រដ្ឋមន្ត្រីការបរទេសជប៉ុនព្រមានថា សាធារណរដ្ឋប្រជាមានិតចិន និងរុស្សីបង្កើនកិច្ចសហប្រតិបត្តិការយោធា

The Associated Press

រដ្ឋមន្ត្រីការបរទេសជប៉ុនលោក Yoshimasa Hayashi បានសម្តែងការព្រួយបារម្ភនៅពាក់កណ្តាលខែឧសភា ឆ្នាំ 2023 អំពីកិច្ចសហប្រតិបត្តិការយោធារបស់ចិន និងរុស្សីនៅក្នុងតំបន់ ហើយបាននិយាយថា ស្ថានភាពសន្តិសុខនៅអឺរ៉ុបមិនអាចបំបែកចេញពី​ស្ថានភាពនៅក្នុងឥណ្ឌូប៉ាស៊ីហ្វិកបានទេ ចាប់តាំងពីការឈ្លានពានរបស់ទីក្រុងមូស្គូទៅលើអ៊ុយក្រែន។

លោក Hayashi បាននិយាយថា សង្រ្គាមរបស់រុស្សីនៅអ៊ុយក្រែនបាន «ធ្វើ​ឱ្យ​រង្គោះរង្គើមូលដ្ឋានគ្រឹះនៃសណ្តាប់ធ្នាប់អន្តរជាតិ» ហើយត្រូវតែប្រឈមមុខនឹងការឆ្លើយតបដោយឯកភាពគ្នា​ពីសហគមន៍ពិភពលោក។

លោក Hayashi បានប្រាប់កិច្ចប្រជុំរដ្ឋមន្ត្រីការបរទេសអឺរ៉ុប និងឥណ្ឌូប៉ាស៊ីហ្វិកក្នុងប្រទេសស៊ុយអែតថា៖ «បើមិនដូច្នេះទេ បញ្ហាប្រឈមស្រដៀងគ្នានឹងកើតឡើងនៅក្នុងតំបន់ផ្សេងទៀត ហើយសណ្តាប់ធ្នាប់ដែលមានស្រាប់ដែលបានគាំទ្រដល់សន្តិភាព និងវិបុលភាពរបស់យើង អាចនឹង​បាត់​បង់ទាំងស្រុង»។ (រូបភាពពីឆ្វេង៖ រដ្ឋមន្ត្រីការបរទេសស៊ុយអែត Tobias Billstrom រដ្ឋមន្ត្រីការបរទេសជប៉ុន Yoshimasa Hayashi និងប្រធានគោលនយោបាយការបរទេសរបស់សហភាពអឺរ៉ុប លោក Josep Borrell ជួបប្រជុំគ្នានៅជិតរដ្ឋធានី Stockholm ប្រទេសស៊ុយអែត ក្នុងខែឧសភា ឆ្នាំ 2023។)

ជប៉ុន​គាំទ្រ​អ៊ុយក្រែន​យ៉ាង​រឹងមាំ​ក្នុង​សង្រ្គាម ប៉ុន្តែ សាធារណរដ្ឋប្រជាមានិតចិនអះអាង​ថា​ខ្លួន​នៅ​តែ​អព្យាក្រឹត ខណៈ​ដែល​ប្រកាស​ទំនាក់ទំនង «គ្មាន​ដែន​កំណត់» ជាមួយ​ក្រុង​មូស្គូ ហើយ​បាន​បន្ទោស​អង្គការ​ណាតូ និង​សហរដ្ឋអាមេរិក​ចំពោះ​ការ​បង្ក​ជម្លោះ។ នាយករដ្ឋមន្ត្រីជប៉ុន លោក Fumio Kishida បានទៅបំពេញទស្សនកិច្ចនៅរដ្ឋធានី Kyiv ប្រទេសអ៊ុយក្រែន ក្នុងខែមីនា ឆ្នាំ 2023 ខណៈដែលអគ្គលេខាធិការបក្សកុម្មុយនិស្តចិន (CCP) លោក ស៊ី ជីនពីង (Xi Jinping) កំពុងជួបជាមួយប្រធានាធិបតីរុស្សី លោក វ្ល៉ាឌីមៀ ពូទីន (Vladimir Putin) នៅទីក្រុងមូស្គូ។

លោក Hayashi បានចោទប្រកាន់ទីក្រុងប៉េកាំងថា «បន្តនិងបង្កើនការប៉ុនប៉ងឯកតោភាគីរបស់ខ្លួន» ដើម្បីផ្លាស់ប្តូរស្ថានភាពបច្ចុប្បន្ននៅក្នុងសមុទ្រចិនខាងកើត និងខាងត្បូងដោយប្រើកម្លាំង និងការបង្កើនសកម្មភាពយោធារបស់ខ្លួននៅជុំវិញកោះតៃវ៉ាន់ដែលជាកោះស្វ័យគ្រប់គ្រង​ដែលបក្សកុម្មុយនិស្ត​ចិន (CCP) អះអាងថាជាទឹកដីរបស់ខ្លួន។

លោក Hayashi បាននិយាយថា៖ «លើសពីនេះ ចិន និងរុស្សីកំពុងពង្រឹងកិច្ចសហប្រតិបត្តិការយោធារបស់ពួកគេ រួមទាំងការហោះហើរ​យន្តហោះទម្លាក់គ្រាប់បែករបស់ពួកគេរួម​គ្នា និងសមយុទ្ធកងទ័ពជើងទឹករួមគ្នានៅក្នុងតំបន់ជុំវិញប្រទេសជប៉ុន»។

សាធារណរដ្ឋប្រជាមានិតចិនទាមទារតំបន់​ភាគច្រើននៃសមុទ្រចិនខាងត្បូង – បើទោះបីជាមានការច្រានចោលនាឆ្នាំ 2016 របស់តុលាការអន្តរជាតិចំពោះការទាមទារដោយបំពាន និងកាន់តែរីករាលដាល​ទាំងនោះថាមិនត្រឹមត្រូវ – ក៏ដូចជាកោះដែលគ្រប់គ្រងដោយជប៉ុននៅសមុទ្រចិនខាងកើត។

លោក Hayashi ក៏បានព្រមានផងដែរថា កូរ៉េខាងជើងកំពុងតែ «បង្កើនការបង្កហេតុ» នៅក្នុងតំបន់ដោយធ្វើការបាញ់មីស៊ីលផ្លោង «ជាមួយនឹងភាពញឹកញាប់​ និងក្នុងលក្ខណៈដែលមិនធ្លាប់មានពីមុនមក»។

លោកបានចូលរួមជាមួយរដ្ឋមន្ត្រីរាប់សិបនាក់មកពីសហភាពអឺរ៉ុប និងឥណ្ឌូប៉ាស៊ីហ្វិកសម្រាប់កិច្ចប្រជុំនៅភាគខាងជើងនៃរដ្ឋធានី Stockholm ប្រទេសស៊ុយអែត។

លោក Hayashi បានមានប្រសាសន៍ថា៖ «ចាប់តាំងពីការឈ្លានពានរបស់រុស្សីមកលើអ៊ុយក្រែន ស្ថានភាពសន្តិសុខនៅ​អឺរ៉ុបនេះ និងស្ថានភាពសន្តិសុខនៅប៉ាស៊ីហ្វិក មិនអាចបំបែកចេញពីគ្នាបានឡើយ»។

ប្រទេសនៅសហភាពអឺរ៉ុបភាគច្រើនបានផ្តល់ការគាំទ្រផ្នែកយោធាដល់អ៊ុយក្រែន ហើយប្លុកនេះបានដាក់ទណ្ឌកម្មលើរុស្សី។

សាធារណរដ្ឋប្រជាមានិតចិនមិនទទួលបាន​ការអញ្ជើញ​នៅក្នុង​កិច្ច​ពិភាក្សា​នេះទេ។

លោក Josep Borrell ប្រធានគោលនយោបាយការបរទេសរបស់សហភាពអឺរ៉ុបបានមានប្រសាសន៍ថា៖ «យើងអាចពិភាក្សាបានយ៉ាងល្អឥតខ្ចោះអំពីឥណ្ឌូប៉ាស៊ីហ្វិកដោយគ្មានប្រទេសចិន»។ «នេះមិនមែនមានន័យថាយើង​មិន​អើពើ​នឹង​ប្រទេសចិន​នោះទេ។ មិនមែនមានន័យថា​យើង​ចង់​ជំនួយ​ប្រទេសចិន​នោះទេ»។

ប្រភពរូបភាព៖ សារព័ត៌មាន REUTERS

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។