នៅប៉ែកខាងត្បូងជ្រៅរបស់ប្រទេសថៃ សិល្បករខិតខំផ្លាស់ប្តូរ «រូបភាពហិង្សា» របស់ខ្លួន
អត្ថបទ និងរូបថតដោយសារព័ត៌មាន Benar News
ឆ្នេរក្នុងខេត្តប៉ាតានី (Pattani) ដែលស្ថិតនៅចំកណ្តាលប៉ែកខាងត្បូងជ្រៅរបស់ប្រទេសថៃ គឺមានភាពស្រស់ស្អាត ប៉ុន្តែភាគច្រើនជាវាលខ្សាច់។ អ្នកខាងក្រៅស្ទើរតែមិនហ៊ានប្រថុយនៅទីនេះទេ ពីព្រោះតំបន់ព្រំដែនភាគច្រើនដែលជាមូស្លីម និងនិយាយភាសាម៉ាឡេ គឺមានន័យដូចនឹងការបះបោរផ្តាច់ខ្លួនប្រដាប់អាវុធ ដែលបានលេបត្របាក់អស់ជាច្រើនទស្សវត្សរ៍ដោយមើលមិនឃើញ។
ប៉ុន្តែសិល្បករ និងអ្នករស់នៅក្នុងក្រុងប៉ាតានី (Pattani) ដែលជាទីរួមខេត្ត និងជាមជ្ឈមណ្ឌលនៃការធ្វើពាណិជ្ជកម្មអំបិលដ៏យូរលង់នៅភាគខាងត្បូងឆ្ងាយ កំពុងតែធ្វើការដើម្បីផ្លាស់ប្តូររូបភាពអវិជ្ជមាននោះ តាមរយៈការបង្ហាញនូវបេតិកភណ្ឌសិល្បៈ និងវប្បធម៌ដ៏សម្បូរបែបក្នុងតំបន់នេះ ដែលខុសប្លែកពីកន្លែងផ្សេងទៀតនៅក្នុងប្រទេសថៃ។
លោក Hadee Hamidong អ្នករៀបចំកម្មវិធី Pattani Decoded ដែលជាកម្មវិធីសិល្បៈច្នៃប្រឌិត និងរចនាដែលបានចាប់ផ្តើមនៅឆ្នាំ 2019 ប៉ុន្តែត្រូវផ្អាកអស់រយៈពេលពីរឆ្នាំដោយសារជំងឺរាតត្បាតកូវីដ-19 បានថ្លែងថា៖ «យើងចង់ប្រាប់រឿងផ្សេង»។ «យើងចង់ផ្លាស់ប្តូររូបភាពហិង្សា និងបង្ហាញស្រទាប់មួយផ្សេងទៀត។ នៅទីនេះមានច្រើនជាជាងឧប្បត្តិហេតុទាំងនោះ។ មានមនុស្ស និងទិដ្ឋភាពផ្សេងគ្នាចំពោះជីវិត។ មានប្រវត្តិសាស្ត្រ និងបេតិកភណ្ឌដែលមានអាយុកាលរាប់សតវត្សរ៍មកហើយ»។
«Deep Salt» គឺជាប្រធានបទនៃពិព័រណ៍សិល្បៈប្រចាំឆ្នាំ 2022។ លោក Hadee បានលើកឡើងថា ការតាំងពិព័រណ៍ ដែលប្រារព្ធឡើងនៅដើមខែកញ្ញា នេះ បានទាក់ទាញមនុស្សប្រមាណ 30 000 នាក់នៅទីកន្លែងនានានៅក្នុងក្រុងប៉ាតានី (Pattani) និងកន្លែងផ្សេងទៀត រួមបញ្ចូលទាំងកសិដ្ឋានអំបិលផងដែរ។ ក្រុមមួយទៀតឈ្មោះថា Patani Artspace ដែលប្រមូលផ្តុំវិចិត្រសាលចំនួន 10 កំពុងរៀបចំពិធីបុណ្យសិល្បៈស្របគ្នារហូតដល់ខែវិច្ឆិកា ឆ្នាំ 2022 នៅក្នុងទីក្រុងនានាក្នុងខេត្តប៉ាតានី (Pattani) និងខេត្តផ្សេងទៀតនៅប៉ែកខាងត្បូងជ្រៅរបស់ប្រទេសថៃ។
ទីក្រុងឆ្នេរសមុទ្រប៉ាតានី (Pattani) ដែលបែរមុខទៅរកឈូងសមុទ្រថៃ បានក្លាយជាមជ្ឈមណ្ឌលសម្រាប់ការប្រមូលផលអំបិលពីសមុទ្រជាយូរមកហើយ និងជាមជ្ឈមណ្ឌលពាណិជ្ជកម្មសម្រាប់ការនាំចេញអំបិលទៅកាន់ប្រទេសចិន និងទីផ្សារបរទេសផ្សេងទៀតផងដែរ។ ភាពចម្រុះមុខដែលរកឃើញនៅទីនេះត្រូវបានគេដាក់រហស្សនាមថា «sweet salt» (អំបិលផ្អែម) ដោយសារតែរសជាតិស្រាលរបស់អំបិល។ ទោះជាយ៉ាងណាក៏ដោយ ការធ្វើស្រែអំបិលបានធ្លាក់ចុះយ៉ាងខ្លាំងក្នុងប៉ុន្មានឆ្នាំថ្មីៗនេះ ដោយសារបម្រែបម្រួលអាកាសធាតុ និងលំនាំអាកាសធាតុដែលមិនអាចទាយទុកជាមុនបាន។ លោក Abdul Ka-bu ជាកសិករអំបិលក្នុងតំបន់ដែលបានចូលរួមក្នុងការតាំងពិព័រណ៍ «Deep Salt» បានលើកឡើងថា៖ «វាជាការងារដ៏លំបាក ហើយត្រូវការដី ទឹក និងពន្លឺថ្ងៃ»។ «យើងមិនអាចពឹងផ្អែកលើធនធានទាំងនោះដូចដែលយើងអាចធ្វើបានកាលពីអតីតកាលទៀតនោះទេ»។
នៅក្នុងវីដេអូមួយដែលបង្ហាញនៅពិធីតាំងពិព័រណ៍ កសិករផលិតអំបិលម្នាក់បានថ្លែងទាំងមិនសប្បាយចិត្តថា គាត់លក់បានតែ 10 ការ៉ុងប៉ុណ្ណោះក្នុងឆ្នាំ 2021 បើធៀបនឹងកាលពីប៉ុន្មានឆ្នាំមុនដែលគាត់ធ្លាប់លក់បាន 500 ទៅ 600 ការ៉ុងឯណោះ។ នៅប៉ែកខាងត្បូងជ្រៅរបស់ប្រទេសថៃ គឺជាតំបន់ក្រីក្របំផុតរបស់ប្រទេសនេះ។ នៅក្នុងខេត្តប៉ាតានី (Pattani) អត្រានៃភាពក្រីក្រមាន 34,2% បើធៀបនឹង 6% នៅទូទាំងប្រទេស នេះបើយោងតាមរបាយការណ៍របស់ធនាគារពិភពលោកក្នុងឆ្នាំ 2019។
ពិព័រណ៍ដែលបានរៀបចំឡើងដោយលោក Hadee ក៏មានការបង្ហាញអំពីសិប្បកម្ម និងការសរសេរអក្សរផ្ចង់ ការប្រគុំតន្ត្រី ការគូរគំនូរលើទូក ការគូរគំនូរលើក្រណាត់សំពត់ និងការបង្ហាញពីការធ្វើម្ហូប ក្នុងចំណោមសកម្មភាពផ្សេងៗទៀត។ លោក Hadee ដែលជាសមាជិករបស់ Melayu Living ដែលជាសហករណ៍របស់វិចិត្រករដែលមានមូលដ្ឋាននៅខេត្តប៉ាតានី (Pattani) បានថ្លែងថា៖ «យើងចង់ផ្សព្វផ្សាយអត្តសញ្ញាណក្នុងស្រុក វប្បធម៌ក្នុងស្រុក បេតិកភណ្ឌក្នុងស្រុក សម្លៀកបំពាក់ក្នុងស្រុក និងចំណេះដឹងក្នុងស្រុក»។
ផ្នែកមួយនៃកម្មវិធី «Field Work» របស់ស្ថាបត្យករ-វិចិត្រករ Savinee Buranasilapin បានបង្ហាញកញ្ចក់រាងជារង្វង់តូចៗចំនួន 600 ដែលកញ្ចក់នីមួយៗត្រូវបានដំឡើងនៅលើកំណាត់ដែកដែលដាំនៅកណ្តាលផ្ទៃអំបិលរាបស្មើនៅ Na kluea Laem Nok នៅខាងក្រៅក្រុង។ ទស្សនៈនេះគឺដើម្បីឆ្លុះបញ្ចាំងពីអតីតកាលនៃការជួញដូរអំបិលរបស់ខេត្តប៉ាតានី (Pattani) នៅពេលដែលកប៉ាល់ពាណិជ្ជករចូលចតនៅជិតពន្លឺភ្លើងផ្លេកៗនៃទីក្រុង។
លោក Nattapon Pichairat មានអាយុ 40 ឆ្នាំគឺជាវិចិត្រករ និងជាអ្នករចនាក្រណាត់ បានគូរគំនូររុក្ខជាតិដែលប្រទះឃើញនៅជុំវិញវាលស្រែអំបិលនៅលើក្រដាស ហើយក្រោយមកបានបោះពុម្ពគំនូររុក្ខជាតិទាំងនោះជាឌីជីថលនៅលើក្រណាត់។ លោកបានថ្លែងថា៖ «ខ្ញុំបានជ្រើសរើសរុក្ខជាតិ ព្រោះវត្ថុតូចៗដ៏ស្រស់ស្អាតទាំងនេះហើយ ដែលនាំមកនូវសេចក្តីរីករាយ និងសន្តិភាពដ៏ប្រសើរ… ខ្ញុំចង់ប្រាប់អ្នកដទៃអំពីភាពស្រស់ស្អាត និងធម្មជាតិនៃខេត្តប៉ាតានី (Pattani) និងតំបន់ក្បែរនោះ»។ គាត់បានបន្ថែមទៀតថា គាត់ចង់ «ស្រមៃមើលទីក្រុងឡើងវិញជាមជ្ឈមណ្ឌលវប្បធម៌»។
នៅក្នុង «Le Sel de La Vie [The Salt of Life (អំបិលគឺជាជីវិត)]» លោក Emsophian Benjametha បានបង្ហាញគ្រឿងសិប្បកម្មធ្វើពីសេរ៉ាមិចដែលបំផុសគំនិតដោយ «sweet salt» (អំបិលផ្អែម) របស់ខេត្តប៉ាតានី (Pattani) ចាប់ពីដំណើរការផលិតរហូតដល់គោលដៅ។ «បើគ្មានអំបិល ក៏គ្មានជីវិតដែរ។ បើគ្មានជីវិត ក៏គ្មានសិល្បៈដែរ។ បើគ្មានសិល្បៈ ក៏គ្មានអារ្យធម៌ដែរ» នេះបើតាមអ្នករចនាម៉ូដ និងវិចិត្រករវ័យ 43 ឆ្នាំដែលទទួលបានការបណ្តុះបណ្តាលនៅប្រទេសបារាំងរូបនេះបានលើកឡើង។ «អ្នករាល់គ្នាទទួលបានការស្វាគមន៍នៅខេត្តប៉ាតានី (Pattani) ដែលជាទីក្រុងតូចមួយដែលមានទឹកចិត្តទូលំទូលាយ ហើយមានប្រវត្តិដ៏យូរលង់ និងសម្បូរបែប។ ខេត្តនេះមិនមានការបំផ្ទុះគ្រាប់បែក និងគ្រោះថ្នាក់នោះទេ។ មានរបស់ល្អៗជាច្រើននៅទីនេះ៖ សិប្បកម្ម ការរចនា អាហារ ផ្ទះចាស់ៗ»។
តំបន់ដែលពេលនេះបង្កើតបានជាប៉ែកខាងត្បូងជ្រៅរបស់ប្រទេសថៃធ្លាប់ជាចំណុចកណ្ដាលនៃរដ្ឋមូស្លីមដែលរួមបញ្ចូលខេត្តជិតខាងមួយចំនួន។ អង់គ្លេសបានប្រគល់តំបន់នេះទៅឱ្យប្រទេសថៃ ដែលបានបញ្ចូលជាឧបសម្ពន្ធនៅក្នុងឆ្នាំ 1909។ ក្រុមផ្តាច់ខ្លួនបានធ្វើការបះបោរតាំងពីទសវត្សរ៍ឆ្នាំ 1960។
លោកស្រី Rueanglada Punyalikhit ជាសាស្ត្រាចារ្យនៅសាកលវិទ្យាល័យ Silpakorn បានមានប្រសាសន៍ថា ព្រឹត្តិការណ៍ដូចជា «Deep Salt» ជាដើម ជួយតំបន់នេះឱ្យលុបបំបាត់រូបភាពហិង្សារបស់ខ្លួន។ ជាផ្នែកមួយនៃកិច្ចខិតខំប្រឹងប្រែងនោះ លោកស្រីជួយសហគ្រិនក្នុងស្រុកបង្កើតផលិតផលធម្មជាតិប្រកបដោយភាពច្នៃប្រឌិត រួមមានឱសថ អាហារ ភេសជ្ជៈ វាយនភណ្ឌ និងសិប្បកម្ម ដែលផលិតពីវត្ថុធាតុដើមក្នុងស្រុក។ លោកស្រី Rueanglada បានថ្លែងថា៖ «វាមិនសមហេតុផលទេដែលមានតែអំពើហិង្សាមួយមុខដែលជាកត្តាកំណត់អត្តសញ្ញាណរបស់អ្នកនោះ»។ «ពីខាងក្រៅ ស្ថានភាពមើលទៅមិនល្អទេ ដោយសារព័ត៌មានអំពីអំពើហិង្សា។ ប៉ុន្តែពេលអ្នកមកទីនេះ អ្នកអាចឃើញថាជីវិតគឺមានភាពធម្មតា ហើយវាមិនគ្រោះថ្នាក់ដូចអ្នកដទៃគិតនោះទេ»។
ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។