សមយុទ្ធទ្វេភាគី Dalan Ba Dame រួមបញ្ចូលគ្នារវាងកងកម្លាំងទីម័រខាងកើត និងអាមេរិក

បុគ្គលិករបស់ទស្សនាវដ្តី FORUM

កងកម្លាំងយោធាទីម័រស៊ី និងកងកម្លាំងអាមេរិកបានបង្កើនអន្តរប្រតិបត្តិការយុទ្ធសាស្ត្រ និងពង្រឹងការត្រៀមខ្លួនជាសមូហភាពនៅក្នុងសមយុទ្ធ Dalan ba Dame ប្រចាំឆ្នាំ 2023 នៅចុងខែកក្កដា និងដើមខែសីហា នៅទីក្រុង Baucau ប្រទេសទីម័រខាងកើត។

ឈ្មោះនៃការហ្វឹកហ្វឺនទ្វេភាគីមានន័យថា «មាគ៌ាទៅកាន់សន្តិភាព» នៅក្នុងភាសាទីទុំដែលជាភាសាដើមរបស់ទីម័រ។ ការធ្វើសមយុទ្ធឡើងវិញជាលើកទីបីរបស់ដៃគូរួមមានទាហានចំនួន 90 នាក់ និងបុគ្គលិកមកពីកងកម្លាំងការពារជាតិ Falintil-Forças de Defesa de Timor-Leste (F-FDTL) ទាហានអាមេរិកចំនួន 75 នាក់ ទាហានជើងទឹកអាមេរិកចំនួន​បួននាក់ និងអាកាសយានិកអាមេរិកចំនួនពីរនាក់។

វគ្គហ្វឹកហ្វឺននេះមានគោលបំណងលើកកម្ពស់អន្តរប្រតិបត្តិការ និងបង្កើនសមត្ថភាពរួមបញ្ចូលគ្នាសម្រាប់យថាភាពសាមញ្ញ ស្មុគស្មាញ និងនាពេលអនាគតនៅទូទាំងតំបន់ឥណ្ឌូប៉ាស៊ីហ្វិក។ អ្នកចូលរួមបានទទួលការហ្វឹកហ្វឺនផ្នែកវេជ្ជសាស្រ្ដ និងបានបង្កើនចំណេះដឹងរបស់ពួកគេក្នុងការរុករកដែនគោក យុទ្ធសាស្ត្រអង្គភាពតូច និងវិស្វកម្ម។ សមយុទ្ធប្រចាំឆ្នាំបានលើកកម្ពស់សុច្ឆន្ទៈ កិច្ចសហប្រតិបត្តិការ និងមិត្តភាព។

លោកឧត្តមសេនីយឯក Falur Rate Laek ដែលជាមេបញ្ជាការកងកម្លាំងការពារជាតិរបស់ F-FDTL បានធ្វើជាអធិបតីក្នុងពិធីបើកដំណើរការកាលពីថ្ងៃទី 24 ខែកក្កដា រួមជាមួយនឹងភារធារីអាមេរិក លោក Tom Daley និងឧត្តមសេនីយ៍ទោ លោក Reginald Neal នៃកងទ័ពអាមេរិកប្រចាំតំបន់ប៉ាស៊ីហ្វិក។ លោក Daley បានលើកឡើងនៅក្នុងសុន្ទរកថាបើកចំហថា៖ «យើងសង្ឃឹមថាយើងមិនត្រឹមតែពង្រឹងវិស័យយោធារបស់យើងប៉ុណ្ណោះទេ ប៉ុន្តែថែមទាំងពង្រឹងសមត្ថភាពរបស់យើងក្នុងការធ្វើការរួមគ្នា និងផ្តល់មធ្យោបាយដើម្បីលើកកម្ពស់ជីវភាពរស់នៅរបស់ប្រជាជនទីម័រ រួមទាំងការផ្តល់ជំនួយមនុស្សធម៌ និងការសង្គ្រោះគ្រោះមហន្តរាយផងដែរ»។ «តាមរយៈ​សមយុទ្ធ​រួម​នេះ យើង​កំពុង​កសាង​ដោយ​ក្តីសង្ឃឹម​ថា ទីម័រខាងកើត​នឹង​អាច​ការពារ​ពលរដ្ឋ​របស់ខ្លួន​ ការពារ​អធិបតេយ្យភាព​របស់ខ្លួន និង​ជំរុញ​ផលប្រយោជន៍​ជាតិ​របស់ខ្លួនបាន​កាន់តែ​ប្រសើរឡើង»។

អាទិភាពរបស់ F-FDTL គឺការពារទីម័រខាងកើត និងពលរដ្ឋជាង 1,3 លាននាក់របស់ខ្លួនពីការវាយប្រហារដែលអាចកើតមាន។ បេសកកម្មបន្ទាប់បន្សំរួមមាន ការកសាងប្រទេសជាតិ និងការលើកកម្ពស់ន្តិសុខក្នុងប្រទេស។ កងកម្លាំង​ការពារជាតិរបស់​ប្រទេស​មាន​សមាសភាពបុគ្គលិកដែន​អាកាស ដែនគោក និងដែនទឹក​ចំនួនប្រហែលជា 1 500 ​នាក់។ អង្គភាពដែនគោកមានកងវរសេនាតូចថ្មើរជើងចំនួនពីរ ក្រុមហ៊ុនវិស្វកម្ម ក្រុមហ៊ុនការគាំទ្រលើផ្នែកដឹកជញ្ជូន និងកងអនុសេនាតូចនៃកងរាជអាវុធហត្ថ។

កងទ័ពអាមេរិកប្រចាំនៅសមយុទ្ធ Dalan ba Dame រួមមានកងអនុសេនាតូចមកពីក្រុមហ៊ុនកងរាជអាវុធហត្ថទី 115 នៃឆ្មាំជាតិនៃរដ្ឋ Rhode Island និងបញ្ជាការវិស្វកម្មកម្រិតតំបន់ទី 412 របស់កងទ័ពបម្រុង ដែលបានធ្វើការកែលម្អរចនាសម្ព័ន្ធដល់គ្លីនិកវេជ្ជសាស្រ្តនៅឯមូលដ្ឋានកងទ័ពរបស់ F-FDTL។ បព្វជិតដែលជាកងទ័ពអាកាសអាមេរិកមកពីកងឯកភាពផ្នែកដឹកជញ្ជូនតាមអាកាសទី 143 នៃឆ្មាំជាតិនៃរដ្ឋ Rhode Island បានធ្វើសេវាកម្មជាមួយសង្ឃរាជមកពីទីក្រុង Baucau និងរដ្ឋធានី Dili។

ក្រសួងការបរទេសអាមេរិកបានរាយការណ៍ថា កងវរសេនាតូចផ្នែកសាងសង់នៃកងទ័ពជើងទឹកអាមេរិក បានអនុវត្តគម្រោងមនុស្សធម៌ជាង 100 នៅក្នុងប្រទេសទីម័រខាងកើត ចាប់តាំងពីឆ្នាំ 2009 រួមទាំងការកសាងសាលារៀន និងគ្លីនិកវេជ្ជសាស្រ្តផងដែរ។ អាជ្ញាធរទីម័រ និងអជ្ញាធរអាមេរិកបានលើកកម្ពស់អភិបាលកិច្ចល្អ កែលម្អសេវាសុខភាព ដំឡើងតំណែងកងកម្លាំងសន្តិសុខប្រកបដោយវិជ្ជាជីវៈ និងបានជំរុញសេដ្ឋកិច្ចដើម្បីបង្កើតការងារសម្រាប់ប្រជាជនដែលកំពុងតែកើនឡើង។

ទីតាំងរបស់ទីម័រខាងកើត — ពាក់កណ្តាលភាគខាងកើតនៃកោះទីម័រក្នុងប្រជុំកោះម៉ាឡេ — មានគុណសម្បត្តិផ្នែកភូមិសាស្ត្រជាខ្សែការពារជួរមុខនៅតំបន់ឥណ្ឌូប៉ាស៊ីហ្វិក។ វាស្ថិតនៅផ្លូវបំបែកនៃអាស៊ីអាគ្នេយ៍ និងបណ្តាប្រទេសកោះប៉ាស៊ីហ្វិក ហើយមានទីតាំងល្អដើម្បីជួយធានាឱ្យមានឥណ្ឌូប៉ាស៊ីហ្វិកសេរី និងបើកចំហ។

ប្រទេសទីម័រខាងកើតបានបំបែកឯករាជ្យដែលទទួលបានពីប្រទេសឥណ្ឌូណេស៊ីក្នុងឆ្នាំ 2002 ហើយនៅតែជាប្រទេសមួយក្នុងចំណោមប្រទេសវ័យក្មេងជាងគេបំផុតនៅលើពិភពលោកផងដែរ។ ក្រសួងការបរទេសអាមេរិកបានរាយការណ៍ថា អាមេរិកប្តេជ្ញាធ្វើការជាមួយទីម័រខាងកើត និងគាំទ្រដល់កិច្ចខិតខំប្រឹងប្រែងបន្តរបស់ខ្លួនក្នុងការចូលរួមជាមួយសមាគមប្រជាជាតិអាស៊ីអាគ្នេយ៍ (អាស៊ាន)។ ស្ថានទូតអាមេរិកប្រចាំនៅទីក្រុងឌីលី បានថ្លែងនៅក្នុងសេចក្តីប្រកាសព័ត៌មានមួយថា៖ «សហរដ្ឋអាមេរិកមានមោទនភាពក្នុងការធ្វើជាដៃគូជាមួយទីម័រខាងកើត ស្របពេលដគូសបញ្ជាក់ពីការប្តេជ្ញាចិត្តរបស់ខ្លួនក្នុងការគាំទ្រអធិបតេយ្យភាព សន្តិសុខ និងវិបុលភាពរបស់ប្រទេសនេះ»។

សមយុទ្ធ Dalan ba Dame អនុវត្តតាមការប្រគល់យន្តហោះស៊ើបការណ៍ប្រភេទ Cessna 206 របស់សហរដ្ឋអាមេរិកទៅកាន់ F-FDTL ក្នុងខែមិថុនា ឆ្នាំ 2023។ អាកាសយានិកអាមេរិកមកពីកងអនុសេនាធំនៃទីប្រឹក្សាយុទ្ធសាស្ត្រទី 36 បានបណ្តុះបណ្តាលជាមួយសមភាគីទីម័ររបស់ពួកគេ ដើម្បីបង្កើនជំនាញដូចជា ការគ្រប់គ្រងអាកាសយានដ្ឋាន ការថែទាំយន្តហោះ ការបង្ការអគ្គីភ័យ ការចាក់ប្រេង និងវិធានការសន្តិសុខ ដើម្បីគាំទ្រដល់ការស៊ើបការណ៍ ការឃ្លាំមើល និងការឈ្លបយកការណ៍ដែនសមុទ្រ។

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។