កងទ័ពម៉ារីនបារាំង និងអាមេរិកហ្វឹកហ្វឺនរួមគ្នានៅកោះ Tahiti
បុគ្គលិករបស់ទស្សនាវដ្តី FORUM
កងទ័ពម៉ារីនអាមេរិកទទួលបានបទពិសោធន៍យុទ្ធសាស្ត្រផ្ទាល់ក្នុងប្រតិបត្តិការជាមួយសមភាគីបារាំងនាពេលថ្មីៗនេះនៅលើកោះ Tahiti នៅតំបន់ប៉ាស៊ីហ្វិកដែលជាផ្នែកមួយនៃកោះប៉ូលីណេស៊ីរបស់បារាំង។
កងវរសេនាធំនៃកងទ័ពថ្មើរជើងកងម៉ារីន កងកម្លាំងប្រដាប់អាវុធបារាំង បានដឹកនាំសមាជិកនៃទីបញ្ជាការ និងកងវរសេនាតូចផ្នែកបម្រើសេវា កងកម្លាំងនៃកងទ័ពម៉ារីនអាមេរិក ប៉ាស៊ីហ្វិក តាមរយៈថ្នាក់ និងការហ្វឹកហ្វឺន ពីថ្ងៃទី 27 ខែសីហា ដល់ថ្ងៃទី 9 ខែកញ្ញា ឆ្នាំ 2023 នៅក្នុងទីប្រជុំជន Arue។ កងទ័ពម៉ារីនអាមេរិកបានស្គាល់ពីយុទ្ធសាស្ត្រ និងឧបករណ៍របស់បារាំង រួមទាំងកាំភ្លើងវាយប្រហារ FAMAS និង FN SCAR-H ហើយបានធ្វើសមយុទ្ធបាញ់គ្រាប់ពិតជាមួយ FAMAS ដ៏ខ្លាំងក្លា។ ពួកគេក៏បានធ្វើដំណើរតាមផ្លូវនាវាចរណ៍ និងបានប្រកួតប្រជែងលើផ្លូវឧបសគ្គ។
ប្រភពវីដេអូ៖ នាយឯក DILLON BUCK/កងទ័ពម៉ារីនអាមេរិក
កងទ័ពម៉ារីនអាមេរិក លោកអនុសេនីយ៍ឯក Tyler J. Ashton ដែលជាមេបញ្ជាការក្រុមហ៊ុនបានថ្លែងនៅក្នុងសេចក្តីប្រកាសព័ត៌មានមួយថា៖ «ការហ្វឹកហ្វឺនជាមួយដៃគូបារាំងរបស់យើងនៅក្នុងទីតាំងដែលមិនធ្លាប់ស្គាល់ គឺជាឱកាសដែលមិនអាចកាត់ថ្លៃបាន»។ «ការរៀនសូត្រពីពួកគេ និងអនុវត្តការហ្វឹកហ្វឺនដ៏លំបាកជាមួយគ្នា បានពង្រឹងទំនាក់ទំនងដ៏រឹងមាំរបស់យើងរួចហើយ ហើយយើងទាំងអស់គ្នាទន្ទឹងរង់ចាំបន្តទំនាក់ទំនងនេះជាមួយនឹងឱកាសចូលរួមនាពេលអនាគត»។
ឱកាសបែបនេះលើកកម្ពស់អន្តរប្រតិបត្តិការរវាងសម្ព័ន្ធមិត្ត និងបង្ហាញពីការប្តេជ្ញាចិត្តរបស់ពួកគេក្នុងការរក្សាសន្តិសុខ និងស្ថិរភាពនៅក្នុងតំបន់ឥណ្ឌូប៉ាស៊ីហ្វិក។ វត្តមានក្នុងតំបន់របស់ប្រទេសបារាំង រួមមានដែនដីក្រៅប្រទេសមួយចំនួន និងតំបន់សេដ្ឋកិច្ចផ្តាច់មុខភាគច្រើនរបស់ប្រទេសនេះ ដែលលាតសន្ធឹងលើផ្ទៃដី 11 លានគីឡូម៉ែត្រក្រឡា។ បារាំង និងអាមេរិក ក៏កំពុងតែពង្រឹងទំនាក់ទំនងផ្នែកការទូត និងវិស័យការពារជាតិនៅក្នុងតំបន់ផងដែរ។
កងទ័ពម៉ារីនអាមេរិកបានហ្វឹកហ្វឺនជាមួយក្រុមហ៊ុនចំនួនបីរបស់កងវរសេនាធំនៃកងទ័ពថ្មើរជើងម៉ារីន ដែលអនុញ្ញាតឱ្យពួកគេស្វែងយល់អំពីសមាសធាតុជាច្រើនរបស់កងកម្លាំងនៅកោះប៉ូលីណេស៊ីរបស់បារាំង។ ការហ្វឹកហ្វឺនក៏រួមបញ្ចូលការប្រយុទ្ធដៃទល់ដៃ និងយុទ្ធសាស្រ្តសម្រាប់សង្រ្គាមក្នុងទីក្រុងផងដែរ។
«ទោះបីជាមានឧបសគ្គផ្នែកភាសាក៏ដោយ ក៏ពួកគេតែងតែបានចូលរួមជាមួយយើងយ៉ាងជាប់លាប់ និងបង្ហាញភាពរីករាយក្នុងកិច្ចសហការជាមួយយើង» នេះបើតាមកងទ័ពម៉ារីនអាមេរិក លោកនាយឯក Alan Reyes បានលើកឡើងនៅក្នុងសេចក្តីប្រកាសព័ត៌មាន។ «វាគួរឱ្យចាប់អារម្មណ៍ក្នុងការមើលថាតើយុទ្ធសាស្រ្តរបស់ពួកគេខុសពីយុទ្ធសាស្រ្តរបស់យើងយ៉ាងណា»។
ការហ្វឹកហ្វឺនបានធ្វើឡើងស្របពេលជាមួយនឹងការប្រារព្ធទិវា Bazeilles ប្រចាំឆ្នាំរបស់កងកម្លាំងប្រដាប់អាវុធបារាំង ដោយមានបុគ្គលិកមកពីប្រទេសទាំងពីរបានប្រកួតប្រជែងក្នុងព្រឹត្តិការណ៍អត្តពលកម្ម និងបញ្ហាប្រកួតប្រជែងផ្សេងទៀត អមដោយពិធីរំលឹកដល់ការលះបង់របស់អ្នកការពារភូមិ Bazeilles ក្នុងឆ្នាំ 1870 ដែលជាជនជាតិបារាំង។ វាជាឆ្នាំបនុ្តបន្ទាប់គ្នាទីពីរដែលកងទ័ពម៉ារីនអាមេរិកបានចូលរួមក្នុងពិធីនេះ។
«ពួកយើងរីករាយណាស់ដែលបានស្វាគមន៍… កងកម្លាងំនៃកងទ័ពម៉ារីនអាមេរិកប្រចាំតំបន់ប៉ាស៊ីហ្វិក» នេះបើយោងតាម លោកវរសេនីយ៍ត្រី Luc Quenehen មេបញ្ជាការកងវរសេនាតូចនៃកងម៉ារីនបារាំងបានថ្លែងនៅក្នុងសេចក្តីប្រកាសព័ត៌មានមួយ។ «វាមានសារៈសំខាន់ណាស់ក្នុងការប្រមូលផ្តុំកងទ័ពម៉ារីនបារាំង និងកងទ័ពម៉ារីនអាមេរិកសម្រាប់ការប្រារព្ធពិធីនេះ ពីព្រោះយើងមានស្មារតីអ្នកចម្បាំង និងវប្បធម៌វាយប្រហារឡើងឆ្នេរដូចគ្នា»។
ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។
