសសម្អាតមន្ត្រីការពារជាតិនៅក្នុងសាធារណៈរដ្ឋប្រជាមានិតចិន (PRC) កាន់តែកើនខ្លាំងឡើង ជាពិសេសក្នុងចំណោមអ្នកដែលមានទំនាក់ទំនងជាមួយអង្គភាពក្រុមដែលសម្រាំងឱ្យកាន់ផ្នែកមីស៊ីល។ ទីភ្នាក់ងារព័ត៌មាន Xinhua ដែលគ្រប់គ្រងដោយរដ្ឋបានរាយការណ៍អំពីការបណ្តេញឧត្តមសេនីយ៍ចំនួនប្រាំបួនរូប ចេញពីសភាប្រជាជនជាតិ ដែលត្រូវបានគេចាត់ទុកថាជា «សភាអាយ៉ង» សម្រាប់បក្សកុម្មុយនិស្តចិន (CCP)។

ទីភ្នាក់ងារព័ត៌មាន Reuters បានរាយការណ៍កាលពីចុងខែធ្នូថា ឧត្តមសេនីយទាំងប្រាំរូបនោះគឺជាអតីត ឬបច្ចុប្បន្នជាមេបញ្ជាការនៅក្នុងកងកម្លាំងរ៉ុក្កែតរបស់កងទ័ពរំដោះប្រជាជន (PLA) ដែលគ្រប់គ្រងលើមីស៊ីលយុទ្ធសាស្ត្រ និងនុយក្លេអ៊ែរ។ ពីរថ្ងៃមុននេះ ទីភ្នាក់ងារព័ត៌មាន Xinhua បានរាយការណ៍ថា នាយកប្រតិបត្តិបីនាក់នៅក្រុមហ៊ុនគ្រប់គ្រងដោយរដ្ឋដែលផលិតប្រព័ន្ធមីស៊ីលត្រូវបានដកចេញពីស្ថាប័នប្រឹក្សានយោបាយកំពូលរបស់ CCP ។

អគ្គលេខាធិការ CCP លោក Xi Jinping បាននឹងកំពុងចំណាយយ៉ាងច្រើនក្នុងកិច្ចខិតខំប្រឹងប្រែងដើម្បីធ្វើទំនើបកម្មកងកម្លាំង PLA និងការដាក់ពង្រាយកងកម្លាំងនៅសមុទ្រចិនខាងត្បូង និងលើសពីតំបន់នេះផងដែរ។ អ្នកសង្កេតការណ៍លើកឡើងថា យុទ្ធនាការប្រឆាំងអំពើពុករលួយដែលត្រូវបានអះអាងដោយលោក Xi ដែលជាវិធីមួយសម្រាប់ឱ្យលោកធ្វើការដកចេញនូវអ្នកដែលលោកចាត់ទុកថាជាការគំរាមកំហែងដល់ការដឹកនាំរបស់លោក នេះបើតាមការរាយការណ៍របស់សំឡេងសហរដ្ឋអាមេរិក (VOA)។ សារព័ត៌មាន Reuters បានរាយការណ៍ថា ការបណ្តេញចេញបែបនេះគឺជា «ជំហានដែលជាទូទៅនឹងបន្តទៅរកការដាក់ទណ្ឌកម្មបន្ថែមទៀត» ដូចជាការកាត់ទោសព្រហ្មទណ្ឌជាដើម។

លោក Joel Wuthnow អ្នកជំនាញយោធាចិននៅសកលវិទ្យាល័យការពារជាតិអាមេរិកបានប្រាប់សារព័ត៌មាន Bloomberg News ថា៖ «ការដកចេញនេះបង្ហាញជាថ្មីម្តងទៀតថា លោក Xi មិនទទួលបានជោគជ័យក្នុងការលុបបំបាត់អំពើពុករលួយនៅក្នុង PLA នោះឡើយ»។

នាយកប្រតិបត្តិដែលត្រូវបានដកចេញពីសន្និសិទប្រឹក្សានយោបាយប្រជាជនចិនបានធ្វើការនៅក្រុមហ៊ុនម៉ៅការផ្នែកអវកាស និងការពារជាតិ។ សារព័ត៌មាន Bloomberg បានរាយការណ៍ថា អ្នកទាំងបីស្ថិតនៅក្នុងមុខតំណែងរបស់ពួកគេក្នុងអាណត្តិរបស់លោក Li Shangfu ដែលត្រូវបានដកចេញភ្លាមៗពីឋានៈជារដ្ឋមន្ត្រីការពារជាតិរបស់ PRC នៅក្នុងខែតុលា ឆ្នាំ 2023 ហើយពីមុនធ្លាប់ជាប្រធានផ្នែកបរិក្ខា​ររបស់ PLA។

សារព័ត៌មាន Bloomberg បានរាយការណ៍ថា អំពើពុករលួយនៅក្នុង PLA បានបណ្តាលឱ្យមីស៊ីលត្រូវបានចាក់ដោយទឹកជាជាងប្រេងឥន្ធនៈ និងស៊ីឡូមីស៊ីលគ្មានប្រសិទ្ធភាព នេះបើតាមការរាយការណ៍របស់ Bloomberg ដោយដកស្រង់ប្រភពស៊ើបការណ៍។ អ្នកជំនាញលើកឡើងថា ការបោសសម្អាតនេះអាចប៉ះពាល់ដល់សមត្ថភាពប្រយុទ្ធរបស់ PLA។ សារព័ត៌មាន Bloomberg បានកត់សម្គាល់ថា CCP បានបណ្តេញ «ឥស្សរជនយោធាជាន់ខ្ពស់ 15 រូបក្នុងរយៈពេលប្រាំមួយខែចុងក្រោយនេះ» រួមទាំង៖

• លោក Li ដែលបានបាត់ខ្លួនពីក្រសែភ្នែកសាធារណជនជាច្រើនខែមុនពេលលោកត្រូវបានបណ្តេញចេញពីតំណែង ហើយត្រូវបានរាយការណ៍ថាកំពុងស្ថិតនៅក្រោមការស៊ើបអង្កេតពីបទពុករលួយទាក់ទងនឹងការទិញ និងការអភិវឌ្ឍសម្ភារៈយោធា។ លោក Dong Jun ដែលជាអតីតមេបញ្ជាការកងទ័ពជើងទឹកចិន ត្រូវបានតែងតាំងជារដ្ឋមន្ត្រីក្រសួងការពារជាតិកាលពីចុងខែធ្នូ នេះបើយោងតាមទីភ្នាក់ងារព័ត៌មាន Xinhua។
• មេដឹកនាំពីររូបដែលត្រូវបានជ្រើសរើសដោយលោក Xi សម្រាប់កងកម្លាំងរ៉ុក្កែតត្រូវបានជំនួសដោយបុគ្គលដែលមិនមានឯកទេសផ្នែករ៉ុក្កែតនៅក្នុងខែសីហា។ លោក Lin Ying-yu អ្នកជំនាញផ្នែកយោធាចិននៅសកលវិទ្យាល័យ Tamkang នៅតៃវ៉ាន់បានប្រាប់ VOA ថា លោក Xi ឱ្យតម្លៃលើ «ភាពស្មោះត្រង់ទាំងស្រុង» របស់យោធាជាជាងសមត្ថភាពប្រយុទ្ធ។

លោក Alfred Wu សាស្ត្រាចារ្យរងនៅសាលាគោលនយោបាយសាធារណៈ Lee Kuan Yew ក្នុងប្រទេសសិង្ហបុរីបានប្រាប់សារព័ត៌មាន Reuters ថា៖ «មនុស្សកាន់តែច្រើននឹងត្រូវបានបណ្តេញចេញពីមុខតំណែង»។

ជាការពិតដែល លោក Lin បានលើកឡើងថាយុទ្ធនាការរបស់លោក Xi ដើម្បីពង្រឹងការក្ដោបក្ដាប់របស់លោកលើ PLA នឹងពិបាកក្នុងការបញ្ឈប់។ លោក​បាន​ប្រាប់ VOA ថា​៖ «លោក​ចង់​សម្រេច​បាន​នូវ​រជ្ជកាលដ៏គួរឱ្យភ័យខ្លាច ដូច​អ្វី​ដែល​ Stalin ​បាន​ធ្វើ​មុន​សង្គ្រាម​លោក​លើក​ទី​ពីរកើតឡើង»។

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។