ឧបករណ៍ទំនិញពាណិជ្ជកម្ម ត្រូវបានទទួលយក

ពេលត្រូវបានច្រានចោលដោយសារបច្ចេកវិទ្យាអន់ជាង ឧបករណ៍ទំនិញពាណិជ្ជកម្ម (COTS) ដូចជាយន្តហោះដ្រូនពីលើអាកាស និងតាមដែនសមុទ្រ ទូរសព្ទចល័តដែលមានសុវត្ថិភាព និងឧបករណ៍ GPS កំពុងជួយអ៊ុយក្រែនប្រឆាំងនឹងការវាយលុករបស់រុស្ស៊ី និងទាក់ទាញចំណាប់អារម្មណ៍កាន់តែខ្លាំងពីយោធាទូទាំងពិភពលោក រួមទាំងនៅក្នុង ឥណ្ឌូ-ប៉ាស៊ីហ្វិកផងដែរ។

ភាគរយតិចតួចនៃគ្រឿងបរិក្ខារដែលអ៊ុយក្រែនបានប្រើប្រឆាំងនឹងការឈ្លានពានរបស់រុស្ស៊ីគឺមានតម្លៃថោក អាចប្រើបានជាសាធារណៈ និងអាចចូលប្រើប្រាស់បានយ៉ាងឆាប់រហ័ស។ ជាឧទាហរណ៍ យន្តហោះដ្រូនពីលើអាកាសត្រូវបានលក់នៅក្នុងហាងលក់វត្ថុកម្សាន្ត និងតាមអ៊ីនធឺណិត មុនពេលដែលប្រជាជនអ៊ុយក្រែនចាប់ផ្តើមប្រើប្រាស់វា ដើម្បីរកមើលរថក្រោះ និងកងទ័ពរបស់សត្រូវ។ ផលិតផលទំនិញពាណិជ្ជកម្ម​មួយចំនួនត្រូវបានរួមផ្សំគ្នាជាមួយផ្នែកផលិត ឬប្រឌិតទៅនឹងអាវុធទាន់សម័យ និងសម្ភារសម្រាប់សង្គ្រាមផ្សេងទៀត។

ប្រទេសរុស្ស៊ីបានកត់សម្គាល់ពីការប្រើប្រាស់ឧបករណ៍ទំនិញពាណិជ្ជកម្មរបស់អ៊ុយក្រែន។ ប្រទេសទាំងពីរបានដាក់ពង្រាយយន្តហោះដ្រូនដែលគ្រប់គ្រងពីចម្ងាយខ្នាតតូចសម្រាប់ការស៊ើបការណ៍សម្ងាត់ ឃ្លាំមើល និងឈ្លបយកការណ៍ និងទម្លាក់អាវុធលើគោលដៅសំខាន់ៗ។ ទន្ទឹមនឹងនេះ ឧបករណ៍ GPS ពាណិជ្ជកម្មអាចស្វែងរក និងតាមដានកងទ័ពសត្រូវ រួមទាំងការបញ្ជាក់ពីវត្តមានរបស់កងកម្លាំងប្រឆាំងនៅកន្លែងកើតហេតុនៃឧក្រិដ្ឋកម្មសង្គ្រាមដែលអាចកើតមាន។ ឧបករណ៍តាមអ៊ីនធឺណិតតាមដាន និងសូម្បីតែបិទឧបករណ៍របស់សត្រូវ។

បច្ចេកវិទ្យាពាណិជ្ជកម្មក៏កំពុងកែលម្អនូវប្រសិទ្ធភាពនៃឧបករណ៍យោធាចាស់ៗផងដែរ។ ជាឧទាហរណ៍ ភាពវៃឆ្លាតដែលប្រមូលបានអំពីទីតាំងរបស់សត្រូវ អាចត្រូវបានប្រើដើម្បីកំណត់គោលដៅវាយប្រហារដោយមីស៊ីល។ លោក Mark Cancian វរសេនីយ៍ឯកកងម៉ារីនអាមេរិកចូលនិវត្តន៍ និងជាទីប្រឹក្សាជាន់ខ្ពស់នៃមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ (CSIS) បានប្រាប់ទស្សនាវដ្តី FORUM ថា៖ «សង្រ្គាមនៅអ៊ុយក្រែនធ្វើឱ្យខ្លួនស័ក្ដិសមទៅនឹងដំណោះស្រាយឧបករណ៍ទំនិញពាណិជ្ជកម្ម​»។ «អ្នកមានបណ្ដាញជួរមុខដែលមានស្ថិភាព។ មនុស្ស​មាន​ពេល​ដើម្បី​រៀបចំ​របស់​ទាំង​នេះ ហើយ​រៀន​ពី​របៀបក្នុងការ​ប្រើ​វា»។

វាមានសារៈសំខាន់ណាស់ក្នុងការតភ្ជាប់អ្នកប្រើប្រាស់ឧបករណ៍ទំនិញពាណិជ្ជកម្មស៊ីវិល ដែលជាប្រតិបត្តិករយន្តហោះដ្រូនពីលើអាកាស ជាឧទាហរណ៍ ជាមួយអង្គភាពយោធាដែលអាចទាញយកព័ត៌មានបាន។ លោក Cancian បានលើកឡើងថា៖ «បុរសម្នាក់កំពុងហោះហើរឧទ្ធម្ភាគចក្រស្លាបបួនជុំវិញ ហើយឃើញរថក្រោះជាច្រើន វាពិតជាល្អណាស់ ហើយគួរឱ្យចាប់អារម្មណ៍ ប៉ុន្តែវាពិតជាមិនបានធ្វើអ្វីមួយលក្ខណៈយោធាទេ»។

ការប្រើប្រាស់ឧបករណ៍ទំនិញពាណិជ្ជកម្ម​មិនមែនជារឿងថ្មីទេ ជាពិសេសនៅពេលនិយាយអំពីយន្តហោះដ្រូន។ ក្រុមរដ្ឋអ៊ីស្លាមបានចាប់ផ្តើមប្រើប្រាស់យានអវកាសគ្មានមនុស្សបើក (UAVs) នៅក្នុងឆ្នាំ 2016 ដើម្បីទម្លាក់គ្រាប់បែកដែលជាផ្នែកមួយនៃការវាយប្រហារភេរវកម្មរបស់ខ្លួន នេះបើយោងតាមរបាយការណ៍ខែមករា ឆ្នាំ 2022 ដោយ Bellingcat ដែលជាក្រុមអ្នកស្រាវជ្រាវអន្តរជាតិ អ្នកស៊ើបអង្កេត និងអ្នកកាសែតដែលមានមូលដ្ឋាននៅប្រទេសហូឡង់។ យុទ្ធសាស្ត្រ​ត្រូវ​បាន​គេ​ដាក់​ពង្រាយ​នៅ​កន្លែង​ផ្សេង។ ភេរវករនៅក្នុងខែមិថុនា ឆ្នាំ 2021 បានទម្លាក់ឧបករណ៍បំផ្ទុះតូចៗចំនួនពីរ ពីយន្តហោះគ្មានមនុស្សបើក ទៅលើអគារមូលដ្ឋានទ័ពអាកាសឥណ្ឌា នៅជិតព្រំដែនប៉ាគីស្ថាន។ ទោះបីជាការរងរបួស និងការខូចខាតមានតិចតួចក៏ដោយ ឧបទ្ទវហេតុនេះបានបង្ហាញពីភាពមិនស៊ីសង្វាក់គ្នានៃផលិតផលពាណិជ្ជកម្មដែលអាចរកបាន។ វាក៏បាននាំឱ្យយោធាទូទាំងពិភពលោកមើលឃើញពីភាពចាំបាច់នៃការរៀបចំវិធីដើម្បីប្រឆាំងនឹងកម្មវិធីប្រើប្រាស់ទំនិញពាណិជ្ជកម្មផងដែរ។

សហរដ្ឋ​អាមេរិក​រាប់​ទសវត្សរ៍​មុន​បាន​ទទួល​ស្គាល់​សក្ដានុពល​យោធា​នៃ​ឧបករណ៍​ស៊ីវិល​ដែល​ប្រើ​ជា​ទូទៅ។ បន្ទាប់មក នៅឆ្នាំ 1994 រដ្ឋមន្ត្រីការពារជាតិសហរដ្ឋអាមេរិក លោក William Perry បានអំពាវនាវឱ្យដាក់ពង្រាយផលិតផលទំនិញពាណិជ្ជកម្ម «គ្រប់ទីកន្លែង និងនៅពេលណាដែលអាចធ្វើទៅបាន» ដើម្បីដោះស្រាយការពន្យារពេល និងថ្លៃចំណាយលើលទ្ធកម្ម។ ក្រុមហ៊ុនការពារជាតិទូទាំងពិភពលោកចាប់តាំងពីពេលនោះមកបានបញ្ចូលគុណលក្ខណៈឧបករណ៍ និងបច្ចេកវិទ្យានៃទំនិញពាណិជ្ជកម្ម ទៅក្នុងផលិតផលជាច្រើនរួមទាំងយន្តហោះដ្រូនថ្នាក់យោធា។ សង្រ្គាមនៅអ៊ុយក្រែនផ្តល់ការយល់ដឹងអំពីរបៀបដែលបច្ចេកវិទ្យាទាំងនេះអនុវត្តនៅលើសមរភូមិជាមួយនឹងឧបករណ៍យោធាចាស់ៗ។ ជាឧទាហរណ៍ នៅក្នុងឥណ្ឌូប៉ាស៊ីហ្វិក សម្ព័ន្ធមិត្ត និងដៃគូកំពុងស្វែងរកភាពស្របគ្នា ដើម្បីរារាំងបក្សកុម្មុយនិស្តចិន (CCP) ពីការប៉ុនប៉ងដណ្តើមកាន់កាប់តៃវ៉ាន់ដោយកម្លាំង។

ឧបករណ៍ទិញទំនិញពាណិជ្ជកម្ម អាចគាំទ្របច្ចេកវិទ្យាយោធាកម្រិតខ្ពស់យ៉ាងមានប្រសិទ្ធភាព នេះបើតាមអ្នកនិពន្ធ និងអ្នកជំនាញគោលនយោបាយការពារជាតិ Peter Singer បានថ្លែងប្រាប់គេហទំព័រព័ត៌មាន Vox ក្នុងខែកញ្ញា ឆ្នាំ 2022។

ការប្រើប្រាស់ និងសក្តានុពលរបស់ទំនិញពាណិជ្ជកម្ម

នៅក្នុងប្រទេសមីយ៉ាន់ម៉ា ហៅម្យ៉ាងទៀតថាប្រទេសភូមា ក្រុមប្រឆាំងមួយបានកែប្រែយន្តហោះដ្រូននៃទំនិញពាណិជ្ជកម្ម ដើម្បីទប់ទល់នឹងរបបយោធា ដែលបានដណ្តើមអំណាចនៅក្នុងរដ្ឋប្រហារខែកុម្ភៈ ឆ្នាំ 2021។ «យើងបានចាប់ផ្តើមពីយន្តហោះដ្រូន F11 ដ៏សាមញ្ញ ដែលមិនធ្វើដំណើរបានឆ្ងាយ» នេះបើយោងតាមក្រុមប្រយុទ្ធប្រឆំាងបានថ្លែងប្រាប់ទស្សនាវដ្តី The Diplomat ក្នុងខែកុម្ភៈ ឆ្នាំ 2022។ «ប៉ុន្តែតាមរយៈការអនុវត្ត និងកែប្រែម៉ូដែលផ្សេងទៀតពីហាងលក់ប្រដាប់ក្មេងលេងបែបកម្សាន្ត យើងកាន់តែមានជំនាញក្នុងការចាត់ចែងលើវា»។

សារព័ត៌មាន The Diplomat បានរាយការណ៍ថា ទន្ទឹមនឹងនោះ រដ្ឋាភិបាលយោធាបានប្រើប្រាស់យន្តហោះគ្មានមនុស្សបើករបស់យោធាសម្រាប់ការឃ្លាំមើល ដើម្បីបំបែកការតវ៉ា និងដើម្បីកំណត់គោលដៅគូប្រជែងដោយកាំជ្រួចដឹកនាំដោយឡាស៊ែរ។

ទស្សនាវដ្តី Breaking Defense បានរាយការណ៍កាលពីខែធ្នូ ឆ្នាំ 2022 ថា កងកម្លាំងការពារជាតិនូវែលសេឡង់កំពុងពង្រឹងប្រព័ន្ធទំនាក់ទំនងរបស់ខ្លួនជាមួយនឹងបច្ចេកវិទ្យា និងឧបករណ៍ទំនិញពាណិជ្ជកម្ម។ ទស្សនាវដ្តីនេះបានរាយការណ៍ថា៖ «ការទិញដំណោះស្រាយទំនិញពាណិជ្ជកម្មមានន័យថា

នូវែលសេឡង់នឹងដំណើរការជាអ្នកដើរតាមយ៉ាងឆាប់រហ័សជំនួសឱ្យ

ការនាំមុខជាមួយនឹងការអភិវឌ្ឍប្រព័ន្ធដែលមានតម្លៃថ្លៃ»។

ជប៉ុនបានបញ្ជូនយន្តហោះដ្រូនលក្ខណៈទំនិញពាណិជ្ជកម្មបំពាក់កាមេរ៉ា រួមជាមួយនឹងរបាំងការពារ និងសម្លៀកបំពាក់ដែលចេញដោយយោធាទៅកាន់ប្រទេសអ៊ុយក្រែន នេះបើតាមសេចក្ដីរាយការរបស់សារ Kyodo News កាលពីខែមេសាឆ្នាំ 2022។ ទីភ្នាក់ងារសារព័ត៌មានបានលើកឡើងថា ក្រសួងការពារជាតិជប៉ុនមិនចាត់ថ្នាក់យន្តហោះដ្រូនជាឧបករណ៍យោធានោះទេ។

លោកឧត្តមសេនីយ៍ឯក Simon Stuart កងទ័ពអូស្ត្រាលីបានបង្ហាញពីភាពច្នៃប្រឌិតនៅក្នុងសុន្ទរកថាចាប់ផ្ដើមរបស់គាត់នៅឯសន្និសីទអគ្គមេបញ្ជាការកងទ័ពជើងគោកនៅទីក្រុង Adelaide ក្នុងខែសីហា ឆ្នាំ 2022។ លោកបានបន្តទៀតថា កងទ័ពគឺជាអ្នកប្រើប្រាស់ដ៏ធំបំផុតនៃប្រព័ន្ធអាកាសនៅក្នុងប្រទេសអូស្ត្រាលី ជាមួយនឹងយន្តហោះពហុមុខងារលក្ខណៈទំនិញពាណិជ្ជកម្ម ច្រើនជាង 400 នៅក្នុងឃ្លាំងអាវុធរបស់ខ្លួន។ កងកម្លាំងប្រដាប់អាវុធនៅក្នុងប្រទេសឥណ្ឌូណេស៊ី ហ្វ៊ីលីពីន សិង្ហបុរី កូរ៉េខាងត្បូង ថៃ និងវៀតណាម ក៏ប្រើប្រាស់ផលិតផល និងបច្ចេកវិទ្យាទំនិញពាណិជ្ជកម្មផងដែរ។

ឧបករណ៍ទំនិញពាណិជ្ជកម្មមិនមានប្រសិទ្ធភាពសម្រាប់ប្រតិបត្តិការយោធាទាំងអស់។ ជាឧទាហរណ៍ យន្តហោះគ្មានមនុស្សបើក ដែលអាចធ្វើពាណិជ្ជកម្មបានតិចតួច ដែលគ្របដណ្តប់លើចម្ងាយផ្លូវទឹកដ៏ធំល្វឹងល្វើយដែលរីករាលដាលនៅក្នុងតំបន់ឥណ្ឌូប៉ាស៊ីហ្វិក។ លោក Cancian ប្រចាំនៅមជ្ឈមណ្ឌលសិក្សាយុទ្ធសាស្ត្រ និងអន្តរជាតិ បានលើកឡើងថា ឧបករណ៍នឹងមានប្រយោជន៍ជាងនៅក្នុងសេណារីយ៉ូរយៈពេលខ្លីមធ្យម។ តៃវ៉ាន់អាចប្រើប្រាស់យន្តហោះដ្រូនលក្ខណៈទំនិញពាណិជ្ជកម្ម និងឧបករណ៍ផ្សេងទៀតដើម្បីទប់ស្កាត់ការឈ្លានពាន ហើយ

ហ្វ៊ីលីពីនអាចដាក់ពង្រាយឧបករណ៍ដែលផលិតលក្ខណៈពាណិជ្ជកម្ម

ដើម្បីការពារប្រជំុកោះសមុទ្រចិនខាងត្បូងរបស់ខ្លួន។

អត្ថប្រយោជន៍របស់ទំនិញពាណិជ្ជកម្ម

 លោក Mike Monnik ដែលជានាយកប្រតិបត្តិនៃ DroneSec ជាក្រុមហ៊ុនសន្តិសុខតាមប្រព័ន្ធអ៊ីនធឺណិតដែលមានមូលដ្ឋាននៅទីក្រុង Melbourne ប្រទេសអូស្ត្រាលី កំណត់ឧបករណ៍ទំនិញពាណិជ្ជកម្មតាមវិធីនេះ៖ «ខ្ញុំគួរតែអាចដើរចូលទៅក្នុងហាងមួយហើយទិញវា»។ DroneSec មានបណ្តាញផែនទីសកល និងសុសវែរផ្សេងទៀតដែលត្រូវបានរចនាឡើងដើម្បីការពារយន្តហោះគ្មានមនុស្សបើកមិនមែនសត្រូវ និងការពារប្រឆាំងនឹងយន្តហោះដ្រូនដែលមានគំនិតអាក្រក់។ លោក Monnik បានមានប្រសាសន៍ថា បច្ចេកវិទ្យាដែលប្រើក្នុងយន្តហោះដ្រូនរបស់យោធា និងសន្តិសុខជាច្រើនត្រូវបានបង្កើតឡើងសម្រាប់គោលបំណងកម្សាន្ត និងពាណិជ្ជកម្ម។

មជ្ឈមណ្ឌលគោលនយោបាយសាធារណៈ និងសហគ្រាសឯកជន (CPPPE) របស់សាកលវិទ្យាល័យ Maryland កំណត់ឧបករណ៍ទំនិញពាណិជ្ជកម្មថាជា «សុសវែរ ឬហាដវែរដែលបង្កើតឡើងជាលក្ខណៈពាណិជ្ជកម្ម និងមានសម្រាប់លក់ ជួល ឬផ្តល់សិទិ្ធដល់សាធារណជនទូទៅ ហើយដែលទាមទារការកែប្រែពីរដ្ឋាភិបាលតិចតួច ឬមិនមែនមានតែមួយគត់ដើម្បីបំពេញតាមតម្រូវការរបស់ទីភ្នាក់ងារផ្គត់ផ្គង់។ ដោយសារតែលទ្ធភាពមានផ្ដល់ជូនយ៉ាងឆាប់រហ័ស ការចំណាយទាប និងហានិភ័យទាប ផលិតផលទំនិញពាណិជ្ជកម្មនេះ ត្រូវបានចាត់ទុកថាជាជម្រើសជំនួសសម្រាប់ការអភិវឌ្ឍដែលផ្តល់មូលនិធិដោយរដ្ឋាភិបាលនៅក្នុងប្រទេស»។

មជ្ឈមណ្ឌលគោលនយោបាយសាធារណៈ និងសហគ្រាសឯកជន បានលើកឡើងនៅក្នុងកាសែតកាលពីខែកញ្ញា ឆ្នាំ 2008 ដែលជាការអះអាងដែលនៅតែជាការពិតជាច្រើនឆ្នាំក្រោយថា បច្ចេកវិទ្យាផ្លាស់ប្តូរយ៉ាងឆាប់រហ័ស ហើយយោធាត្រូវតែយល់ថា ពួកគេលែងមានសិទ្ធិផ្តាច់មុខលើភាពរីកចម្រើនក្នុងឧបករណ៍សង្គ្រាមទៀតហើយ។ អ្នកស្រាវជ្រាវនៅសាកលវិទ្យាល័យ Maryland បានសរសេរថា៖ «នៅក្នុងករណីជាច្រើន ការអនុវត្តលើដំណោះស្រាយទំនិញពាណិជ្ជកម្មធ្វើការផ្លាស់ប្តូរយ៉ាងសំខាន់ចំពោះការងាររបស់ក្រុមអភិវឌ្ឍប្រព័ន្ធ (ទាំងរដ្ឋាភិបាល និងអ្នកម៉ៅការ) និងរបៀបដែលពួកគេធ្វើវា បណ្តាលឱ្យមានភាពធន់នឹងធម្មជាតិ ចំពោះការទទួលយក និងការប្រើប្រាស់ទំនិញពាណិជ្ជកម្ម»។

លោក Cancian បានបន្តទៀតថា លក្ខណៈបោះចោលបាននៃឧបករណ៍ទំនិញពាណិជ្ជកម្មជាច្រើនមិនស្មើគ្នាជាមួយនឹងចំណូលចិត្តយោធាបែបចាស់សម្រាប់ឧបករណ៍ដែលមាំ និងត្រូវបានធ្វើតេស្តរយៈពេល ដែលអាចដំណើរការបានក្នុងស្ថានភាពប្រយុទ្ធនោះទេ។ លោកបានបន្តថា៖ «អ្នកអាចទិញវាបានច្រើន ហើយគិតថាវាជាវត្ថុប្រើប្រាស់ ហើយបោះចោលបានដែលអ្នកអាចប្រើបានម្តងឬពីរដង ហើយបោះចោលវាហើយ។ «ដូច្នេះ ឧបករណ៍ទាំងនេះមានភាពទាក់ទាញខ្លាំងសម្រាប់ក្រុមដែលមិនមានថវិកាច្រើន»។

ការកែសម្រួលឧបករណ៍មានលក់លើទីផ្សារសម្រាប់សមរភូមិអាចជួយឱ្យយោធាជៀសវាងនីតិវិធីលទ្ធកម្មដ៏ស្មុគស្មាញ ដែលអាចចំណាយពេលជាច្រើនឆ្នាំ និងអាចឱ្យពួកគេដោះស្រាយនូវការគំរាមកំហែងបានយ៉ាងឆាប់រហ័ស។ ផ្ទុយទៅវិញ អ្នកដែលមានចម្ងល់អំពីទំនិញពាណិជ្ជកម្ម ការត្រួតពិនិត្យយ៉ាងតឹងរឹងលើផលិតផលដែលផលិតសម្រាប់ការប្រើប្រាស់យោធា ធានាបាននូវការបំពេញតាមតម្រូវការដែលអាចអនុវត្តបាន និងការរំពឹងទុកអំពីប្រតិបត្តិការ។ លើសពីនេះទៅទៀត ឧបករណ៍ដែលបានបង្កើតឡើងតាមលក្ខណបច្ចេកទេសយោធាទំនងជានៅតែដំណើរការលើសពីការដាក់ពង្រាយដំបូងថែមទៀត។ ក៏មានការព្រួយបារម្ភផងដែរអំពីសុសវែរពាណិជ្ជកម្មបង្កហានិភ័យសន្តិសុខនៅពេលកែសម្រួលសម្រាប់ការប្រើប្រាស់យោធា។

ទោះបីជាមានការកក់ទុកបែបនេះក៏ដោយ ឧបករណ៍ទំនិញពាណិជ្ជកម្មដូចជាយន្តហោះគ្មានមនុស្សបើក និងទូរសព្ទដៃដែលមានសុវត្ថិភាពអាចប្រើសម្រាប់គោលបំណងយោធាជាមួយនឹងការកែប្រែបន្តិចបន្តួច។ បច្ចេកវិទ្យាផ្សេងទៀត ដូចជារូបភាពផ្កាយរណប និងឧបករណ៍អ៊ីនធឺណិត អាចធ្វើឱ្យឧបករណ៍យោធាប្រសើរឡើងបាន។

នៅក្នុងប្រទេសអ៊ុយក្រែន អ្នកចូលចិត្តយន្តហោះដ្រូនដែលធ្លាប់ថតរូបអាពាហ៍ពិពាហ៍ ស្រោចជីដំណាំ ឬប្រណាំងគ្នាលេងលក្ខណៈកីឡា ឥឡូវនេះប្រថុយជីវិតដើម្បីជួយប្រទេសរបស់ពួកគេក្នុងការវាយលុកពួកឈ្លានពានរុស្ស៊ី នេះបើយោងតាមសារព័ត៌មាន Associated Press បានរាយការណ៍ជាច្រើនសប្តាហ៍បន្ទាប់ពីការប្រយុទ្ធគ្នាបានចាប់ផ្តើមនៅចុងខែកុម្ភៈ ឆ្នាំ 2022។ ជនស៊ីវិលតាមដានក្បួនរថយន្តរបស់សត្រូវ និងបញ្ជូនព័ត៌មានទៅកាន់កងកម្លាំងអ៊ុយក្រែន។

Monnik បានថ្លែងប្រាប់ទស្សនាវដ្តី FORUM ថា គុណសម្បត្តិដ៏មានសក្តានុពលនៃឧបករណ៍ទំនិញពាណិជ្ជកម្មគឺជាយុទ្ធសាស្ត្រ និងខាងចិត្តសាស្រ្ត ដោយសំឡេងនៃការចំណាយសម្រាប់អាជីវកម្មដែលមានសមត្ថភាពដាក់កងទ័ពសត្រូវតែប៉ុណ្ណោះ។

ប្រភេទនៃឧបករណ៍ទំនិញពាណិជ្ជកម្ម

ផលិតផលទំនិញពាណិជ្ជកម្មក៏អាចត្រូវបានប្រើដើម្បីផ្តល់ជំនួយមនុស្សធម៌ បង្កើតបេសកកម្មដើម្បីជួយសង្គ្រោះ និងតាមដានរាល់សកម្មភាពខុសច្បាប់ ដូចជាការនេសាទខុសច្បាប់ ដែលមិនបានរាយការណ៍ និងមិនមានការគ្រប់គ្រង។ បន្ថែមពីលើយន្តហោះគ្មានមនុស្សបើក ឧបករណ៍ទំនិញពាណិជ្ជកម្មដែលប្រើជាទូទៅរួមមាន៖

• ដ្រូនរបស់កងទ័ពជើងទឹក ត្រូវបានគេស្គាល់ថាជានាវាគ្មានមនុស្សបើកពហុមុខងារ៖ ប្រទេសអ៊ុយក្រែន​បាន​បើក​ដំណើរការ​ទូក​ដែល​គ្មាន​មនុស្ស​បើក​ដើម្បី​ការពារ​កំពង់ផែ ទីក្រុង និង​ផ្លូវ​ដឹកជញ្ជូន​ពាណិជ្ជកម្ម។ នាវាដែលមានប្រវែង 5,5 ម៉ែត្រ ដែលស្រដៀងទៅនឹងទុកកាយ៉ាក់ពាសដែក ត្រូវបានប្រើសម្រាប់ការឃ្លាំមើល និងអាចបំពាក់ដោយគ្រឿងផ្ទុះ។ សមាសធាតុជាច្រើនរបស់នាវា រួមទាំងម៉ាស៊ីន Sea-Doo ត្រូវបានផលិតជាលក្ខណៈពាណិជ្ជកម្ម។ ប្រទេសអ៊ុយក្រែន​បាន​ចាប់ផ្តើម​កិច្ច​ខិត​ខំ​ប្រឹង​ប្រែង​ផ្តល់​ថវិកា​ដើម្បី​បង្កើត​កប៉ាល់កង​នាវា​។ កាសែត The Economist បានរាយការណ៍កាលពីខែធ្នូ ឆ្នាំ 2022 ថានាវានីមួយៗមានតម្លៃប្រហែល 250 000 ដុល្លារ ដែលជាផ្នែកមួយនៃថ្លៃមីស៊ីលប្រឆាំងនាវា។

• ឧបករណ៍អ៊ីនធឺណិត៖ កុំព្យូទ័រ ការបង្កើតគំរូនិម្មិត និងបច្ចេកវិទ្យាព័ត៌មានផ្សេងទៀតដែលបានលក់ជាលក្ខណៈពាណិជ្ជកម្មដែលអាចធ្វើឱ្យការហ្វឹកហ្វឺនមានភាពប្រសើរឡើង បើកការត្រួតពិនិត្យ និងបិទឧបករណ៍ទំនាក់ទំនងរបស់សត្រូវ។

• បច្ចេកវិទ្យា GPS និងរ៉ាដា៖ បច្ចេកវិទ្យាទាំងនេះអនុញ្ញាតឱ្យយោធាត្រួតពិនិត្យទីតាំង ការផ្លាស់ទី និងសមត្ថភាពរបស់សត្រូវ។

ផ្លាស់ទីឆ្ពោះទៅមុខ

ខណៈពេលដែលឧបករណ៍ទំនិញពាណិជ្ជកម្មនឹងមិនជំនួសទាំងស្រុងនូវផ្នែកហាដវែរបែបចាស់ទេនោះ ឧបករណ៍ទាំងនោះបានបង្ហាញថាមានប្រយោជន៍ជាឧបករណ៍បន្ថែមនៅក្នុងតំបន់ជាច្រើន។ ដោយមានភស្តុតាងអំពីប្រសិទ្ធភាពរបស់ឧបករណ៍ទាំងនោះ — នៅប្រទេសអ៊ុយក្រែន ភូមា និងកន្លែងផ្សេងទៀត បានជំរុញឱ្យយោធាមើលឃើញពីការប្រើប្រាស់ឧបករណ៍ទាំងនោះ។

ឧបករណ៍បែបនេះគឺស័ក្តិសមជាពិសេសទៅនឹងសង្គ្រាមដែលមិនស្របគ្នា ដែលកម្លាំងដែលមិនសូវមានបំពាក់គ្រឿងប្រដាប់អាចបំពេញបន្ថែមនូវទស្សនៈនៃសង្គ្រាមបែបចាស់ដោយប្រើឧបករណ៍ទំនិញពាណិជ្ជកម្ម ដើម្បីទទួលបានអត្ថប្រយោជន៍ពីភាពខ្វះខាតរបស់កម្លាំងធំជាង។

ទស្សនាវដ្ដី Military Embedded Systems បានរាយការណ៍នៅក្នុងខែមេសា ឆ្នាំ 2022 ថា៖ «អត្ថប្រយោជន៍ដ៏ធំបំផុតដែលបានកើតចេញពីការប្រើប្រាស់សមាសធាតុទំនិញពាណិជ្ជកម្ម គឺការចំណាយទាបជារួម ភាពអាចរកបានកាន់តែច្រើន និងការដឹកជញ្ជូនកាន់តែមានភាពលឿនជាងមុន»។ «បច្ចេកវិទ្យាដែលមិនមែនជាថ្នាក់យោធា តែងតែមានតម្លៃថោក ដោយមានជម្រើសអ្នកលក់កាន់តែច្រើន។ ប៉ុន្តែការសន្មតថាការចំណាយទាបដែលទាក់ទងនឹងសមាសធាតុទំនិញពាណិជ្ជកម្ម គឺមានគុណភាពទាបគឺមិនពិតទៀតទេ ដោយភាពជឿជាក់នៃសមាសធាតុ និងប្រព័ន្ធថ្នាក់ពាណិជ្ជកម្មមានការកើនឡើងយ៉ាងខ្លាំង»។  

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។