ក្រុមអ្នកសារព័ត៌មាន៖ អ្នកចាប់ឃុំឃាំងអ្នកសារព័ត៌មានទូទាំងពិភពលោកដ៏ធំបំផុតនៅទីក្រុងប៉េកាំង
The Associated Press
សាធារណៈរដ្ឋប្រជាមានិតចិន (PRC) គឺជាអ្នកចាប់ឃុំឃាំងអ្នកសារព័ត៌មានដ៏ធំបំផុតរបស់ពិភពលោកក្នុងឆ្នាំ 2022 ដែលមានជាង 100 នាក់នៅពីក្រោយការឃុំឃាំង ដោយសារបក្សកុម្មុយនិស្តចិន (CCP) ក្រោមការដឹកនាំរបស់អគ្គលេខាធិការ លោក Xi Jinping បានរឹតបន្តឹងការគ្រប់គ្រងលើសង្គម។
បក្សកុម្មុយនិស្តចិន ក៏ជាអ្នកនាំចេញដ៏ធំបំផុតមួយនៃខ្លឹមសារឃោសនាផងដែរ នេះបើយោងតាមអង្គការអ្នករាយការណ៍ព័ត៌មានគ្មានព្រំដែន។ សាធារណរដ្ឋប្រជាមានិតចិន ជាប់ចំណាត់ថ្នាក់លេខពីរបើរាប់ពីក្រោមនៅលើសន្ទស្សន៍សេរីភាពសារព័ត៌មានប្រចាំឆ្នាំរបស់ក្រុម ដែលនៅពីក្រោយតែកូរ៉េខាងជើងប៉ុណ្ណោះ។
បក្សកុម្មុយនិស្តចិន បានរឹតបន្តឹងការគ្រប់គ្រងយ៉ាងតឹងរ៉ឹងលើប្រព័ន្ធផ្សព្វផ្សាយក្នុងប្រទេសចិន ដែលរាល់កាសែត និងប្រព័ន្ធផ្សព្វផ្សាយទាំងអស់គឺជារបស់រដ្ឋ។ គេហទំព័រ និងវេទិកាប្រព័ន្ធផ្សព្វផ្សាយត្រូវបានតម្រូវឱ្យត្រួតពិនិត្យសម្ភារចាក់ផ្សាយ ដែលអាចធ្វើការមានការប្រឆាំងរីករាលដាលចំពោះរបបគ្រង់គ្រងដែលមានតែមួយបក្សនេះ។ (រូបភាព៖ អ្នកគាំទ្រដល់សេរីភាពសារព័ត៌មានប្រមូលផ្តុំគ្នានៅក្រៅតុលាការមួយកន្លែងក្នុងទីក្រុងហុងកុងកាលពីឆ្នាំ 2021។)
ក្នុងអំឡុងកិច្ចប្រជុំឆ្នាំ 2016 ជាមួយនឹងអ្នកសារព័ត៌មាន ដែលទទួលបានរង្វាន់ជាផ្លូវការនោះ លោក Xi បានអំពាវនាវដល់ពួកគេឱ្យគោរពតាម «ការតម្រង់ទិសដៅដ៏ត្រឹមត្រូវនៃមតិសាធារណៈ»។
អង្គការអ្នករាយការណ៍គ្មានព្រំដែន (Reporters Without Borders) បានលើកឡើងក្នុងរបាយការណ៍មួយ ដែលបានចេញប្រកាសកាលពីដើមខែឧសភា ឆ្នាំ 2023 ថា លោក Xi កំពុងតែព្យាយាមចង់សម្រេចនូវ «សង្គ្រាមប្រឆាំងនឹងសារព័ត៌មាន» ដោយហៅការធ្លាក់ចុះសេរីភាពសារព័ត៌មានរបស់សាធារណរដ្ឋប្រជាមានិតចិនថាជា «មហន្តរាយ» មួយ។
ទីក្រុងប៉េកាំងប្រតិបត្តិសកម្មភាពមួយ ដែលគេចាត់ទុកថាជាប្រព័ន្ធគ្រប់គ្រងអ៊ីនធឺណិតដ៏ធំបំផុតរបស់ពិភពលោក។ តម្រងរបស់ប្រព័ន្ធនេះព្យាយាមរាំងខ្ទប់សាធារណៈជនចិនពីការចូលមើលគេហទំព័របរទេស ដែលដំណើរការដោយកាសែតសារព័ត៌មាន រដ្ឋាភិបាល និង ក្រុមសិទ្ធិមនុស្ស និង ក្រុមសកម្មជនផ្សេងទៀត។
អ្នកកាសែតចិនត្រូវបានកាត់ទោសពីបទចារកិច្ច ការធ្វើឱ្យលេចធ្លាយព័ត៌មានសម្ងាត់ជាតិ និងការរករឿងជម្លោះ ដោយមានការចោទប្រកាន់មិនច្បាស់លាស់ ដើម្បីប្រើដាក់អ្នកប្រឆាំងក្នុងពន្ធាគារ។ អ្នកផ្សេងទៀតក៏ធ្លាក់ខ្លួនចូលក្រោមការសង្កេតតាមដាន ការបំភិតបំភ័យ និងការយាយីនានា។
អ្នកសារព័ត៌មានឈ្មោះ Dong Yuyu ដែលបានធ្វើការឱ្យកាសែតដែលជាបុត្រសម្ព័ន្ធរបស់បក្សកុម្មុយនិស្តចិន និងជាអតីតនិស្សិតបញ្ចប់ការសិក្សានៅសាកលវិទ្យាល័យ Harvard នៅសហរដ្ឋអាមេរិក ប្រឈមមុខនឹងការចោទប្រកាន់ពីបទចារកម្ម បន្ទាប់ពីត្រូវបានគេឃុំខ្លួនអស់រយៈពេលជាងមួយឆ្នាំ នោះបើតាមសម្តីរបស់គ្រួសារលោកកាលពីចុងខែមេសា ឆ្នាំ 2023។
កាលពីឆ្នាំ 2022 អ្នកសារព័ត៌មានសញ្ជាតិអូស្ត្រាលី ដែលមានកំណើតពីប្រទេសចិនម្នាក់ឈ្មោះ Cheng Lei ត្រូវបានគេកាត់ទោសក្នុងសាធារណរដ្ឋប្រជាមានិតចិនពីបទចោទប្រកាន់អំពីសន្តិសុខជាតិ ប៉ុន្តែមិនទទួលបានសាលក្រមនោះទេ នេះបើយោងតាមសម្ដីរដ្ឋមន្ត្រីក្រសួងការបរទេស Penny Wong កាលពីខែមីនា ឆ្នាំ 2023។
លោកស្រី Cheng បានធ្វើការឱ្យទូរទស្សន៍ CGTN ជាទូរទស្សន៍ភាសាអង់គ្លេសដែលដំណើរការដោយរដ្ឋ ដែលមានទស្សនិកជននៅក្រៅប្រទេសជាគោលដៅ។ លោកស្រីត្រូវបានឃុំខ្លួនក្នុងខែសីហា ឆ្នាំ 2019 ហើយត្រូវបានចោទប្រកាន់ពីបទចែករំលែកការសម្ងាត់របស់រដ្ឋ។
នៅហុងកុង បក្សកុម្មុយនិស្តចិន បានបង្ខំឱ្យបិទកាសែត Apple Daily ដែលជាផ្នែកមួយនៃការបង្ក្រាបលើមនោសញ្ចេតនាគាំទ្រលទ្ធិប្រជាធិបតេយ្យ។
ស្ថាបនិកក្រុមហ៊ុន Apple Daily លោក Jimmy Lai ត្រូវបានកាត់ឱ្យជាប់ទោសពីបទក្លែងបន្លំក្នុងឆ្នាំ 2022 ដែលអ្នកគាំទ្ររបស់លោកជំទាស់ថាមានហេតុផលនយោបាយ។ អតីតនាយកប្រតិបត្តិរបស់កាសែតចំនួនប្រាំមួយនាក់ផ្សេងទៀតបានសារភាពកំហុស។
ប្រភពរូបភាព៖ THE ASSOCIATED PRESS
ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។
