គម្រោងអនាគតឥឡូវនេះរបស់ទូវ៉ាលូរួមបញ្ចូលការបម្រុងទុកនិម្មិតសម្រាប់ប្រទេស

បុគ្គលិករបស់ទស្សនាវដ្តី FORUM

ទូវ៉ាលូមិនពេញចិត្តក្នុងការក្លាយជាប្រទេសឌីជីថលដំបូងគេរបស់ពិភពលោកទេ។ ប៉ុន្តែប្រសិនបើកិច្ចខិតខំប្រឹងប្រែងមិនអាចរក្សាសាធារណរដ្ឋប៉ាស៊ីហ្វិកខាងត្បូងឱ្យនៅពីលើនីវ៉ូទឹកសមុទ្របានទេ នោះពលរដ្ឋចំនួន 11 500 នាក់ចង់ឱ្យកោះរបស់ពួកគេមាននៅក្នុងមេតាវើស (metaverse) ជាជាងមិនមានទាំងអស់។

ប្រទេសដែលស្ថិតនៅពាក់កណ្តាលផ្លូវរវាងអូស្ត្រាលី និងកោះហាវ៉ៃ បានបង្ហាញផលលំបាកប្រឆាំងនឹងការឡើងកម្ដៅផែនដីក្នុងសន្និសីទអាកាសធាតុរបស់អង្គការសហប្រជាជាតិក្នុងខែវិច្ឆិកា ឆ្នាំ 2021។ នៅក្នុងវីដេអូមួយ ដែលលោក Simon Kofe ដែលជារដ្ឋមន្ត្រីការបរទេសរបស់ប្រទេសទូវ៉ាលូបានឈរនៅពីក្រោយវេទិកាមួយ ដោយពាក់ឈុតអាជីវកម្ម ដោយលុតជង្គង់ក្នុងទឹក ជាមួយនឹងកោះមួយនៅពីក្រោយគាត់។

លោក Kofe បាន​ថ្លែងថា​៖ «​យើង​កំពុង​លិចក្នុងទឹក ប៉ុន្តែ​អ្នក​ដទៃ​ក៏​ដូច​គ្នា​ដែរ» ​ដោយ​អំពាវនាវ​ឱ្យ​មាន​ចំណាត់ការ​អន្តរជាតិ​ដើម្បី​កាត់​បន្ថយ​ការ​ប្រែប្រួល​អាកាសធាតុ​។

អង្គការសហប្រជាជាតិបានរាយការណ៍នៅឆ្នាំ 2022 ថា ប្រទេសដែលមានការអភិវឌ្ឍតិចតួចបំផុតក្នុងពិភពលោកបានរួមចំណែកតិចតួចដល់បម្រែបម្រួលអាកាសធាតុដែលបណ្តាលមកពីការបំភាយឥន្ធនៈផូស៊ីល។ ប៉ុន្តែប្រទេសជាច្រើន «ស្ថិតនៅជួរមុខនៃវិបត្តិអាកាសធាតុ»។

វីដេអូរបស់ទូវ៉ាលូពីលោក Kofe ទាក់ទាញអ្នកទស្សនារាប់លាន ប៉ុន្តែប្រទេសតូចបំផុតទីបួនរបស់ពិភពលោកមួយនេះទើបតែចាប់ផ្តើម។ យុទ្ធនាការ​មួយ​បាន​ធ្វើ​ឡើង​ដើម្បី​ដោះស្រាយ​ការ​កើនឡើង​នៃ​នីវ៉ូទឹកសមុទ្រ​ដែល​គំរាមកំហែង​ដល់​ប្រជុំ​កោះ​ផ្កាថ្ម​ចំនួនចំនួនប្រាំបួនដែលលាតសន្ធឹងលើផ្ទៃដី 26 គីឡូម៉ែត្រការ៉េ។ ក្រសួងយុត្តិធម៌ ទំនាក់ទំនង និងកិច្ចការបរទេស បានចាប់ផ្តើមគម្រោងអនាគតឥឡូវនេះ ដែលស្នើឱ្យប្រទេសនានាកាត់បន្ថយការដុតផូស៊ីលឥន្ធនៈ ក្នុងគោលបំណងធានាឱ្យទូវ៉ាលូរក្សាបាននូវភាពជារដ្ឋ និងព្រំដែនសមុទ្ររបស់ខ្លួន ទោះបីជាកោះនេះលិចនៅក្រោមនីវ៉ូទឹកសមុទ្រក៏ដោយ ដើម្បីបង្កើត «ប្រជាជាតិឌីជីថល» ដែលឆ្លុះបញ្ចាំងពីអភិបាលកិច្ច ប្រវត្តិសាស្ត្រ វប្បធម៌ និងគុណតម្លៃរបស់ទូវ៉ាលូ។ និងលើកទឹកចិត្តដល់ការតស៊ូមតិអន្តរជាតិប្រឆាំងនឹងការកើនឡើងកម្រិតទឹកសមុទ្រ។

គំនិត​ស្ដីពីការ​កសាង​ប្រជាជាតិ​ទាំងមូល​ឡើង​វិញ​ដោយ​ប្រើ​បច្ចេកវិទ្យា AR និង VR ​គឺ​មាន​លក្ខណៈពិសេសប្លែកពីគេ។ ជាឧទាហរណ៍ ប្រទេស និងទីក្រុងផ្សេងទៀត ដូចជា ប្រទេសបាបាដុស ទីក្រុងសេអ៊ូល និងប្រទេសសិង្ហបុរី — កំពុងដាក់សេវាកម្មរដ្ឋបាលនៅក្នុងមេតាវើស (metaverse)។ ទូវ៉ាលូនឹងចម្លងមុខងាររដ្ឋាភិបាល ប៉ុន្តែក៏បរិយាយអំពីភូមិសាស្ត្រ ប្រពៃណី និងទីតាំងសំខាន់ៗរបស់កោះទាំងនោះផងដែរ។ លោក Kofe បានណែនាំគោលគំនិតនេះទៅឱ្យមេដឹកនាំពិភពលោកកាលពីខែវិច្ឆិកា ឆ្នាំ 2022 តាមរយៈវីដេអូផងដែរ ដោយលើកឡើងថាវត្តមានឌីជីថលអាចអនុញ្ញាតឱ្យប្រទេសជាតិបន្តដំណើរការទោះបីជាបាត់បង់ដីធ្លីក៏ដោយ។

លោកបានបង្ហោះនៅលើប្រព័ន្ធផ្សព្វផ្សាយសង្គមថា៖ «ក្តីសង្ឃឹមរបស់យើងគឺថា យើងមានប្រជាជាតិឌីជីថលដែលមានវត្តមានជាប់នឹងទឹកដីរូបវន្តរបស់យើង ប៉ុន្តែក្នុងករណីដែលយើងបាត់បង់ទឹកដីរូបវន្តរបស់យើង យើងនឹងមានប្រជាជាតិឌីជីថលដែលដំណើរការបានល្អ»។

ប្រទេសទូវ៉ាលូបានចាប់ផ្តើមដោយបង្កើត «ឌីជីថលភ្លោះ» នៃកោះតូចមួយនៅ Te Afualiku។

ទូវ៉ាលូមានកម្ពស់ប្រហែល 2 ម៉ែត្រពីលើនីវ៉ូទឹកសមុទ្រ ហើយមហាសមុទ្រជុំវិញកំពុងកើនឡើង 1,5 ដងលឿនជាងកម្រិតមធ្យមភាគទូទាំងពិភពលោក នេះបើតាមក្រុមនៅលើផ្នែកផ្លាស់ប្តូរកម្រិតទឹកសមុទ្ររបស់អង្គការ NASA បានរាយការណ៍កាលពីខែសីហា ឆ្នាំ 2023។ ជំនោរទឹកខ្ពស់ត្រូវបានគេព្យាករថានឹងគ្របដណ្តប់លើផ្ទៃកោះរបស់ប្រទេសជាតិ និងហេដ្ឋារចនាសម្ព័ន្ធសំខាន់ៗនៅឆ្នាំ 2050។ តាមការប៉ាន់ប្រមាណមួយចំនួនបានឱ្យដឹងថា ជំនោរទឹកខ្ពស់អាចជន់លិចកោះចំនួន 95% នៅឆ្នាំ 2100 ដែលធ្វើឱ្យពួកគេមិនអាចរស់នៅបានទេ នេះបើយោងតាមកាសែត The Guardian បានរាយការណ៍នៅក្នុងខែមិថុនា ឆ្នាំ 2023។

ជំនោរទឹកខ្ពស់បានជន់លិចផ្ទះសម្បែង និងអគារផ្សេងៗទៀត ហើយទឹកប្រៃបានចូលបំផ្លាញដំណាំ និងអណ្តូង។ សារព័ត៍មាន CNN រាយការណ៍​ថា ទឹក​សមុទ្រ​ធ្វើឱ្យ​មានការប្រែ​ពណ៌​ផ្កាថ្ម និង​បង្ក​គ្រោះថ្នាក់​ដល់​ការ​នេសាទ។ ពលរដ្ឋមួយចំនួនបានផ្លាស់ទីលំនៅទៅប្រទេសនូវែលសេឡង់ និងកន្លែងផ្សេងទៀតសម្រាប់ការទទួលបានដីខ្ពស់ជាងនេះ។

លោក Ben Hamlington ដែលដឹកនាំក្រុមការងារផ្នែកផ្លាស់ប្តូរកម្រិតសមុទ្របានលើកឡើងនៅក្នុងរបាយការណ៍ថា៖ «យើងអាចមើលឃើញពីទិន្នន័យរួចហើយថាភាពប្រែប្រួលនៃមហាសមុទ្រខ្នាតតូច ព្យុះ ជំនោរខ្ពស់ និងការកើនឡើងនៃកម្រិតទឹកសមុទ្រ គឺត្រូវបាន​រួមបញ្ចូលគ្នាទាំងអស់ ដើម្បីបង្កឱ្យមានទឹកជំនន់នៅក្នុងប្រទេសទូវ៉ាលូ»។

រដ្ឋាភិបាលបានលើកឡើងថា គម្រោងអនាគតក្នុងពេលឥឡូវនេះ (Future Now Project) «ខិតខំរៀបចំថ្ងៃនេះ ដើម្បីធានាអនាគតរបស់ប្រទេសជាតិ ក្រោមសេណារីយ៉ូណាមួយសម្រាប់ថ្ងៃស្អែកកាន់តែល្អប្រសើរ»។

ប្រទេសទូវ៉ាលូក៏មានគម្រោងស្តារដីធ្លីឡើងវិញ ហើយនឹងបន្តអំពាវនាវឱ្យមានការឯកភាពជាអន្តរជាតិលើបញ្ហាបម្រែបម្រួលអាកាសធាតុ។ អ្នកស្រុកម្នាក់ដែលមានឈ្មោះថា Lily Teafa អាយុ 28 ឆ្នាំបានប្រាប់កាសែត The Guardian ថា៖ «វា​ជា​អារម្មណ៍ដ៏​អាក្រក់​បំផុតដែល​មិន​ធ្លាប់​មាន អាក្រក់ជាងការខ្លាច​ទីខ្ពស់ ខ្លាចភាពងងឹតទៅទៀត»។ «ឥឡូវនេះយើងខ្លាចអនាគត»។

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។