កម្លាំងដែល កកើតឡើងវិញត

នៅយប់ថ្ងៃទី 21 ខែវិច្ឆិកា ឆ្នាំ 1918 រយៈពេល 10 ថ្ងៃក្រោយពីការចុះហត្ថលេខាលើកិច្ចព្រមព្រៀងបទឈប់បាញ់ដែលបានបញ្ចប់សង្គ្រាមលោកលើកទី I សមាជិកគណៈរដ្ឋមន្ត្រីនៃសង្គ្រាមអង់គ្លេសលោក George Curzon បានធ្វើជាអធិបតីក្នុងពិធីទទួលទានអាហារពេលល្ងាចមួយ ដើម្បីទទួលសន្និសិទប្រេងអន្តរសម្ព័ន្ធ។ ក្នុងការអបអរសាទរគណៈប្រតិភូដែលបានប្រមូលផ្តុំនៅទីក្រុងឡុងដ៍ Curzon បានប្រកាសថាសម្ព័ន្ធមិត្តបាន «អណ្តែតឆ្ពោះទៅរកជ័យជម្នះលើរលកនៃប្រេង» ដោយសារតែក្រុមរថយន្តដឹកទំនិញដ៏ធំរបស់ពួកគេ។ ប្រតិភូបារាំង លោក Henry Berenger បានកត់សម្គាល់ថា អាល្លឺម៉ង់រំពឹងថានឹងឈ្នះដោយសារតែស្រទាប់ធ្យូងថ្មដ៏សំខាន់របស់ខ្លួន ប៉ុន្តែសម្ព័ន្ធមិត្តបានយកឈ្នះតាមរយៈប្រេង។ លោក​បាន​ថ្លែងថា វា​ជា​ជ័យ​ជម្នះ​របស់​រថយន្ត​លើ​ផ្លូវ​ដែក។

ជាងមួយសតវត្សរ៍បន្ទាប់ពីជម្លោះជាសកលបានឈានទៅដល់យុគសម័យនៃភូមិសាស្ត្រនយោបាយដែលស្រេកឃ្លានប្រេង យោធា និងទីភ្នាក់ងារការពារជាតិនៅទូទាំងតំបន់ឥណ្ឌូប៉ាស៊ីហ្វិក គឺជាចំណុចឈានមុខគេនៃការកើនឡើងភាពជឿ​នលឿនផ្នែកវិទ្យាសាស្ត្រ និងវិស្វកម្ម ដែលធានាថានឹងបង្ហាញនូវយុគសម័យថ្មីមួយ។ ពីមូលដ្ឋានដែលដំណើរការដោយថាមពលកម្ដៅក្នុងផែនដី និងរថយន្តអគ្គិសនីគ្មានការបំភាយឧស្ម័នទៅជាឥន្ធនៈយន្តហោះដែលផលិតចេញពីជីវម៉ាសដូចជាផ្កាថ្ម ដំណាំ និងកាកសំណល់តាមផ្ទះ កងកម្លាំងប្រដាប់អាវុធកំពុងពន្លឿនការផ្លាស់ប្តូររបស់ពួកគេទៅថាមពលកកើតឡើងវិញ។ ការវិវត្តនេះមានគោលបំណងពង្រឹងប្រតិបត្តិការក្នុងសម័យសន្តិភាព និងសង្រ្គាម ខណៈពេលដែលកំពុងកាត់បន្ថយឧស្ម័នផ្ទះកញ្ចក់ដែលបង្កគ្រោះថ្នាក់។ ការបញ្ចូលគ្នានៃកត្តានានាកំពុងជំរុញភាពច្នៃប្រឌិត៖ អាណត្តិស៊ីវិល និងយោធា ដើម្បីកាត់បន្ថយផលប៉ះពាល់អាកាសធាតុ និងបង្កើតភាពធន់ ការថយចុះការបម្រុងនៃឥន្ធនៈហ្វូស៊ីល ភាពតានតឹងលើការផ្គត់ផ្គង់ប្រេង និងឧស្ម័នដែលបង្កឡើងដោយវិបត្តិដូចជាសង្រ្គាមនៅអ៊ុយក្រែន និងការវិវឌ្ឍបច្ចេកវិទ្យាដែលមិនបំពុលដល់បរិស្ថាន ដើម្បីរៀបចំ និងការពារកងទ័ពឱ្យកាន់តែប្រសើរឡើង។

«ប្រព័ន្ធថាមពលសកលកំពុងឆ្លងកាត់ការផ្លាស់ប្តូរយ៉ាងឆាប់រហ័ស និងយូរអង្វែង តាមរយៈផលប៉ះពាល់ដែលមិនអាចជៀសរួចសម្រាប់យោធា» នេះបើយោងតាមវរសេនីយ៍ទោនៃកងទ័ពអាកាសរអូស្ត្រាលី (RAAF) លោក Ulas Yildirim ដែលពេលនោះកំពុងធ្វើទស្សនកិច្ចនៅវិទ្យាស្ថានគោលនយោបាយយុទ្ធសាស្ត្រអូស្ត្រាលី (ASPI) បានរៀបរាប់នៅក្នុងរបាយការណ៍ខែមិថុនាឆ្នាំ 2022 ស្ថាប័នស្រាវជ្រាវ។ «ការពឹងផ្អែករបស់អូស្ត្រាលីលើការនាំចូលសម្រាប់សន្តិសុខឥន្ធនៈរាវធ្វើឱ្យ ADF [កងកម្លាំងការពារជាតិអូស្ត្រាលី] ប្រឈមនឹងហានិភ័យ។ ហានិភ័យមិនថាតើកងកម្លាំងការពារជាតិអូស្រ្តាលី អាចទៅដល់តំបន់ប្រតិបត្តិការ និងដំណើរការមិនបានល្អនោះទេ ប៉ុន្តែថាតើកងកម្លាំងអាចទៅដល់ទីនោះបានដែរឬទេ។ … នៅក្នុងបរិបទនេះ ការផ្លាស់ប្តូររបស់កងកម្លាំងការពារជាតិអូស្រ្តាលីទៅកាន់ប្រភពដែលអាចកើតឡើងវិញ មិនមែនជាជម្រើសកម្រិតសូន្យ ដែលបណ្ដាលឱ្យសមត្ថភាពប្រតិបត្តិការត្រូវបានបំផ្លាញ ឬបន្ទាបបន្ថោកនោះទេ។ ការផ្លាស់ប្តូរយ៉ាងឆាប់រហ័សទៅភាពកកើតឡើងវិញនឹងធ្វើឱ្យកងកម្លាំងការពារជាតិអូស្ត្រាលីកាន់តែមានប្រសិទ្ធភាពក្នុងការធ្វើអ្វីដែលរដ្ឋាភិបាលអូស្ត្រាលីណែនាំ និងទាមទារនៅក្នុងពិភពលោក ព្រមទាំងតំបន់ដែលមានគ្រោះថ្នាក់និងបែងចែកកាន់តែច្រើនដែលយើងកំពុងជួបប្រទះ»។

ការបង្កើនប្រសិទ្ធភាពប្រតិបត្តិការក៏ជាចំណុចស្នូលនៃផែនការសកម្មភាពនៃអាកាសធាតុរបស់នាយកដ្ឋានកងទ័ពអាកាសអាមេរិក ដែលបានចេញផ្សាយនៅក្នុងខែតុលា ឆ្នាំ 2022។ ទីភ្នាក់ងារនេះបានបញ្ជាក់ថា៖ «គោលដៅរួមរបស់យើង គឺដើម្បីផ្តល់ថាមពលប្រយុទ្ធបន្ថែមទៀតដល់អ្នកប្រយុទ្ធដោយប្រើប្រេងតិចតួច»។

ការបង្កើតភាពជោគជ័យ

នៅឯឃ្លាំងផ្ទុកយន្តហោះរបស់ខ្លួននៅឯមូលដ្ឋានទ័ពអាកាស Changi កងកម្លាំងប្រដាប់អាវុធសិង្ហបុរី (SAF) កំពុងធ្វើលើសពីការកាត់បន្ថយការប្រើប្រាស់ប្រេងឥន្ធនៈ — វាក៏កំពុងតែបង្កើតថាមពលកកើតឡើងវិញបានគ្រប់គ្រាន់ផងដែរ ដើម្បីផ្តល់ថាមពលដល់ផ្នែកផ្សេងទៀតនៃមូលដ្ឋានទ័ពនេះ។ ផ្ទាំងសូឡា ខ្យល់ធម្មជាតិ ដំបូលប្រក់ស្មៅ និងសម្ភារសំណង់ដែលមិនប៉ះពាល់ដល់បរិស្ថានរបស់រោងចក្រនេះ រក្សាថាមពលអគ្គិសនី ខណៈដែលទឹកភ្លៀងត្រូវបានប្រមូលសម្រាប់ប្រព័ន្ធធារាសាស្រ្ត និងការប្រើប្រាស់ដែលមិនមែនសម្រាប់ពិសារផ្សេងទៀត។ «ថាមពលពន្លឺព្រះអាទិត្យនៅតែជាប្រភពថាមពលកកើតឡើងវិញដ៏ជោគជ័យបំផុតសម្រាប់ប្រទេសសិង្ហបុរី ហើយយើងបានចាប់ផ្តើមការដំឡើងផ្ទាំងសូឡានៅលើដំបូលដែលសមរម្យនៅក្នុងជុំរុំ និងមូលដ្ឋានទ័ព ដោយបង្កើតថាមពលអគ្គិសនីបានប្រហែល 20 MWp [មេហ្គាវ៉ាត់-កម្រិតខ្ពស់បំផុត]» នេះបើយោងតាមលោកឧត្តមសេនីយ៍ត្រី Frederick Choo មន្ត្រីប្រធានផ្នែកនិរន្តរភាពនៃកងកម្លាំងប្រដាប់អាវុធសិង្ហបុរី និងក្រសួងការពារជាតិសិង្ហបុរី (MINDEF) បានថ្លែងប្រាប់ទស្សនាវដ្ដី FORUM។

លោក Choo បានមានប្រសាសន៍ថា៖ «ត្រឹមឆ្នាំ 2025 ជុំរុំយោធាដែលនៅសល់ទាំងអស់នឹងមានផ្ទាំងដែលបានដំឡើងនៅលើដំបូលដែលសមរម្យ ដែលអាចបង្កើតថាមពលអគ្គីសនីសរុបប្រហែលជា 50 MWp» ដែលវាគ្រប់គ្រាន់សម្រាប់ផ្តល់ថាមពលដល់គ្រួសារជាង 12 500 គ្រួសារក្នុងមួយឆ្នាំ។ «ដើម្បីបង្កើនការទទួលបានថាមពលព្រះអាទិត្យជាអតិបរមា យើងក៏កំពុងធ្វើការជាមួយភ្នាក់ងារជាតិដើម្បីរុករកផ្ទាំងសូឡាអណ្តែតលើអាងស្តុកទឹកដែលមានទីតាំងនៅក្នុងដីនៃក្រសួងការពារជាតិសិង្ហបុរី»។

ប្រទេសសិង្ហបុរីផលិតអគ្គិសនីរបស់ខ្លួនប្រហែលជា 96% ពីការនាំចូលឧស្ម័នធម្មជាតិ ដែលបង្ហូរចូលមកតាមបំពង់ពីប្រទេសឥណ្ឌូណេស៊ី និងម៉ាឡេស៊ី និងក្នុងទម្រង់រាវពីទីដ៏ឆ្ងាយដូចជាអាហ្វ្រិក អូស្ត្រាលី និងអាមេរិកខាងជើង។ យោងតាមអាជ្ញាធរទីផ្សារថាមពលរបស់រដ្ឋាភិបាលបានឱ្យដឹងថា ជាមួយនឹងផ្ទៃដីទំហំ 720 គីឡូម៉ែត្រការ៉េ បុរីរដ្ឋដែលមានប្រជាជនចំនួន 5,6 លាននាក់ត្រូវបានរឹតបន្តឹងនៅក្នុងចំនួនថាមពលកកើតឡើងវិញដែលវាអាចផលិតបានពីប្រភពដូចជាថាមពលព្រះអាទិត្យ។ នៅចុងឆ្នាំ 2021 មន្ត្រីបានប្រកាសពីផែនការនាំចូលអគ្គិសនីប្រហែលមួយភាគបីនៃប្រទេសសិង្ហបុរីពីប្រភពកាបូនទាបដែលអាចកកើតឡើងវិញបាន ដូចជារោងចក្រថាមពលខ្យល់ និងវារីអគ្គីសនីត្រឹមឆ្នាំ 2035។

លោក Choo បានលើកឡើងថា គំនិតផ្តួចផ្តើមថាមពលកកើតឡើងវិញរបស់កងកម្លាំងប្រដាប់អាវុធសិង្ហបុរី និងក្រសួងការពារជាតិសិង្ហបុរី ស្របតាមផែនការបៃតងសិង្ហបុរីឆ្នាំ 2030 «ចលនារបស់ប្រទេសទាំងមូលបានចាប់ផ្តើមនៅក្នុងខែកុម្ភៈ ឆ្នាំ 2021 ដើម្បីកំណត់គោលដៅជាក់ស្តែងក្នុងរយៈពេល 10 ឆ្នាំខាងមុខ ដើម្បីជំរុញរបៀបវារៈជាតិរបស់សិង្ហបុរីស្តីពីការអភិវឌ្ឍប្រកបដោយចីរភាព»។ យោធាស្វែងរកភាពចេញមុខជាងគេនៃកិច្ចខិតខំប្រឹងប្រែងទាំងនោះ ជាមួយនឹងផែនការដើម្បីជំនួសកងនាវារដ្ឋបាលរបស់ខ្លួនជាមួយនឹងរថយន្តអគ្គិសនី (EV) ត្រឹមឆ្នាំ 2030។ យោធាក៏កំពុងតែសហការជាមួយទីភ្នាក់ងារវិទ្យាសាស្ត្រ និងបច្ចេកវិទ្យាការពារជាតិ និងទីភ្នាក់ងារបរិស្ថានជាតិ ដើម្បីបង្កើតថាមពល ដោយប្រើជីវឧស្ម័នដែលផលិតចេញពីកាកសំណល់អាហារ ខណៈដែលកងកម្លាំងទ័ពអាកាសសិង្ហបុរីគ្រោងនឹងចាប់ផ្តើមការសាកល្បងប្រើប្រាស់ឥន្ធនៈអាកាសចរណ៍បៃតងនៅក្នុងយន្តហោះចម្បាំងប្រភេទ F-16 មួយចំនួនរបស់ខ្លួន។

រដ្ឋមន្ត្រីក្រសួងការពារជាតិសិង្ហបុរី លោកបណ្ឌិត Ng Eng Hen បានប្រាប់សភាកាលពីខែមីនា ឆ្នាំ 2020 នៅឯការតាំងបង្ហាញរបស់ឃ្លាំងផ្ទុកយន្តហោះ Changi ដោយលើកឡើងពីការស្រាវជ្រាវរបស់កងទ័ពជើងទឹកសិង្ហបុរីលើប្រព័ន្ធជំរុញកូនកាត់ដែលមានប្រសិទ្ធភាពថាមពល ដើម្បីបង្កើនភាពធន់។

ចំណុចស្នូលនៃថាមពល

ការបោះជំហានប្រកបដោយនិរន្តរភាពរបស់សិង្ហបុរីគឺជាភស្តុតាងនៃនិន្នាការរីកចម្រើនទូទាំងតំបន់។ ទស្សនាវដ្ដី Defense News បានរាយការណ៍នៅក្នុងខែសីហា ឆ្នាំ 2021 ថា៖ «យោធានៃបណ្ដាប្រទេសអាស៊ីមួយចំនួនកំពុងត្រៀមលក្ខណៈសម្រាប់គំរូថាមពលថ្មីចំពេលមានក្ដីបារម្ភយ៉ាងសម្បើមអំពីសន្តិសុខ បម្រែបម្រួលអាកាសធាតុ និងការលេចឡើងនៃជម្រើសធនធានកកើតឡើងវិញ ដែលជំរុញឱ្យមានការផ្លាស់ប្តូរប្រតិបត្តិការ»។ សម្រាប់ឧស្សាហកម្មធុនធ្ងន់ដូចជាប្រទេសជប៉ុន និងកូរ៉េខាងត្បូង ដែលពឹងផ្អែកលើការនាំចូលឥន្ធនៈហ្វូស៊ីល «តម្រូវការផ្នែកសន្តិសុខថាមពលគឺកាន់តែមានសម្ពាធសម្រាប់យោធារបស់ពួកគេ ដោយសារកិច្ចការសន្តិសុខជាតិដ៏ស្មុគស្មាញដែលរួមមានការទប់ស្កាត់ការឈ្លានពានរបស់ចិន ការរៀបចំសម្រាប់លក្ខណៈដែលមិនអាចទាយទុកជាមុនបានពីកូរ៉េខាងជើងដែលប្រដាប់ដោយអាវុធនុយក្លេអ៊ែរ និងការពុះពារចំពោះគ្រោះមហន្តរាយតាមរយៈមនុស្សធម៌។ ដោយសារប្រភពថាមពលជំនួសកាន់តែមានសក្តានុពល បណ្តាប្រទេសទាំងនេះ និងយោធារបស់ពួកគេកំពុងបន្តកិច្ចខិតខំប្រឹងប្រែងដើម្បីឈានទៅរកការកំណត់ចំណុចស្នូលនៃបញ្ហាទាំងនេះ»។

កាលពីមួយខែមុន របាយការណ៍ការពារជាតិរបស់ជប៉ុនបានលើកឡើងពីផលប៉ះពាល់ដល់អាកាសធាតុ ដូចជាការរីករាលដាលញឹកញាប់ជាងមុនចំពោះគ្រោះមហន្តរាយធម្មជាតិ និងការកើនឡើងនៃបន្ទុកផ្នែកមូលដ្ឋាន និងសម្ភារយោធា។ ឯកសារនេះបានកត់សម្គាល់នូវសេចក្តីយោងដំបូងចំពោះបម្រែបម្រួលអាកាសធាតុនៅក្នុងរបាយការណ៍ប្រចាំឆ្នាំស្តីពីការត្រៀមលក្ខណៈ និងបញ្ហាប្រឈមផ្នែកសន្តិសុខជាតិ ដែលប្រទេសជប៉ុនបានចេញផ្សាយភ្លាមៗបន្ទាប់ពីបង្កើតកងកម្លាំងក្រសួងការពារជាតិ ដើម្បីគាំទ្រដល់គោលដៅរបស់ទីក្រុងតូក្យូអំពីសង្គមដែលគ្មានកាបូននៅត្រឹមឆ្នាំ 2050។

នៅឯកិច្ចប្រជុំកំពូលស្ដីពីអាកាសធាតុដែលបានកោះប្រជុំដោយប្រធានាធិបតីអាមេរិក លោក Joe Biden ក្នុងខែមេសា ឆ្នាំ 2021 ដែលពេលនោះរដ្ឋមន្ត្រីការពារជាតិជប៉ុន លោក Nobuo Kishi បានថ្លែងថា យ៉ាងហោចណាស់ 50% នៃស្ថាប័នរបស់ក្រសួងរបស់លោកនឹងចាប់ផ្តើមផលិតអគ្គិសនីជាមួយនឹងប្រភពកកើតឡើងវិញ ដូចជាថាមពលពន្លឺព្រះអាទិត្យក្នុងឆ្នាំសារពើពន្ធនោះ។ ក្រសួងនេះក៏បានបង្កើតរថក្រោះគំរូដែលប្រើម៉ាស៊ីនម៉ាស៊ូតអគ្គិសនីកូនកាត់ និងបានសហការជាមួយសហរដ្ឋអាមេរិក ដើម្បីបង្កើនសមត្ថភាពអគ្គិសនីនៃយានយន្តកងកម្លាំងស្វ័យការពារជាតិជប៉ុន។ លោក Kishi បានថ្លែងថា៖ «តាមទស្សនៈរបស់ខ្ញុំ សកម្មភាពសម្រាប់ការពារជាតិ និងបរិស្ថានអាចដើរទន្ទឹមគ្នា»។

កាសែត Hindustan Times បានរាយការណ៍កាលពីខែតុលា ឆ្នាំ 2022 កន្លងទៅនេះថា កងទ័ពឥណ្ឌាចង់កាត់បន្ថយផលប៉ះពាល់ដោយកាបូនរបស់ខ្លួនតាមរយៈការជំនួសរថយន្តធុនស្រាលចំនួន 25% រថយន្តក្រុងចំនួន 38% និងម៉ូតូចំនួន 48% ដោយរថយន្តអគ្គិសនីនៅក្នុងអង្គភាពសន្តិភាពមួយចំនួន។ កងទ័ពកំពុងរៀបចំកន្លែងសាករថយន្តអគ្គិសនីនៅក្នុងចំណតរថយន្តពាណិជ្ជកម្ម និងលំនៅឋាន និងបង្កើតចំណុចសាកថាមពលដើរដោយពន្លឺព្រះអាទិត្យ។ ឥណ្ឌាជាប់ចំណាត់ថ្នាក់ជាអ្នកប្រើប្រាស់ថាមពលធំជាងគេទីបី របស់ពិភពលោក ដោយធ្យូងថ្មមានច្រើនជាង 70% នៃវិស័យថាមពលរបស់ខ្លួន ហើយទីក្រុងញូវដែលីបានកំណត់ «គោលដៅថាមពលកកើតឡើងវិញប្រកបដោយមហិច្ឆតា» នេះបើយោងតាមរដ្ឋបាលពាណិជ្ជកម្មអន្តរជាតិរបស់សហរដ្ឋអាមេរិក។

ភាពធន់នឹងការប្រយុទ្ធ

បច្ចេកវិទ្យាបៃតងក៏ផ្តល់អត្ថប្រយោជន៍ខាងយុទ្ធសាស្ត្រផងដែរ។ លោក Yildirim ដែលមានសញ្ញាបត្របណ្ឌិតផ្នែកវិស្វកម្មបានរាយការណ៍សម្រាប់វិទ្យាស្ថានគោលនយោបាយយុទ្ធសាស្ត្រអូស្ត្រាលីថា៖ «កងកម្លាំងការពារជាតិអូស្ត្រាលីកំពុងប្រើប្រាស់អត្ថប្រយោជន៍នេះក្នុងវិធីសមហេតុផល»។ «ម៉ូតូអគ្គិសនីត្រូវបានសាកល្បងជាផ្នែកបន្ថែមនៃសមត្ថភាពឈ្លបយកការណ៍នៃរថពាសដែក។ យានជំនិះស្ងាត់ផ្តល់នូវអត្ថប្រយោជន៍ដ៏ធំនៅលើសមរភូមិ»។

ស្រដៀងគ្នានេះដែរ រថយន្តអគ្គិសនី និងរថយន្តកូនកាត់ធ្វើឱ្យភាពងាយរងគ្រោះផ្នែកដឹកជញ្ជូនមានតិចតួច ជាពិសេសនៅក្នុងតំបន់ដែលពិបាកធ្វើដំណើរ នេះបើយោងតាមលោក Paul Farnan ជំនួយការលេខាធិការរងនៃកងទ័ពសហរដ្ឋអាមេរិកសម្រាប់ទីតាំង ថាមពល និងបរិស្ថាន។ «ប្រសិនបើយើងអាចកាត់បន្ថយបរិមាណប្រេងឥន្ធនៈដែលយានយន្តរបស់យើងប្រើប្រាស់បាន 30%, 40%, 50% នោះគឺស្មើនឹងពាក់កណ្តាលនៃក្បួនរថយន្តប្រេងឥន្ធនៈដែលយើងត្រូវការពារ» នេះបើតាមលោក Farnan បានលើកឡើងនៅក្នុងពិធីសម្ពោធផែនការអនុវត្តអាកាសធាតុរបស់កងទ័ពនៅខែតុលា ឆ្នាំ 2022 ដែលអំពាវនាវឱ្យមានកងនាវាគ្មានការបំភាយឧស្ម័ននៃយានជំនិះធុនស្រាល ដែលមិនប្រើបច្ចេកទេស និងសម្រាប់ការអភិវឌ្ឍយានជំនិះប្រើកង់ដែលមានលក្ខណៈយុទ្ធសាស្ត្រដែលជំរុញដោយម៉ូទ័រអគ្សនីនិងឥន្ធនៈ និងយានយន្តប្រយុទ្ធ ទាំងពីរនៅឆ្នាំ 2027។ «នោះជាពាក់កណ្តាលនៃការខូចខាតបាត់បង់ដែលយើងនឹងប្រថុយប្រថាន។ នោះ​ជា​ចំនួន​ពាក់​កណ្តាល​នៃ​កងកម្លាំង​ប្រយុទ្ធ​ដែល​យើង​កំពុង​ដក​ចេញ​ពី​ការ​ប្រយុទ្ធ»។

យានជំនិះទាំងនោះក៏អាចដំណើរការប្រព័ន្ធអគ្គិសនីដូចជាទំនាក់ទំនង និងរ៉ាដាដោយមិនចាំបាច់ប្រើម៉ាស៊ីនដំណើរការ «ដោយកាត់បន្ថយសញ្ញាសំឡេង និងសញ្ញាកម្ដៅរបស់អ្នក ដែលជារបស់ពីរដែលអាវុធអាចភ្ជាប់មកជាមួយ» នេះបើយោងតាមការថ្លែងរបស់លោក Farnan ក្នុងអំឡុងពេលព្រឹត្តិការណ៍នៅមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ ដែលជាស្ថាប័នស្រាវជ្រាវដែលមានមូលដ្ឋាននៅសហរដ្ឋអាមេរិក។ «ដូច្នេះ ដោយគ្រាន់តែធ្វើបែបនេះ យើងមិនត្រឹមតែកាត់បន្ថយបរិមាណប្រេងឥន្ធនៈដែលយានយន្តទាំងនេះត្រូវការ និងបរិមាណប្រេងឥន្ធនៈដែលយើងត្រូវផ្លាស់ទីទៅកាន់សមរភូមិប៉ុណ្ណោះទេ យើងក៏​កំពុង​ផ្តល់​ការ​ការពារ​ប្រសើរជាងមុន​សម្រាប់​ទាហាន​របស់​យើងផងដែរ»។

កងទ័ពអាកាសនៅក្នុងប្រទេសអូស្ត្រាលី ចក្រភពអង់គ្លេស និងសហរដ្ឋអាមេរិកក៏កំពុងបង្កើតឧបករណ៍ចល័តដើម្បីផលិតប្រេងឥន្ធនៈសម្រាប់យន្តហោះពីជីវម៉ាស់ និងប្រភពប្រកបដោយនិរន្តរភាពផ្សេងទៀតផងដែរ នេះបើតាមការកត់សម្គាល់របស់លោក Yildirim ដែលបានអនុញ្ញាតជើងហោះហើរដោយប្រើឥន្ធនៈជីវម៉ាស់ដំបូងរបស់កងកម្លាំងការពារជាតិអូស្ត្រាលីក្នុងឆ្នាំ 2012 ខណៈពេលដែលលោកបម្រើការជាប្រធានវិស្វករនៃទីភ្នាក់ងារប្រេង និងឥន្ធនៈរួមរបស់កងទ័ពអាកាសអូស្ត្រាលី។ លោកបានរៀបរាប់ក្នុងសំណេរថា ឧបករណ៍បែបនេះ «រក្សាការសន្យានៃការផលិតនៅចំណុចនៃការប្រើប្រាស់ជំនួសឱ្យការពឹងផ្អែកលើប្រព័ន្ធចែកចាយដ៏ស្មុគស្មាញនៅក្នុងទីតាំងពិបាកជារឿយៗ»។

កងកម្លាំងការពារអនាគត

ការវិនិយោគប្រចាំឆ្នាំជាសកលលើថាមពលដែលមិនប៉ះពាល់ដល់បរិស្ថានត្រូវបានកំណត់ថានឹងលើសពី 2 ទ្រីលានដុល្លារអាមេរិកនៅឆ្នាំ 2030 ដែលកើនឡើងជាង 50% លើសពីឆ្នាំ 2022 នេះបើយោងតាមទីភ្នាក់ងារថាមពលអន្តរជាតិ (IEA)។ ភ្នាក់ងារថាមពលអន្តរជាតិបានរាយការណ៍កាលពីចុងឆ្នាំ 2022 ថា ការលុកលុយដោយមិនញញើតរបស់រុស្ស៊ីទៅលើអ៊ុយក្រែននៅក្នុងខែកុម្ភៈ ឆ្នាំ 2022 និងសង្រ្គាមបន្តបន្ទាប់បានបង្កឱ្យមាន «វិបត្តិថាមពលពិភពលោកដំបូង ដែលជាការភ្ញាក់ផ្អើលអំពីភាពទូលំទូលាយ និងភាពស្មុគស្មាញដែលមិនធ្លាប់មានពីមុនមក» ដែលទំនងជាជំរុញការផ្លាស់ប្តូរពីប្រេង និងធ្យូងថ្មទៅជាខ្យល់ ថាមពលព្រះអាទិត្យ និងថាមពលកកើតឡើងវិញផ្សេងទៀត។

ក្នុងនាមជាអ្នកប្រើប្រាស់ថាមពលចម្បង កងកម្លាំងប្រដាប់អាវុធរបស់ពិភពលោកនឹងត្រូវបានរៀបចំ និងអាចជួយរៀបចំការផ្លាស់ប្តូរនេះ។ ជាឧទាហរណ៍ លោក Yildirim បានកត់សម្គាល់ឃើញថា យោធាអូស្ត្រាលីបានចំណាយលើប្រេងឥន្ធនៈច្រើនជាងលើទំនិញផ្សេងទៀតក្នុងឆ្នាំ 2016-17 ប្រហែល 300 លានដុល្លារអាមេរិក។ លោកបានលើកឡើងក្នុងសំណេរថា ប្រេងឥន្ធនៈដែលដំណើរការកងកម្លាំងការពារជាតិអូស្ត្រាលីភាគច្រើនបានមកពី «ប្រេងឆៅដែលមានប្រភពជាសាកល ដែលហូរកាត់រោងចក្រចម្រាញ់ប្រេងអាស៊ីខាងកើត និងអាស៊ីអាគ្នេយ៍មួយចំនួនតូច»។ «ទោះជាយ៉ាងណាក៏ដោយ ការរៀបចំការផ្គត់ផ្គង់សម្រាប់ទំនិញសំខាន់ៗទាំងនេះ ទំនងជាកាន់តែមានភាពលំបាកជាងមុន»។

ការរំពឹងទុកនៃវិបត្តិ ឬជម្លោះក្នុងការកំណត់ការផ្គត់ផ្គង់ប្រេងឥន្ធនៈ គឺជាក្ដីបារម្ភផ្នែកសន្តិសុខ ជាពិសេសសម្រាប់ប្រទេសមួយដូចជាប្រទេសអូស្ត្រាលី ដែលជាប្រទេសនាំចូលប្រេងឆៅ និងប្រេងចម្រាញ់សុទ្ធ ហើយពឹងផ្អែកលើប្រេងឥន្ធនៈប្រហែលមួយភាគបីនៃការប្រើប្រាស់ថាមពលរបស់ខ្លួន។ អនុសាសន៍របស់លោក Yildirim ក្នុងការកាត់បន្ថយសេណារីយ៉ូបែបនេះ រួមមានការផ្លាស់ប្តូរយានជំនិះមិនប្រយុទ្ធរបស់កងកម្លាំងការពារជាតិអូស្រ្តាលី ទៅជារថយន្តអគ្គិសនី ការប្រើប្រាស់ថាមពលព្រះអាទិត្យ និងថាមពលកកើតឡើងវិញផ្សេងទៀតក្នុងការធ្វើឱ្យប្រសើរឡើងនូវទីតាំងយោធា និងការពង្រីកការប្រើប្រាស់បច្ចេកវិទ្យាគំរូនិម្មិតសម្រាប់ការហ្វឹកហ្វឺន និងការធ្វើសមយុទ្ធដើម្បីកាត់បន្ថយការប្រើប្រាស់ថាមពល។

លោកក៏បានអំពាវនាវឱ្យមានការចូលទៅក្នុងជំនាញនៃអង្គភាពវិស័យពាណិជ្ជកម្ម ដូចជាក្រុមហ៊ុនអាកាសចរណ៍ និងក្រុមហ៊ុនដឹកជញ្ជូន ព្រមទាំងវិទ្យាស្ថានស្រាវជ្រាវស៊ីវិល និងយោធាជាដៃគូ ដើម្បីជៀសវាងការចម្លង និងជំរុញអន្តរប្រតិបត្តិការ។ លោកបានសរសេរថា៖ «ការការពារអនាគតរបស់កងកម្លាំងការពារជាតិអូស្ត្រាលី ទាមទារឱ្យមានការរីកចម្រើននៃវិស័យឥន្ធនៈជំនួសនៅក្នុងប្រទេសអូស្ត្រាលី ដើម្បីបំពេញតម្រូវការដ៏ទូលំទូលាយដែលរួមបញ្ចូល ប៉ុន្តែមិនត្រូវបានកំណត់ដោយកងកម្លាំងការពារជាតិអូស្ត្រាលីតែម្នាក់ឯងនោះទេ»។ «រឿងនោះអាចសម្រេចបានតែតាមរយៈភាពជាដៃគូប៉ុណ្ណោះ ដោយសារតែគ្មានប្រតិបត្តិករ ឬសហគ្រាសណាមួយមានសិទ្ធិផ្តាច់មុខលើវិស័យថាមពលឡើយ»។

ភាពជាក់លាក់នៃបេសកកម្ម

នៅពេលដែលភាពជាដៃគូសាធារណៈ និងឯកជនបែបនេះចាប់ផ្តើមឫសគល់នៅទូទាំងតំបន់ឥណ្ឌូប៉ាស៊ីហ្វិក វិធីសាស្រ្តនៃសង្គមទាំងមូលចំពោះថាមពលកកើតឡើងវិញរួចហើយ កំពុងផ្តល់លទ្ធផលសម្រាប់ក្រសួងការពារជាតិអាមេរិក ដែលជាអ្នកប្រើប្រាស់ថាមពលដ៏ធំបំផុតរបស់រដ្ឋាភិបាល និងជាអ្នកទិញអគ្គិសនីដ៏ធំបំផុតមួយរបស់ពិភពលោក។ យោងតាមលោក James Grant អ្នកគ្រប់គ្រងកម្មវិធីថាមពល កំណើន និងសន្តិសុខនៃមជ្ឈមណ្ឌលពន្ធ និងវិនិយោគអន្តរជាតិ ដែលមានមូលដ្ឋាននៅសហរដ្ឋអាមេរិកបានឱ្យដឹងថា យោធាសហរដ្ឋអាមេរិកបង្កើនស្ទើរតែទ្វេដងនៃផលិតកម្មថាមពលកកើតឡើងវិញរបស់ខ្លួនពីឆ្នាំ 2011-15 ដែលលើសពីប្រទេសទាំងមូល។ លោក Grant បានរៀបរាប់នៅក្នុងអត្ថបទមួយនៅខែមេសា ឆ្នាំ 2021 សម្រាប់ទស្សនាវដ្តី The National Interest ដោយកត់សម្គាល់ អំពីការបង្កើនគោលដៅរបស់សាធារណរដ្ឋប្រជាមានិតចិន (PRC) សម្រាប់បច្ចេកវិទ្យាកកើតឡើងវិញថា៖ «នៅក្នុងយុគសម័យថ្មីដែលប្រភពថាមពលកកើតឡើងវិញអាចជាភាពខុសគ្នារវាងកម្លាំងប្រយុទ្ធដ៏រហ័សរហួន សុវត្ថិភាព និងកម្លាំងយឺតដែលមានហានិភ័យនៃការប៉ះទង្គិចទីផ្សារ និងហេដ្ឋារចនាសម្ព័ន្ធវ័យចំណាស់ វាមានចន្លោះតិចតួចសម្រាប់សហរដ្ឋអាមេរិកក្នុងការមិនសប្បាយចិត្ត»។ «ដូចគ្នានឹងពេលដែលយោធាសហរដ្ឋអាមេរិកផ្តោតលើអាវុធនុយក្លេអ៊ែរទាំងបី ដើម្បីរារាំងសត្រូវក្នុងអំឡុងសង្គ្រាមត្រជាក់ គោលបំណងរបស់ខ្លួននៅក្នុងសតវត្សទី 21 គួរតែបង្កើនឧត្ដមភាពរបស់ខ្លួនជាកម្លាំងប្រយុទ្ធឯករាជ្យប្រកបដោយថាមពល»។

យោធាអាមេរិកកំពុងបន្តគោលដៅនេះលើផ្នែកជាច្រើន ដោយមានកម្លាំងបន្ថែមពីបទបញ្ជាប្រតិបត្តិនៅខែធ្នូ ឆ្នាំ 2021 របស់លោកប្រធានាធិបតី Biden ដែលទីភ្នាក់ងារសហព័ន្ធសម្រេចបានអគ្គិសនីគ្មានការបំពុលដោយកាបូន 100% នៅត្រឹមឆ្នាំ 2030 យ៉ាងហោចណាស់ពាក់កណ្តាលត្រូវតែផ្គត់ផ្គង់ថាមពលដែលមិនប៉ះពាល់ដល់បរិស្ថានក្នុងមូលដ្ឋាន ក្នុងចំណោមគោលដៅផ្សេងទៀត។ ក្រសួងការពារជាតិ និងសាខារបស់ខ្លួនបានធ្វើតាមការណែនាំនេះ ដោយអនុវត្តផែនការសម្រាល និងទប់ទល់នឹងអាកាសធាតុដ៏ទូលំទូលាយ។ ក្នុងចំណោមគំនិតផ្ដួចផ្ដើម៖

កងទ័ពអាមេរិកដែលធ្វើការជាមួយក្រុមហ៊ុនផលិត General Dynamics Land Systems បានបង្ហាញគំរូដើមនៃរថក្រោះប្រយុទ្ធប្រភេទ Abrams ជំនាន់ក្រោយរបស់ខ្លួនកាលពីចុងឆ្នាំ 2022។ AbramsX រួមបញ្ចូលនូវកម្លាំងជំរុញអគ្គិសនីបែបកូនកាត់ ដែលនឹងកាត់បន្ថយការប្រើប្រាស់ប្រេងឥន្ធនៈ និងអនុញ្ញាតឱ្យអ្នកបើកបររបស់ខ្លួនដំណើរការឧបករណ៍ចាប់សញ្ញា និងប្រព័ន្ធផ្សេងទៀត ដោយមិនមានសំឡេងរំខាន និងកម្ដៅម៉ាស៊ីន។ ទស្សនាវដ្ដី The National Interest បានរាយការណ៍ថា៖ «ប្រការនេះកែលម្អសមត្ថភាពកម្ទេច និងលទ្ធភាពនៅតែអាចដំណើរការបានរបស់យានយន្ត និងពង្រីករចនាសម្ព័ន្ធប្រតិបត្តិការរបស់ខ្លួនយ៉ាងច្រើន»។ ស្រដៀងគ្នានេះដែរ អ្នកចូលរួមក្នុងឧស្សាហកម្មទាំងប្រាំនៅក្នុងកម្មវិធីយានយន្តប្រយុទ្ធដែលមានមនុស្សបើកតាមជម្រើសរបស់កងទ័ព ដើម្បីជំនួសយានយន្តប្រយុទ្ធសម្រាប់កងទ័ពថ្មើរជើងប្រភេទ M2 Bradley បានស្នើការរចនាបែបអគ្គិសនីកូនកាត់។

បន្ថែមពីលើការពង្រីកការប្រើប្រាស់ឥន្ធនៈសម្រាប់យន្តហោះប្រកបដោយនិរន្តរភាព និងការរុករកការបញ្ចូលថាមពលអគ្គិសនីនៃយន្តហោះចល័តខ្នាតតូច និងយន្តហោះស្លាបបង្វិល កងទ័ពអាកាសអាមេរិកកំពុងសហការជាមួយអង្គការណាសា (NASA) ក្រុមហ៊ុនការពារជាតិ និងដៃគូផ្សេងទៀតដើម្បីបង្កើតយន្តហោះស្លាបបញ្ចូលគ្នាដែលអូសតិច និងសន្សំសំចៃប្រេងឥន្ធនៈកាន់តែប្រសើរ។ ជាមួយនឹងឥន្ធនៈសម្រាប់យន្តហោះមានចំនួនប្រហែល 80% នៃការប្រើប្រាស់ថាមពលរបស់សាខា ភាពជឿនលឿនបែបនេះនៅតែជាកត្តាចាំបាច់សម្រាប់សហរដ្ឋអាមេរិកក្នុងការរក្សាភាពលេចធ្លោផ្នែកបច្ចេកវិទ្យារបស់ខ្លួនលើសាធារណរដ្ឋប្រជាមានិតចិន និងផ្នែកផ្សេងៗទៀត នេះបើយោងតាមលោក John Sneden ប្រធានក្រុមប្រឹក្សាផ្នែកជំរុញរបស់កងទ័ពអាកាស។ លោក Sneden បានថ្លែងក្នុងអំឡុងសន្និសីទស្ដីអំពីដែនអាកាស លំហ និងអ៊ីនធឺណិតរបស់សមាគមកងកម្លាំងអាកាស និងអវកាស ក្នុងរដ្ឋ Maryland នៅក្នុងខែកញ្ញា ឆ្នាំ 2022 ថា៖ «ខ្ញុំនឹងប្រាប់អ្នកថានៅពេលណាដែលអ្នកមានអត្ថប្រយោជន៍ វាជារឿងសំខាន់ក្នុងការត្រួតពិនិត្យចំណុចទាំងប្រាំមួយរបស់អ្នក»។ «តើ​បច្ចាមិត្តរបស់​អ្នក​មក​ពី​ក្រោយ​ខ្នងអ្នក​លឿន​ប៉ុនណា? តើ​មាន​រឿង​អ្វី​កើតឡើង? យើង​មិន​អាច​បន្ត​ពឹងផ្អែកលើ​ប្រយោជន៍​បាន​ទេ។ យើងត្រូវតែមានការច្នៃប្រឌិតជានិច្ច ត្រូវឆ្ពោះទៅមុខជានិច្ច។» កងទ័ពម៉ារីនអាមេរិក និងកងទ័ពជើងទឹកអាមេរិក ក៏កំពុងកសាងមូលដ្ឋានគ្រឹះនៃវឌ្ឍនភាពនៃថាមពលប្រកបដោយនិរន្តរភាពផងដែរ ចាប់ពីការដាក់ឱ្យប្រើប្រាស់នាវាមុជទឹក និងនាវាដើរដោយថាមពលនុយក្លេអ៊ែរដំបូងបង្អស់របស់ពិភពលោកកាលពីជិត 70 ឆ្នាំមុន រហូតដល់ការផលិតថាមពលកម្ដៅក្នុងផែនដីនៅពាក់កណ្តាលទសវត្សរ៍ឆ្នាំ 1980 និងការដាក់ពង្រាយកងនាវាចរណ៍បៃតងដ៏អស្ចារ្យនៃយន្តហោះ និងនាវាដែលដំណើរការដោយថាមពលជីវឥន្ធនៈក្នុងទសវត្សរ៍កន្លងមក។ នៅក្នុងឆ្នាំ 2022 មូលដ្ឋានផ្នែកដឹកជញ្ជូនរបស់កងទ័ពម៉ារីន នៅទីក្រុង Albany រដ្ឋ Georgia បានក្លាយជាទីតាំងនៃក្រសួងការពារជាតិដំបូងគេ ដើម្បីទទួលបានថាមពលកម្រិតសូន្យសុទ្ធ មានន័យថាវាបង្កើតថាមពលអគ្គិសនីកាន់តែច្រើនពីប្រភពដែលអាចកើតឡើងវិញបាន ដូចជាទួរប៊ីនចំហាយជីវម៉ាស់ និងម៉ាស៊ីនបង្កើតឧស្ម័ននៅកន្លែងចាក់សំរាម ជាងការប្រើប្រាស់ប្រចាំឆ្នាំពីអ្នកផ្តល់សេវាទឹកភ្លើងសំរាមរបស់ខ្លួន។

គំនិតផ្តួចផ្តើមទាំងនេះនឹងផ្តល់តួរលេខនៅក្នុងវេទិការស៊ីវិលផងដែរ។ លោក Grant បានសរសេរនៅក្នុងទស្សនាវដ្តី The National Interest ថា៖ «យោធាអាមេរិកគឺជាអ្នកច្នៃប្រឌិតបច្ចេកវិទ្យាដ៏អស្ចារ្យបំផុតមួយនៅលើភពផែនដី។ វានឹងមិនមានភាពខុសគ្នានៅក្នុងវិស័យថាមពលនោះទេ»។ «បន្ថែមពីលើការពង្រឹងសុវត្ថិភាពតាមរយៈការបង្កើនថាមពលកកើតឡើងវិញ សាធារណៈជនទទួលបានពីកម្មវិធីតាមបណ្តោយមកក្រោមជាច្រើននៃបច្ចេកវិទ្យាថាមពលទំនើប»។

សម្រាប់យោធាតំបន់ឥណ្ឌូប៉ាស៊ីហ្វិក និងស្ថាប័នការពារជាតិ កាតព្វកិច្ចស្នូលនៅតែស្ថិតស្ថេរចំពេលរលកផ្លាស់ប្តូរនៃការកើនឡើងថាមពលកកើតឡើងវិញ។ រដ្ឋលេខាធិការកងទ័ពអាកាសអាមេរិក លោក Frank Kendall បានលើកឡើងនៅក្នុងសេចក្តីថ្លែងការណ៍មួយដោយបង្ហាញផែនការអាកាសធាតុរបស់ទីភ្នាក់ងារនេះថា៖ «សូមកុំយល់ច្រឡំ បេសកកម្មរបស់ក្រសួងនៅតែហោះហើរ ប្រយុទ្ធ និងឈ្នះគ្រប់ពេលវេលា និងគ្រប់ទីកន្លែង»។ «យើងផ្តោតទៅលើទំនើបកម្ម និងការកែលម្អឥរិយាបថប្រតិបត្តិការរបស់យើង ទាក់ទងទៅនឹងបញ្ហាប្រឈមរបស់យើង៖ ប្រទេសចិន។ យើង​នៅ​តែ​ត្រៀម​ខ្លួនរួច​ជា​ស្រេច​ដើម្បី​ឆ្លើយ​តប និង​សម្រេច​បាន​នូវ​ការ​ត្រួតត្រា​លើ​ដែនអាកាស និងអាវកាស​នៅ​ពេល​ណា និង​កន្លែងណា​ដែល​ប្រទេស​ជាតិ​ត្រូវ​ការ​យើង។

«បេសកកម្មរបស់យើងនៅតែមិនផ្លាស់ប្តូរ ប៉ុន្តែយើងទទួលស្គាល់ថាពិភពលោកកំពុងប្រឈមមុខនឹងបម្រែបម្រួលអាកាសធាតុដែលកំពុងតែបន្ត និងបង្កើនល្បឿន ហើយយើងត្រូវតែត្រៀមខ្លួនដើម្បីឆ្លើយតប ប្រយុទ្ធ និងឈ្នះនៅក្នុងពិភពលោកដែលកំពុងតែផ្លាស់ប្តូរឥតឈប់ឈរនេះ»។

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។