ក្រុមហ៊ុនការពារជាតិបានងាកទៅរកប្រទេសជប៉ុនចំពេលលក្ខខណ្ឌសន្តិសុខរបស់ឥណ្ឌូប៉ាស៊ីហ្វិកមានការផ្លាស់ប្តូរ

Marc Jacob Prosser

ក្រុមហ៊ុនម៉ៅការផ្នែកការពារជាតិជាសកលកំពុងផ្លាស់ប្តូរប្រតិបត្តិការ និងផ្តោតលើប្រទេសជប៉ុន ខណៈដែលប្រទេសនេះបង្កើនការចំណាយលើវិស័យការពារជាតិ ដើម្បីដោះស្រាយភាពតានតឹងដែលកំពុងកើនឡើងនៅតំបន់ឥណ្ឌូប៉ាស៊ីហ្វិក។

ក្រុមហ៊ុន BAE Systems ដែលមានមូលដ្ឋាននៅចក្រភពអង់គ្លេសនឹងផ្លាស់ប្តូរទីតាំងមុខងារត្រួតពិនិត្យរបស់ខ្លួនពីម៉ាឡេស៊ី ទៅកាន់ប្រទេសជប៉ុននៅចុងឆ្នាំ 2023 នេះបើយោងតាមទស្សនាវដ្តី Nikkei Asia របស់ជប៉ុន។ ក្រុមហ៊ុនដែលទើបតែបង្កើតក្រុមហ៊ុនបុត្រសម្ព័ន្ធក្នុងប្រទេសជប៉ុន នឹងដើរតួនាទីយ៉ាងសំខាន់ក្មុងកម្មវិធីប្រយុទ្ធតាមអាកាសជាសកល (GCAP) ដែលជាគំនិតផ្តួចផ្តើមត្រីភាគីដោយអ៊ីតាលី ជប៉ុន និងចក្រភពអង់គ្លេសក្នុងការផលិតយន្តហោះចម្បាំង។ ពាក់ព័ន្ធនឹងការផ្លាស់ប្តូរនេះ ក្រុមហ៊ុន BAE Systems កំពុងព្យាយាមពង្រឹងភាពជាដៃគូរបស់ខ្លួនជាមួយក្រុមហ៊ុន Mitsubishi Heavy Industries របស់ប្រទេសជប៉ុន ក្នុងចំណោមក្រុមហ៊ុនដទៃទៀត។

ក្រុមហ៊ុនការពារជាតិដែលមានមូលដ្ឋាននៅសហរដ្ឋអាមេរិក Lockheed Martin កំពុងផ្លាស់ប្តូរទីតាំងមជ្ឈមណ្ឌលយុទ្ធសាស្ត្រអាស៊ីរបស់ខ្លួនពីសិង្ហបុរីទៅកាន់ប្រទេសជប៉ុន។ ក្រុមហ៊ុនដទៃទៀត រួមទាំងក្រុមហ៊ុន L3Harris Technologies ដែលមានមូលដ្ឋាននៅសហរដ្ឋអាមេរិក ក្រុមហ៊ុន Thales របស់ប្រទេសបារាំង និងក្រុមហ៊ុន STM របស់តួកគី ក៏បានចាប់អារម្មណ៍កាន់តែខ្លាំងនៅក្នុងប្រទេសជប៉ុនផងដែរ នេះបើយោងតាមសេចក្ដីរាយការណ៍របស់ទស្សនាវដ្តី Nikkei Asia។

លោក Hirohito Ogi អ្នកស្រាវជ្រាវជាន់ខ្ពស់នៅ Asia Pacific Initiative & Institute of Geoeconomics, International House of Japan បានថ្លែងប្រាប់ទស្សនាវដ្តី FORUM ឱ្យដឹងថា៖ «ជប៉ុនមិនត្រឹមតែជាអតិថិជនទេ ថែមទាំងជាដៃគូសហការដ៏សំខាន់ក្នុងវិស័យការពារជាតិ ហើយជាមជ្ឈមណ្ឌលសម្រាប់ដោះស្រាយបញ្ហាប្រឈមផ្នែកសន្តិសុខនៅតំបន់ឥណ្ឌូប៉ាស៊ីហ្វិក»។

បើយោងតាមលោក Nozomu Yoshitomi ឧត្ដមសេនីយ៍ទោចូលនិវត្តន៍នៃកងកម្លាំងស្វ័យការពារជើងគោកជប៉ុន និងជាសាស្ត្រាចារ្យផ្នែកគ្រប់គ្រងហានិភ័យនៅសាកលវិទ្យាល័យ Nihon បាន​ឱ្យដឹងថា ទីតាំងយុទ្ធសាស្រ្តរបស់ប្រទេសជប៉ុននៅក្នុងក្របខណ្ឌសន្តិសុខក្នុងតំបន់ជួយធ្វើខ្លួនឱ្យក្លាយជាចំណុចទាក់ទាញសម្រាប់សាជីវកម្មការពារជាតិសកល។ គុណសម្បត្តិទាំងនេះរួមមានស្ថិរភាពនយោបាយរបស់ជប៉ុន មូលដ្ឋានគ្រឹះបច្ចេកវិទ្យាការពារជាតិដ៏រឹងមាំ ហើយថវិកាការពារជាតិដ៏ច្រើន។

លោក Yoshitomi បានប្រាប់ទស្សនាវដ្តី FORUM ឱ្យដឹងថា៖ «តួនាទីដែលកំពុងកើនឡើងរបស់ជប៉ុនចំពោះសក្តានុពលសន្តិភាព និងស្ថិរភាពរបស់ឥណ្ឌូប៉ាស៊ីហ្វិកគឺមានភស្តុតាងស្រាប់ហើយ»។ «នៅពេលដែលមហាអំណាចការពារជាតិជាសកលបានប្រមូលផ្តុំគ្នានៅក្នុងប្រទេសជប៉ុន វាក្លាយជាការចាំបាច់សម្រាប់ប្រទេសជាតិ ក្នុងការដើរតួជាមជ្ឈមណ្ឌលនៃការរារាំងក្នុងតំបន់ ដែលត្រូវបានពង្រឹងតាមរយៈការប្តេជ្ញាចិត្តការពារពហុជាតិ»។

ជប៉ុនកំពុងបង្កើនសមត្ថភាពការពារជាតិរបស់ខ្លួនចំពេលភាពតានតឹងកាន់តែកើនឡើង​ ដោយទីក្រុងតូក្យូកំពុងកំណត់អត្តសញ្ញាណក្តីបារម្ភផ្នែកសន្តិសុខសំខាន់ៗចំនួនបី៖ ការបង្កើនការអះអាងរបស់ PRC នៅក្នុងតំបន់ ការបាញ់មីស៊ីលដែលបង្កឱ្យមានអស្ថិរភាពរបស់កូរ៉េខាងជើង និងសមយុទ្ធយោធា និងការ​បះបោរ​របស់​រុស្ស៊ី ដូច​ដែល​បានបង្ហាញភស្តុតាងតាមរយៈ​​ការ​ឈ្លានពាន​អ៊ុយក្រែន​ដោយ​គ្មានការបង្កហេតុ។

ថវិកាការពារជាតិរបស់ប្រទេសជប៉ុនសម្រាប់ឆ្នាំ 2023-27 គឺជាកំណត់ត្រាមួយក្នុងចំនួនទឹកប្រាក់ 294, 21 ពាន់លានដុល្លារ ហើយរដ្ឋាភិបាលក៏កំពុងពិចារណាផងដែរក្នុងការអនុញ្ញាតឱ្យក្រុមហ៊ុនផលិតសម្ភារការពារជាតិជប៉ុននាំចេញសម្ភារជាច្រើនទៀតដូចជានៅក្រោមកម្មវិធី GCAP ត្រីភាគី។

ការបង្កើនចំណាយលើវិស័យការពារជាតិ និងសក្តានុពលសម្រាប់ការនាំចេញកាន់តែច្រើនអាចជំរុញវិស័យការពារជាតិរបស់ជប៉ុន បើទោះបីជាមានលំហូរនៃក្រុមហ៊ុនធំៗលើវិស័យការពារជាតិសកលដែលនាំមកនូវការប្រកួតប្រជែងកាន់តែខ្លាំងក៏ដោយ។ ក្រុមហ៊ុនផ្គត់ផ្គង់ខ្នាតមធ្យមក្នុងស្រុករំពឹងថានឹងមានការបញ្ជាទិញកើនឡើង។

ជាមួយនឹងទិដ្ឋភាពផលិតកម្មការពារជាតិដ៏ធំនៃអង្គភាពជាង 10 000 នៅទូទាំងប្រទេស ទីក្រុងតូក្យូមានគោលបំណងជំរុញកិច្ចសហប្រតិបត្តិការក្នុងចំណោមក្រុមហ៊ុនការពារអន្តរជាតិ និងសហគ្រាសខ្នាតតូច ទៅខ្នាតមធ្យមនៅក្នុងស្រុកដែលមានឯកទេសខាងផ្នែក និងសមាសធាតុ។

លោក Yoshitomi បានលើកឡើងទៀតថា ការមកដល់របស់ក្រុមហ៊ុនបរទេសអាចកំណត់វិស័យការពារជប៉ុនឡើងវិញ ហើយនឹងតម្រូវឱ្យមានបង្កើតគោលនយោបាយក្នុងការលើកកម្ពស់ភាពជាដៃគូយោធាសាធារណៈ-ឯកជន។

លោក Ogi ក៏បានគូសបញ្ជាក់អំពីសក្តានុពលដែល​កើនឡើងសម្រាប់កិច្ចសហប្រតិបត្តិការ និងបានសង្កត់ធ្ងន់លើតម្រូវការសម្រាប់ការរៀបចំរចនាសម្ព័ន្ធឡើងវិញថា៖ «លំហូរនៃវិស័យការពារជាតិសកលគួរតែជំរុញឱ្យមានការផ្លាស់ប្តូរជាវិជ្ជមាន តាមរយៈការពារប្រទេសជប៉ុនកុំឱ្យក្លាយជាក្រុមហ៊ុនផ្គត់ផ្គង់បន្ទាប់បន្សំ»។

លោក Marc Jacob Prosser គឺជាអ្នកឆ្លើយឆ្លងព័ត៌មានរបស់ទស្សនាវដ្តី FORUM ដែលរាយការណ៍ចេញពីទីក្រុងតូក្យូ។

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។