ឥណ្ឌាត្រៀមមូលដ្ឋានយោធានៅលើកោះប្រទេសម៉ូរីស ដើម្បីទប់ទល់នឹងឥទ្ធិពលរបស់ PRC

Mandeep Singh

ប្រទេសឥណ្ឌាកំពុងរៀបចំបើកការដំឡើងមូលដ្ឋានយោធានៅលើកោះ North Agalega ប្រទេសម៉ូរីសដែលជាផ្នែកនៃគំនិតផ្តួចផ្តើមមួយដើម្បីបង្កើនការយល់ដឹងអំពីដែនសមុទ្រនៅក្នុងតំបន់មហាសមុទ្រឥណ្ឌា (IOR)។ ការរៀបចំចុងក្រោយគឺធ្វើឡើងបន្ទាប់ពីកិច្ចប្រជុំខែកញ្ញា ឆ្នាំ 2023 របស់ថ្នាក់ដឹកនាំរបស់ប្រទេសឥណ្ឌា និងប្រទេសម៉ូរីស និងពិធីចុះហត្ថលេខារបស់ប្រជាជាតិទាំងពីរលើអនុស្សរណៈនៃការយោគយល់គ្នា ដើម្បីរួមគ្នាអភិវឌ្ឍ និងបាញ់បង្ហោះផ្កាយរណបអង្កេតផែនដីសម្រាប់ប្រទេសម៉ូរីសនៅក្នុងខែវិច្ឆិកា ឆ្នាំ 2023។

អ្នកវិភាគបានពន្យល់ថា សកម្មភាពនេះឆ្លុះបញ្ចាំងពីយុទ្ធសាស្ត្ររបស់ទីក្រុងញូវដែលី ដើម្បីទប់ទល់នឹងការប៉ុនប៉ងរបស់សាធារណរដ្ឋប្រជាមានិតចិន (PRC) ដើម្បីបង្កើតការត្រួតត្រានៅក្នុងតំបន់ IOR។

វរសេនីយ៍ឯកកងទ័ពឥណ្ឌាចូលនិវត្តន៍ លោក Anil Bhat បានប្រាប់ទស្សនាវដ្តី FORUM ថា៖ «ការអភិវឌ្ឍអាកាសយានដ្ឋាន កំពង់ផែ និងមជ្ឈមណ្ឌលប្រព័ន្ធទំនាក់ទំនងនៅកោះ North Agalega របស់ប្រទេសម៉ូរីស និងនៅក្នុងផ្នែកភាគខាងត្បូងនៃមហាសមុទ្រឥណ្ឌាដែលសំខាន់នឹងបង្កើនការយល់ដឹងដែនសមុទ្ររបស់ប្រទេសឥណ្ឌា»។

វរសេនីយ៍ឯក Bhat បានពន្យល់ថាកោះផ្កាថ្ម Agalega គឺសមស្របសម្រាប់ផ្លូវរត់សម្រាប់យន្តហោះ។ បន្ថែមពីលើនេះ ផ្លូវរត់ត្រូវបានរាយការណ៍ថាកំពុងត្រូវបានសាងសង់ដើម្បីជួយសម្រួលដល់ប្រតិបត្តិការយន្តហោះឃ្លាំមើលដែនសមុទ្រ Boeing P-8I របស់ប្រទេសឥណ្ឌា ដែលអាចធ្វើប្រតិបត្តិការសង្គ្រាមប្រឆាំងនាវាមុជទឹកនិងសង្រ្គាមនៅផ្ទៃទឹក និងបេសកកម្មស៊ើបការណ៍ ឃ្លាំមើល និងឈ្លបយកការណ៍។

លោកវរសេនីយ៍ឯកបានថ្លែងបន្តថា៖ «ដោយពិចារណាលើទំហំដ៏ធំធេងរបស់មហាសមុទ្រឥណ្ឌា កោះ North Agalega នឹងក្លាយជាទីតាំងដ៏ល្អសម្រាប់ការចាក់ប្រេង»។

វរសេនីយ៍ឯក លោក Bhat បានសង្កត់ធ្ងន់អំពីប្រវត្តិកិច្ចសហប្រតិបត្តិការដ៏យូរអង្វែងរបស់ប្រជាជាតិ ដោយបន្ថែមថា ក្រសួងការបរទេសរបស់ឥណ្ឌាបានបង្ហាញថាកិច្ចព្រមព្រៀងខែវិច្ឆិកានឹងអនុញ្ញាតឱ្យគម្រោងហេដ្ឋារចនាសម្ព័ន្ធ ដើម្បីបង្កើនការតភ្ជាប់ផ្លូវអាកាសនិងផ្លូវសមុទ្ររបស់ប្រទេសម៉ូរីសដែលនឹង៖ «ធ្វើដំណើរឆ្ងាយឆ្ពោះទៅរកការកែលម្អលក្ខខណ្ឌរបស់ប្រជាជនរស់នៅដែលកោះដាច់ស្រយាលនេះ»។

នាយករដ្ឋមន្ត្រីប្រទេសឥណ្ឌាលោក Narendra Modi និងនាយករដ្ឋមន្ត្រីប្រទេសម៉ូរីស លោក Pravind Kumar Jugnauth បានជួបប្រជុំគ្នានៅខាងក្រៅកិច្ចប្រជុំកំពូលក្រុមប្រទេស 20 នៅទីក្រុងញូវដែលីក្នុងខែកញ្ញា។ ខាងមន្ត្រីបានលើកឡើងថា ពួកគេបានពិភាក្សាអំពីកិច្ចសហប្រតិបត្តិការទ្វេភាគីក្នុងវិស័យផ្សេងៗដូចជា ហេដ្ឋារចនាសម្ព័ន្ធ បច្ចេកវិទ្យាហិរញ្ញវត្ថុ និងវប្បធម៌ និងរំលឹកខួបលើកទី 75 នៃទំនាក់ទំនងការទូត។

មូលដ្ឋានថ្មីនេះនឹងពង្រឹងការឆ្លើយតបជាយុទ្ធសាស្ត្ររបស់ប្រទេសឥណ្ឌាទៅនឹងកិច្ចខិតខំប្រឹងប្រែងរបស់ទីក្រុងប៉េកាំងដើម្បីបង្កើត «បណ្តាញកំពង់ផែពាណិជ្ជកម្ម និងមូលដ្ឋានយោធា» ដែលលាតសន្ធឹងពីដីគោករបស់ចិនដល់ឧបទ្វីប Horn of Africa នេះបើយោងតាមសេចក្តីរាយការណ៍របស់កាសែត Times of India​។ គម្រោងទាំងនោះរួមមានមូលដ្ឋានទ័ពជើងទឹកនៅលើកោះហៃណានរបស់ប្រទេសចិន មជ្ឈមណ្ឌលដឹកជញ្ជូនពាណិជ្ជកម្មដែលផ្តល់ហិរញ្ញប្បទានដោយចិននៅក្នុងប្រទេសស្រីលង្កា កំពង់ផែទឹកជ្រៅដែលគ្រប់គ្រងដោយចិននៅទីក្រុង Gwadar ប្រទេសប៉ាគីស្ថាន មូលដ្ឋានទ័ពជើងទឹកក្នុងប្រទេសជីប៊ូទីនៅអាហ្រ្វិកខាងកើត និងសំណង់មូលដ្ឋានយោធានៅកោះសិប្បនិម្មិតចំនួនប្រាំពីរនៅសមុទ្រចិនខាងត្បូង។ ជាមួយនឹងការកសាងកម្លាំងយោធារបស់ PRC រួមមាននាវាមុជទឹក នាវាពិឃាត និងនាវាផ្ទុកយន្តហោះ យុទ្ធសាស្ត្រដែលហៅថា «ខ្សែ​ក​គុជ​ខ្យង» កំពុងបង្កគ្រោះថ្នាក់ដល់សន្តិសុខដែនសមុទ្រនៅក្នុងតំបន់ IOR នេះបើតាមខាងកាសែតបានរាយការណ។

ការឆ្លើយតបរបស់ទីក្រុងញូវដែលី ដែលត្រូវបានហៅថា «ខ្សែកពេជ្រ» ពាក់ព័ន្ធនឹងការសាងសង់កំពង់ផែ និងការបង្កើតប្រព័ន្ធឃ្លាំមើលនៅក្នុងតំបន់ IOR និងការពង្រឹងភាពជាដៃគូការពារជាតិ រួមទាំងប្រទេសឥណ្ឌូណេស៊ី ប្រទេសអូម៉ង់ ប្រទេសហ្វ៊ីលីពីន ប្រទេសសីស្ហែល ប្រទេសសិង្ហបុរី និងសហរដ្ឋអាមេរិក។

លោកវរសេនីយ៍ឯក Bhat បានលើកឡើងថាមូលដ្ឋាននៅកោះ Agalega រួមជាមួយមូលដ្ឋានកងកម្លាំងអាកាសរបស់កងទ័ពជើងទឹក Kohassa និងមូលដ្ឋាន Utkrosh នៅកោះ Andaman និងកោះ Nicobar របស់ឥណ្ឌានៅភាគឦសានមហាសមុទ្រឥណ្ឌា «គឺជាតម្រូវការសំខាន់ជាពិសេសដើម្បីឆ្លើយតបនឹងការឃ្លាំមើលនៅក្រោមទឹកដ៏ធំទូលាយរបស់ PLA [កងទ័ពរំដោះប្រជាជន] របស់ចិន»។

Mandeep Singh គឺជាអ្នករួមចំណែកដល់ទស្សនាវដ្ដី FORUM ដោយធ្វើការរាយការណ៍ពីទីក្រុង New Delhi នៃប្រទេសឥណ្ឌា។

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។