អង្គភាព Garuda Contingent របស់ប្រទេសឥណ្ឌូណេស៊ី ជាកងកម្លាំងដ៏សំខាន់សម្រាប់ការរក្សាសន្តិភាពពិភពលោក

ខែមករា 24, 2024

8 1 minute read

កងរក្សាសន្តិភាពឥណ្ឌូនេស៊ីទទួលបានមេដាយចំពោះការបម្រើសេវាកម្មអង្គការសហប្រជាជាតិក្នុងពិធីមួយនៅភាគខាងត្បូងប្រទេសលីបង់កាលពីឆ្នាំ 2019។ ប្រភពរូបភាព៖ បេសកកម្មរក្សាសន្តិភាពរបស់អង្គការសហប្រជាជាតិ

Gusty Da Costa

ចាប់ពីប្រទេសលីបង់ ដល់សាធារណរដ្ឋប្រជាធិបតេយ្យកុងហ្គោ (DRC) និងតំបន់ជម្លោះចំនួនប្រាំមួយផ្សេងទៀត ដែលកងទ័ពឥណ្ឌូណេស៊ីជាង 2 700 នាក់ត្រូវបានដាក់ពង្រាយក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ ដែលធ្វើឱ្យប្រទេសអាស៊ីអាគ្នេយ៍មួយនេះក្លាយជាអ្នករួមចំណែកផ្ដល់បុគ្គលិកធំបំផុតទីប្រាំបី។ ចាប់តាំងពីឆ្នាំ 1957 កងរក្សាសន្តិភាពឥណ្ឌូណេស៊ីជាង 24 000 នាក់បានបម្រើបេសកកម្មរបស់អង្គការសហប្រជាជាតិ ហើយថ្មីៗនេះទីក្រុងហ្សាការតាបានចេញផ្សាយផែនការរយៈពេលពីរឆ្នាំដើម្បីជំរុញការដាក់ពង្រាយ។

លោក Lalu Muhamad Iqbal អ្នកនាំពាក្យក្រសួងការបរទេសរបស់ប្រទេសនេះបានប្រាប់ទស្សនាវដ្តី FORUM ថា៖ «នៅគ្រប់ទីកន្លែងដែលប្រទេសឥណ្ឌូណេស៊ីបានចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិ ឥណ្ឌូណេស៊ីតែងតែដើរតួយ៉ាងសំខាន»។ «ចរិតលក្ខណៈសេរី និងសកម្មនៃគោលនយោបាយការបរទេសរបស់ឥណ្ឌូណេស៊ី ផ្តល់ភាពកក់ក្ដៅដល់ភាគីជម្លោះ ដូច្នេះវត្តមានរបស់ឥណ្ឌូណេស៊ីក្លាយជាផ្នែកនៃដំណោះស្រាយ មិនមែនជាផ្នែកនៃបញ្ហានោះទេ»។

នៅក្នុងខែធ្នូ ឆ្នាំ 2023 ក្រសួងការបរទេសបានប្រកាសពីការសន្យារបស់ប្រទេសសម្រាប់បេសកកម្មរក្សាសន្តិភាពរបស់អង្គការសហប្រជាជាតិរហូតដល់ឆ្នាំ 2025 រួមទាំងបុគ្គលិកបន្ថែមចំនួន 865 នាក់មកពីកងកម្លាំងប្រដាប់អាវុធ និងប៉ូលិសជាតិ ក្នុងនោះមានស្ត្រី 155 នាក់ផងដែរ។

ដោយត្រូវបានគេស្គាល់ថាជាអង្គភាព Garuda Contingent, អង្គភាពរក្សាសន្តិភាពរបស់ប្រទេសឥណ្ឌូណេស៊ីបានដាក់ពង្រាយក្នុងបេសកកម្មចំនួន 30 ក្នុងរយៈពេលជិតប្រាំពីរទសវត្សរ៍ក្នុងកិច្ចបម្រើការនៅក្នុងជួរកងទ័ពរបស់ខ្លួន នេះបើយោងតាមលោក Dave Laksono សមាជិកនៃគណៈកម្មការសភាតំណាងសាស្ត្រទី 1 របស់ឥណ្ឌូណេស៊ី ដែលត្រួតពិនិត្យកិច្ចការការពារជាតិ និងកិច្ចការបរទេស។ បន្ថែមពីលើ DRC និងលីបង់ បុគ្គលិកឥណ្ឌូណេស៊ីកំពុងបម្រើការក្នុងជួរកងទ័ពនៅសាធារណរដ្ឋអាហ្វ្រិកកណ្តាល ម៉ាលី សូម៉ាលី ស៊ូដង់ខាងត្បូង ស៊ូដង់ និងសាហារ៉ាខាងលិចផងដែរ នេះបើតាមប្រសាសន៍លោក Laksono បានប្រាប់ទស្សនាវដ្តី FORUM។

ការដាក់ពង្រាយថ្មីបំផុតរបស់អង្គភាព Garuda បានចាប់ផ្តើមនៅក្នុងខែមីនា ឆ្នាំ 2023 ដោយមានបុគ្គលិកចំនួន 1 090 នាក់ត្រូវបានបញ្ជូនទៅប្រទេសលីបង់ ដោយចែកជាបួនក្រុមដែលជាផ្នែកមួយនៃការផ្លាស់វេននៅក្នុងបេសកកម្មរក្សាសន្តិភាពរបស់អង្គការសហប្រជាជាតិ។

ចាប់តាំងពីឆ្នាំ 2013 មក ប្រទេសឥណ្ឌូណេស៊ីបានដំណើរការមជ្ឈមណ្ឌលបេសកកម្មរក្សាសន្តិភាពនៅទីក្រុង Sentul ដែលមានចម្ងាយប្រហែល 50 គីឡូម៉ែត្រភាគខាងត្បូងនៃទីក្រុងហ្សាការតា ដែលលោក Iqbal បានលើកឡើងថា មជ្ឈមណ្ឌលនេះបម្រើជា «មជ្ឈមណ្ឌលឧត្តមភាពសម្រាប់ការបណ្តុះបណ្តាល និងការកសាងសមត្ថភាពបុគ្គលិកសម្រាប់បេសកកម្មសន្តិភាពរបស់អង្គការសហប្រជាជាតិ»។

មជ្ឈមណ្ឌលដែលត្រូវបានសាងសង់ឡើងដោយមានការគាំទ្រពីសហរដ្ឋអាមេរិក មានគ្រូបង្វឹកមកពីបណ្ដាប្រទេសមួយចំនួនដូចជាប្រទេសជប៉ុន និងបានបណ្តុះបណ្តាលបុគ្គលិកមកពីប្រទេសនានារួមទាំងកម្ពុជា និងម៉ុងហ្គោលី ក្រោមកម្មវិធីភាពជាដៃគូត្រីភាគីរបស់អង្គការសហប្រជាជាតិ ដើម្បីសាងសង់ និងជួសជុលហេដ្ឋារចនាសម្ព័ន្ធនៅក្នុងតំបន់បេសកកម្ម។

លោកវរសេនីយ៍ទោ Vanna Neng ពីប្រទេសកម្ពុជា បានចូលរួមក្នុងវគ្គបណ្តុះបណ្តាលប្រតិបត្តិករឧបករណ៍វិស្វកម្មធុនធ្ងន់របស់មជ្ឈមណ្ឌលនេះ នៅពាក់កណ្តាលឆ្នាំ 2023។ លោកបានលើកឡើងថា នាពេលអនាគតកងកម្លាំងរក្សាសន្តិភាពនឹងមានប្រមាណ 300 នាក់មកពីប្រទេសរបស់លោកនឹងត្រូវបានហ្វឹកហ្វឺនដែលជាលទ្ធផលនៃវគ្គនេះ។

លោក Neng បានថ្លែងនៅក្នុងសេចក្តីប្រកាសព័ត៌មានរបស់អង្គការសហប្រជាជាតិថា៖ «ប៉ុន្តែជាការពិតណាស់ មនុស្សដែលទទួលបានអត្ថប្រយោជន៍ច្រើនបំផុតពីការហ្វឹកហ្វឺននេះ គឺជាមនុស្សដែលរស់នៅក្នុងតំបន់បេសកកម្ម»។ «ជាពិសេសគឺនៅសាធារណរដ្ឋអាហ្រ្វិកកណ្តាល ដោយសារមានការខូចខាតជាច្រើននៅលើផ្លូវ ដែលធ្វើឱ្យពិបាកក្នុងការផ្លាស់ទី»។

លោក Laksono បានលើកឡើងថា ក៏ដូចជាឆ្លុះបញ្ចាំងពីការគាំទ្ររបស់ទីក្រុងហ្សាការតាចំពោះការរក្សាសន្តិភាពជាសកលដែរ ការដាក់ពង្រាយបេសកកម្មរបស់អង្គការសហប្រជាជាតិ គឺជា «មធ្យោបាយមួយដើម្បីកែលម្អវិជ្ជាជីវៈ» នៃប៉ូលិស និងយោធារបស់ប្រទេសជាតិ។

ជាធម្មតា ការដាក់ពង្រាយក្នុងរយៈពេលពីរខែនៃសំណើរបស់អង្គការសហប្រជាជាតិ អង្គភាព Garuda Contingent ក៏បំពេញភារកិច្ច ដែលរួមមាន ការថែទាំសុខភាព និងការសង្គ្រោះគ្រោះមហន្តរាយ និងដោះស្រាយបញ្ហាទាក់ទងនឹងសុវត្ថិភាពរបស់ស្ត្រីផងដែរ។

ការធ្វើការជាមួយអង្គការសហប្រជាជាតិ និងយោធាផ្សេងទៀតគឺជាការផ្តល់នូវអត្ថប្រយោជន៍ដល់កងកម្លាំងប្រដាប់អាវុធរបស់ប្រទេសឥណ្ឌូណេស៊ី នេះបើតាមលោក Teuku Rezasyah សាស្ត្រាចារ្យផ្នែកទំនាក់ទំនងអន្តរជាតិនៅសាកលវិទ្យាល័យ Padjadjaran របស់ប្រទេសឥណ្ឌូណេស៊ីបានថ្លែងប្រាប់ទស្សនាវដ្តី FORUM។ លោកបានលើកឡើងថា៖ «យើងមានការរៀនសូត្រពីគ្នាទៅវិញទៅមក»។ «យើងរៀនពីគេ ហើយគេរៀនពីយើង»។

Gusty Da Costa គឺជាការីនិពន្ធរបស់ទស្សនាវដ្តី FORUM ដែលមានមូលដ្ឋាននៅទីក្រុងហ្សាការតា ប្រទេសឥណ្ឌូណេស៊ី។

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។