ដៃគូឥណ្ឌូប៉ាស៊ីហ្វិកបង្កើតខ្សែសង្វាក់ផ្គត់ផ្គង់រ៉ែសំខាន់ៗ

Tom Abke

អ្នកវិភាគបាននិយាយថា ដៃគូឥណ្ឌូប៉ាស៊ីហ្វិកបន្តផ្លាស់ប្តូរខ្សែសង្វាក់ផ្គត់ផ្គង់របស់ពួកគេសម្រាប់រ៉ែសំខាន់ៗដែលនៅឆ្ងាយពីសាធារណរដ្ឋប្រជាមានិតចិន (PRC) សម្រាប់ហេតុផលសេដ្ឋកិច្ច និងសន្តិសុខជាតិ។ សារធាតុរ៉ែសំខាន់ៗគឺជាសមាសធាតុដ៏សំខាន់នៅក្នុងបច្ចេកវិទ្យាការពារជាតិ មីក្រូអេឡិចត្រូនិក ថាមពលកកើតឡើងវិញ និងហេដ្ឋារចនាសម្ព័ន្ធ។ សារធាតុរ៉ែសំខាន់ៗទាំងនោះរួមបញ្ចូលធាតុនៃរ៉ែកម្រដូចជា សឺរីញ៉ូម (cerium) និង នីអូឌីមីញ៉ូម (neodymium) ដែលប្រើក្នុងម៉ូទ័រអគ្គិសនី ក៏ដូចជាលោហធាតុលីចូម ដែលត្រូវបានគេស្គាល់យ៉ាងទូលំទូលាយ ដែលប្រើក្នុងថ្ម អាលុយមីញ៉ូម និងនីកែល។

លោកបណ្ឌិត Fabian Villalobos វិស្វកររងនៅ Rand Corp. បានថ្លែងប្រាប់ទស្សនាវដ្តី FORUM ថា៖ «មានធាតុចំនួន 50 នៅក្នុងបញ្ជីសារធាតុរ៉ែសំខាន់ៗនៃឆ្នាំ 2022 ដែលបានបោះពុម្ពផ្សាយដោយ ការស្ទង់ភូមិសាស្ត្រសហរដ្ឋអាមេរិក»។ លោកបានបន្តថា ការផ្គត់ផ្គង់នៃសារធាតុរ៉ែសំខាន់ៗជាច្រើន ជាពិសេសរ៉ែកម្រ និងលីចូមចម្រាញ់ ​ត្រូវ​បាន​គ្រប់គ្រង​ជា​ប្រវត្តិសាស្ត្រ​ដោយ​ក្រុមហ៊ុន​ចិន។

លោកបណ្ឌិត Villalobos បានបន្ថែមថា នៅទូទាំងតំបន់ឥណ្ឌូប៉ាស៊ីហ្វិក ប្រទេសនានារួមមានអូស្ត្រាលី ឥណ្ឌា ឥណ្ឌូណេស៊ី ជប៉ុន ម៉ាឡេស៊ី នូវែលសេឡង់ ហ្វ៊ីលីពីន និងកូរ៉េខាងត្បូងកំពុងចាត់វិធានការដើម្បី «ផ្ដាច់» ខ្សែសង្វាក់ផ្គត់ផ្គង់រ៉ែសំខាន់ៗរបស់ពួកគេចេញពីប្រភពចិន។

លោកបណ្ឌិតក៏បានថ្លែងផងដែរថា៖ «ហេតុផលមួយដែលប្រទេសទាំងនេះកំពុងព្យាយាមផ្ដាច់ខ្លួនចេញពីប្រទេសចិន គឺដើម្បីទទួលបានអត្ថប្រយោជន៍ពីអត្ថប្រយោជន៍ពន្ធដែលមាននៅក្នុងច្បាប់ស្ដីពីការកាត់បន្ថយអតិផរណារបស់សហរដ្ឋអាមេរិក»។ ច្បាប់ដែលបានអនុម័តក្នុងឆ្នាំ 2022 ផ្តល់អត្ថប្រយោជន៍ពន្ធដល់ក្រុមហ៊ុនអាមេរិកសម្រាប់ការទទួលបានសារធាតុរ៉ែសំខាន់ៗពីប្រភពផ្សេងៗក្រៅពី «អង្គភាពបរទេសដែលមានការព្រួយបារម្ភ» ដូចជា PRC ឬរុស្ស៊ីជាដើម។

តម្រូវការសកលសម្រាប់សារធាតុរ៉ែសំខាន់ៗកំពុងតែកើនឡើង ជាពិសេសខណៈពេលដែលប្រទេសនានាស្វែងរកការផ្លាស់ប្តូរទៅកាន់ប្រភពថាមពលដែលកកើតឡើងវិញ។ ឥណ្ឌា ដែលមានទុនបម្រុងជាដុំកំភួន កំពុងតែសម្លឹងមើលក្រុមហ៊ុនអូស្ត្រាលី និងក្រុមហ៊ុនន័រវេស ដើម្បីជួយអភិវឌ្ឍឧស្សាហកម្មរ៉ែដ៏សំខាន់ៗរបស់ខ្លួន នេះបើតាមលោក Kurt Tong និងលោក Charles Dunst អ្នកវិភាគរបស់ The Asia Group ដែលជាស្ថាប័នស្រាវជ្រាវដែលមានមូលដ្ឋាននៅទីក្រុងវ៉ាស៊ីនតោន D.C បានសរសេរនៅក្នុងទស្សនាវដ្តី Barron កាលពីខែសីហា ឆ្នាំ 2023។

ពួកគេក៏បានប៉ាន់ប្រមាណថា ប្រទេសហ្វ៊ីលីពីនមានធនធានរ៉ែសំខាន់ៗដែលមានតម្លៃដល់ទៅ 1 ទ្រីលានដុល្លារ ហើយទីក្រុងម៉ានីលកំពុងតែពង្រឹងកិច្ចសហប្រតិបត្តិការទាញយករ៉ែក្នុងដំណាក់កាលដំបូងជាមួយសហភាពអឺរ៉ុប និងសហរដ្ឋអាមេរិក នូវែលសេឡង់ ទន្ទឹមនឹងនោះ ក៏កំពុងតែផ្តល់ចំណូលចិត្តដល់សហគ្រាសក្នុងស្រុកក្នុងការរុករកផងដែរ ហើយគេបានរំពឹងថានឹងសហការជាមួយក្រុមហ៊ុនមកពីបណ្តាប្រទេសជាដៃគូដូចជាអូស្ត្រាលី និងសហរដ្ឋអាមេរិកផងដែរ។

លោកបណ្ឌិត Villalobos បានឱ្យដឹងថា កង្វល់ផ្នែកសន្តិសុខជាតិដែលគាំទ្រដល់អត្ថប្រយោជន៍តពន្ធរបស់សហរដ្ឋអាមេរិកគឺជាបញ្ហារួមនៃបណ្តាប្រទេសនៅតំបន់ឥណ្ឌូប៉ាស៊ីហ្វិកដទៃទៀត។ លោក​បាន​លើក​ឡើង​ពី​ប្រទេស​ជប៉ុន​ដែលបាន​ប្រឈម​មុខ​នឹង​ការ​ទប់​ស្កាត់របស់ PRC លើ​ការ​នាំ​ចូលរ៉ែ​កម្រ​ក្នុង​ឆ្នាំ 2010 បន្ទាប់​ពី​មាន​ចំណាត់​ការ​របស់​ជប៉ុន​ប្រឆាំង​នឹង​ការ​នេសាទ​ខុស​ច្បាប់​ដោយ​នាវា​ចិននៅ​ក្នុង​ដែន​ទឹក​របស់​ខ្លួន។

លោក​បាន​បន្ត​ថា ចាប់​តាំង​ពី​ពេល​នោះ​មក ជប៉ុន​បាន​សហការ​ជាមួយ​ប្រទេស​អូស្ត្រាលី ​ដើម្បី​ចម្រាញ់រ៉ែ​កម្រ​ដែល​មាន​ប្រភព​ពី​អូស្ត្រាលី​នៅ​ក្នុង​ប្រទេស​ម៉ាឡេស៊ី។

កូរ៉េខាងត្បូងក៏កំពុងតែព្យាយាមបង្កើតខ្សែសង្វាក់ផ្គត់ផ្គង់ដែលអាចទុកចិត្តបានរបស់ខ្លួនសម្រាប់រ៉ែសំខាន់ៗក្រៅពីសាធារណរដ្ឋប្រជាមានិតចិនផងដែរ។ យោងតាមលោក Tong និងលោក Dunst ប្រធានាធិបតីកូរ៉េខាងត្បូង លោក Yoon Suk Yeol ចង់កាត់បន្ថយការពឹងផ្អែកលើ PRC សម្រាប់សារធាតុរ៉ែសំខាន់ៗពី 80% ទៅ 50% នៅឆ្នាំ 2030។ ទីក្រុងសេអ៊ូលមានបំណងផ្តល់ការបន្ធូរបន្ថយពន្ធ និងជំនួយហិរញ្ញវត្ថុផ្សេងទៀតដល់គម្រោងអភិវឌ្ឍន៍ធនធាននៅក្នុងសមុទ្រ ហើយកំពុងពង្រីកទំនាក់ទំនងរបស់ខ្លួនជាមួយនឹងអូស្ត្រាលី និងម៉ុងហ្គោលី ដែលមានធនធានរ៉ែដ៏សម្បូរបែប។

លោកបណ្ឌិត Villalobos បានថ្លែងថា ដោយសារតួនាទីនៃសារធាតុរ៉ែដ៏សំខាន់ៗនៅក្នុងបច្ចេកវិទ្យាការពារជាតិ ដូច្នេះហើយ ជាការសំខាន់ដែលបណ្តាប្រទេសនៅតំបន់ឥណ្ឌូប៉ាស៊ីហ្វិកមានឧស្សាហកម្មការពារជាតិសំខាន់ៗដូចជាឥណ្ឌា និងកូរ៉េខាងត្បូង ដើម្បីបង្កើតខ្សែសង្វាក់ផ្គត់ផ្គង់ឯករាជ្យ។

Tom Abke គឺជាអ្នកឆ្លើយឆ្លងព័ត៌មាននៅទស្សនាវដ្តី FORUM រាយការណ៍ពីប្រទេសសិង្ហបុរី។

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។