សន្និសីទមេដឹកនាំក្នុងវិស័យការពារជាតិបង្កើនការយល់ដឹង កិច្ចសហប្រតិបត្តិការក្នុងចំណោមកងកម្លាំងឥណ្ឌូប៉ាស៊ីហ្វិក

បុគ្គលិករបស់ទស្សនាវដ្តី FORUM

មេដឹកនាំយោធាឥណ្ឌូប៉ាស៊ីហ្វិកបានមកជួបជុំគ្នាសម្រាប់សន្និសីទមេដឹកនាំការពារជាតិ (CHOD) នៅទីក្រុង Nadi ប្រទេសហ្វ៊ីជី នៅពាក់កណ្តាលខែសីហា ឆ្នាំ 2023 ដើម្បីពិភាក្សាលើប្រធានបទនានា រួមទាំងសណ្តាប់ធ្នាប់ដែលផ្អែកលើច្បាប់អន្តរជាតិ ការឈ្លានពានតាមអ៊ីនធឺណិត គ្រោះមហន្តរាយធម្មជាតិ និងបម្រែបម្រួលអាកាសធាតុ។

សន្និសីទនេះ ត្រូវបានប្រារព្ធឡើងជារៀងរាល់ឆ្នាំចាប់តាំងពីឆ្នាំ 1998 ហើយត្រូវបានបន្ថែមដោយវគ្គនិម្មិតប្រចាំត្រីមាស ដែលប្រមូលផ្តុំមេដឹកនាំក្នុងវិស័យការពារជាតិជាន់ខ្ពស់ក្នុងតំបន់ដើម្បីបង្កើនការយល់ដឹង និងកិច្ចសហប្រតិបត្តិការ។ កងកម្លាំងយោធាសាធារណៈរដ្ឋហ្វ៊ីជី (RFMF) និងទីបញ្ជាការឥណ្ឌូប៉ាស៊ីហ្វិករបស់សហរដ្ឋអាមេរិក (USINDOPACOM) បានរៀបចំសន្និសីទ Nadi ដោយផ្ទាល់ជាមួយប្រធានបទ «ការរក្សានូវបទបញ្ជាផ្អែកលើច្បាប់ ដើម្បីផ្តល់អំណាចដល់អធិបតេយ្យភាពក្នុងយុគសម័យនៃការប្រកួតប្រជែងជាយុទ្ធសាស្ត្រ»។ មន្ត្រីដែលមានឋានន្តរស័ក្ដិមកពីប្រទេសឥណ្ឌូប៉ាស៊ីហ្វិកចំនួន 27 បានចូលរួមសិក្ខាសាលាតុមូល កិច្ចពិភាក្សាជាក្រុម និងការពិភាក្សា។

លោកឧត្តមសេនីយ៍ទោ Jone Kalouniwai មេបញ្ជាការ RFMF បានថ្លែងនៅក្នុងសុន្ទរកថាបើកថា៖ «កិច្ចប្រជុំនេះជានិមិត្តរូបនៃការប្តេជ្ញាចិត្តរបស់ RFMF ចំពោះការឈានមុខគេនៃការចូលរួមយ៉ាងសកម្ម ដោយការសន្ទនាដោយបើកចំហ និងការគោរពគ្នាទៅវិញទៅមករួមគ្នាគឺមានគោលបំណងដើម្បីកសាងស្ពានឆ្ពោះទៅរកសន្តិភាព និងស្ថិរភាពយូរអង្វែង»។ «ទាំងអស់គ្នា តាមរយៈការប្តេជ្ញាចិត្ត និងការខិតខំប្រឹងប្រែងរួមគ្នារបស់យើង យើងមានគោលបំណងពង្រឹងមូលដ្ឋានគ្រឹះនៃតំបន់ឥណ្ឌូប៉ាស៊ីហ្វិកដែលមានសុវត្ថិភាព និងវិបុលភាព»។

នាយករដ្ឋមន្ត្រីហ្វ៊ីជី លោក Sitiveni Rabuka បានប្រាប់មេដឹកនាំយោធាថា លោកស្រមៃមើលកោះប៉ាស៊ីហ្វិក ជាតំបន់សន្តិភាព ដែលជៀសវាងជម្លោះ។

លោកស្រី Samantha Power អភិបាលនៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) បានប្រាប់អ្នកចូលរួមថា លោកស្រីបានចាប់អារម្មណ៍យ៉ាងខ្លាំងចំពោះការមើលឃើញមេដឹកនាំយោធាដែលកំពុងតែ «មកចូលរួមគ្នាដើម្បីភ្ជាប់ទំនាក់ទំនងនឹងគ្នាក្នុងការពិភាក្សាអំពីបញ្ហាប្រឈមរួមគ្នា ហើយនឹងដើម្បីមើលឃើញថាមូលដ្ឋានរួមណាអាចបានបង្កើតឡើង ដើម្បីជាការបម្រើដល់អ្វីដែលនៅតែមានភាពថ្លៃថ្នូរបំផុត និងចាំបាច់ក្នុងចំណោមគោលបំណងទាំងអស់នោះ៖ សន្តិភាពយូរអង្វែងក្នុងចំណោមប្រជាជាតិ និងប្រជាជន» នេះបើតាមសេចក្តីប្រកាសរបស់ទីភ្នាក់ងារ USAID បានបញ្ជាក់។ លោកស្រី Power បានធ្វើដំណើរទៅកាន់តំបន់ប៉ាស៊ីហ្វិកខាងត្បូង ដើម្បីបើកការិយាល័យ USAID នៅប្រទេសហ្វ៊ីជី និងប្រទេសប៉ាពូអាស៊ីនូវែលហ្គីណេ និងដើម្បីបង្ហាញពីការគាំទ្រដល់តំបន់។ ឧត្តមនាវីទោនៃកងទ័ពជើងទឹកហូឡង់ លោក Rob Bauer ប្រធានគណៈកម្មាធិការយោធាអង្គការណាតូ បានជួបពិភាក្សាទ្វេភាគីជាមួយអ្នកចូលរួមក្នុងសន្និសីទរួមមាន អគ្គមេបញ្ជាការកងទ័ពការពារជាតិអូស្ត្រាលី លោក Angus Campbell នាយឧត្តមសេនីយ៍ លោក Yoshihide Yoshida នាយសេនា​ធិការចម្រុះជប៉ុន នាយសេនាធិការដែនអាកាសនៃកងកម្លាំង​ការពារជាតិនូវែលសេឡង់ លោក Kevin Short និងឧត្តមសេនីយ៍ឯក លោក Woong Park នៃសាធារណរដ្ឋកូរ៉េ។ លោក​បានសង្កត់ធ្ងន់ពីលើ​សារៈសំខាន់​នៃ​សម្ព័ន្ធមិត្ត​ក្នុង​តំបន់ និង​ដៃគូ​នានា​ចំពោះ​សម្ព័ន្ធភាព​សន្តិសុខ។ លោក Bauer បានមានប្រសាសន៍ថា៖ «ឥណ្ឌូប៉ាស៊ីហ្វិកមានសារៈសំខាន់សម្រាប់អង្គការណាតូ ដោយសារការអភិវឌ្ឍនៅក្នុងតំបន់នោះអាចប៉ះពាល់ដោយផ្ទាល់ដល់សន្តិសុខអឺរ៉ុប និងអាត្លង់ទិក» នេះបើយោងតាមសេចក្ដីប្រកាសព័ត៌មានរបស់អង្គការណាតូ។ «ដោយមានជំនួយពីដៃគូរបស់យើងនៅក្នុងតំបន់ យើងអាចធ្វើការរួមគ្នាដើម្បីដោះស្រាយបញ្ហាគ្រប់យ៉ាងចាប់ពីបញ្ហាព័ត៌មានមិនពិត បម្រែបម្រួលអាកាសធាតុ និងសន្តិសុខដែនសមុទ្រ រហូតដល់ការការពារតាមអ៊ីនធឺណិត និងការប្រកួតប្រជែងក្នុងអវកាស»។

នាយឧត្តមនាវី លោក John Aquilino មេបញ្ជាការនៃ USINDOPACOM បានលើកឡើងថា កិច្ចប្រជុំកំពូលរបស់ CHOD គឺជាឱកាសមួយដើម្បីពង្រឹងសន្តិសុខក្នុងតំបន់។ លោកបានថ្លែងថា៖ «ឥណ្ឌូប៉ាស៊ីហ្វិកដែលមានសន្តិភាព និងវិបុលភាពគឺអាស្រ័យលើភាពរឹងមាំនៃទំនាក់ទំនងរវាងប្រជាជាតិដែលមានតម្លៃរួម និងការគោរពចំពោះអធិបតេយ្យភាពរួមជាមួយនឹងនីតិរដ្ឋ»។