ប្រទេសប៉ាឡូចង់ឱ្យមានការល្បាតបន្ថែមទៀតរបស់អាមេរិកលើដែនទឹករបស់ខ្លួន បន្ទាប់ពីការឈ្លានពានរបស់ចិន
សារព័ត៌មាន REUTERS
ប៉ាឡូដែលជាប្រទេសកោះប៉ាស៊ីហ្វិក (PIC) បានស្នើឱ្សសហរដ្ឋ អាមេរិកបង្កើនការល្បាតលើដែនទឹករបស់ខ្លួនបន្ទាប់ពីមានការលុកលុយជាច្រើនដងពីសំណាក់នាវាចិនទៅលើតំបន់សេដ្ឋកិច្ចពិសេសរបស់ខ្លួន នេះបើយោងតាមប្រធានាធិបតីប៉ាឡូ លោក Surangel Whipps Jr. បានថ្លែងកាលពីពាក់កណ្តាលខែមិថុនា ឆ្នាំ 2023 កន្លងទៅនេះ។
លោក Whipps បានមានប្រសាសន៍ថា លោកក៏នឹងស្វាគមន៍វត្តមានយោធាអាមេរិកកាន់តែច្រើនថែមទៀតនៅក្នុងប្រទេសនេះ ដោយមានទាហានឈរជើងជាមួយនឹងកងឆ្មាំឆ្នេរ និងក្រុមសកម្មភាពស៊ីវិលនៅក្នុងតំបន់យុទ្ធសាស្ត្រនេះ។
លោកបានថ្លែងក្នុងអំឡុងដំណើរទស្សនកិច្ចទៅទីក្រុងតូក្យូថា៖ «មិនថាមានអ្វីកើតឡើងទេ យើងនឹងស្ថិតនៅចំកណ្តាលនៃអ្វីដែលកំពុងកើតឡើង ដូច្នេះវាជារឿងសំខាន់ដែលយើងទទួលបានការពារ» លោកបានបន្ថែមទៀតថា៖ «ដើម្បីទទួលបានសន្តិភាព អ្នកត្រូវតែរៀបចំកម្លាំង»។
នៅពេលសួរអំពីការលុកលុយនេះ អ្នកនាំពាក្យក្រសួងការបរទេសចិន លោក Wang Wenbin បានឆ្លើយតបថា នាវាទាំងនោះបានស្វែងរកកន្លែងសំចត ហើយមិនបានធ្វើការពិនិត្យ ឬស៊ើបអង្កេតទេ។
ប៉ាឡូ ដែលជាប្រជុំកោះដាច់ស្រយាលនៃផ្កាថ្ម និងកោះភ្នំភ្លើងនៅមហាសមុទ្រប៉ាស៊ីហ្វិកភាគខាងលិច ដែលមានប្រជាជនត្រឹមតែជាង 20 000 នាក់ មានកតិកាសញ្ញាដែលមានរយៈពេលជាច្រើនទសវត្សរ៍ជាមួយទីក្រុងវ៉ាស៊ីនតោន ដែលសហរដ្ឋអាមេរិកជាអ្នកទទួលខុសត្រូវចំពោះកិច្ចការពាររបស់ប្រទេសនៅដែនកោះប៉ាស៊ីហ្វិក និងផ្តល់ជំនួយផ្នែកសេដ្ឋកិច្ចផងដែរ។
សហរដ្ឋអាមេរិកមានកិច្ចព្រមព្រៀងស្រដៀងគ្នានៅក្នុងតំបន់ជាមួយប្រទេសមីក្រូណេស៊ី និងកោះម៉ាស្យល ហើយក៏បានចុះហត្ថលេខាលើកិច្ចព្រមព្រៀងសហប្រតិបត្តិការការពារជាតិជាមួយប្រទេសប៉ាពូអាស៊ីនូវែលហ្គីណេកាលពីខែឧសភា ឆ្នាំ 2023 កន្លងទៅផងដែរ។
សាធារណរដ្ឋប្រជាមានិតចិន (PRC) ចង់បង្កើនឥទ្ធិពលរបស់ខ្លួននៅក្នុងតំបន់ប៉ាស៊ីហ្វិក និងបានចុះហត្ថលេខាលើកិច្ចព្រមព្រៀង សន្តិសុខជាមួយនឹងកោះសូឡូម៉ុងនៅឆ្នាំ 2022 ដែលបានបង្កក្ដីបារម្ភអំពីមូលដ្ឋានយោធាចិនដែលអាចមាននៅក្នុងតំបន់។
លោក Whipps បានថ្លែងថា ប្រទេសប៉ាឡូបានកំណត់អត្តសញ្ញាណនាវាចិននៅក្នុងដែនទឹករបស់ខ្លួនកាលពីខែឧសភា ឆ្នាំ 2023 ថ្មីៗនេះ នៅពេលដែលកប៉ាល់មួយហាក់ដូចជាកំពុងពិនិត្យមើលតំបន់មួយនៅជិតខ្សែកាបអុបទិក ដែលមានសារៈសំខាន់សម្រាប់ទំនាក់ទំនងរបស់ប្រទេស។
លោកបានបន្តថា លោកនឹងលើកឡើងអំពីការលុកលុយទាំងនោះនៅក្នុងកិច្ចប្រជុំរបស់មេដឹកនាំនៃវេទិកាកោះប៉ាស៊ីហ្វិកនៅក្នុងខែវិច្ឆិកា ឆ្នាំ 2023 ខាងមុខនេះ។ វេទិកានៅក្នុងឆ្នាំ 2022 បានច្រានចោលការជំរុញរបស់ទីក្រុងប៉េកាំងក្នុងការចុះហត្ថលេខាលើកិច្ចព្រមព្រៀងសន្តិសុខ និងពាណិជ្ជកម្មជាមួយនឹងសមាជិកចំនួន 10 ក្នុងចំណោមសមាជិកចំនួនរបស់ខ្លួន។
រដ្ឋមន្ត្រីការពារជាតិអាមេរិក លោក Lloyd Austin បានលើកសរសើរអំពី «រដ្ឋដែនកោះតូចៗ» ដូចជាប្រទេសប៉ាឡូ នៅក្នុងសុន្ទរកថានៅប្រទេសសិង្ហបុរីកាលពីដើមខែមិថុនា ឆ្នាំ 2023 កន្លងទៅនេះ ហើយបានសំដែងការដឹងគុណយ៉ាងជ្រាលជ្រៅចំពោះភាពជាដៃគូរវាងប្រទេសប៉ាឡូ និងសហរដ្ឋអាមេរិកក្នុងអំឡុងពេលកិច្ចប្រជុំឆ្នាំ 2021ជាមួយលោក Whips។
ប្រទេសប៉ាឡូបានរៀបចំសមយុទ្ធយោធារបស់សហរដ្ឋអាមេរិក ហើយសហរដ្ឋអាមេរិកគ្រោងដាក់ប្រព័ន្ធរ៉ាដាចាប់គោលដៅពីជើងមេឃនៅក្នុងប្រទេសនេះនៅឆ្នាំ 2026។
ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។
