តំបន់អាស៊ីអគ្នេយ៍ / SEAភាពជាដៃគូ

មេដឹកនាំអាស៊ីអាគ្នេយ៍ជំរុញឱ្យបញ្ចប់អំពើហិង្សានៅមីយ៉ាន់ម៉ា និងឱ្យមានកិច្ចពិភាក្សារួមបញ្ចូលគ្នា

សារព័ត៌មាន REUTERS

មេដឹកនាំអាស៊ីអាគ្នេយ៍ដែលជួបប្រជុំនៅប្រទេសឥណ្ឌូណេស៊ីបានអំពាវនាវឱ្យបញ្ចប់ជាបន្ទាន់នូវ​អំពើហិង្សានៅក្នុងប្រទេសភូមា ដែលគ្រប់គ្រងដោយយោធា ក្នុងកិច្ចខិតខំប្រឹងប្រែងដើម្បីបង្កើតចន្លោះពេល​សម្រាប់កិច្ចពិភាក្សា និងការផ្តល់ជំនួយមនុស្សធម៌ ខណៈដែលការប្រយុទ្ធកាន់តែមានខ្លាំងឡើង។

មេដឹកនាំនៃសមាគមប្រជាជាតិអាស៊ីអាគ្នេយ៍ (អាស៊ាន) បាននិយាយនៅក្នុងសេចក្តីថ្លែងការណ៍រួមមួយក្នុងអំឡុងពេលកិច្ចប្រជុំកំពូលខែឧសភា ឆ្នាំ 2023 របស់ពួកគេថា៖ «យើងមានការព្រួយបារម្ភយ៉ាងខ្លាំងចំពោះអំពើហិង្សាដែលកំពុងបន្តនៅក្នុងប្រទេសភូមា និងបានជំរុញឱ្យបញ្ឈប់ជាបន្ទាន់នូវរាល់ទម្រង់នៃអំពើហិង្សា និងការប្រើប្រាស់កម្លាំងនានា»។

ពួកគេបានអំពាវនាវឱ្យមាន «បរិយាកាសអំណោយផលសម្រាប់ការផ្តល់ជំនួយមនុស្សធម៌ប្រកបដោយសុវត្ថិភាព និងទាន់ពេលវេលា និងការសន្ទនាថ្នាក់ជាតិដែលមានលក្ខណៈរួមបញ្ចូលគ្នា​» ។

កិច្ចប្រជុំកំពូលរបស់ប្លុកដែលមានសមាជិកទាំង 10 ប្រទេស​នេះ​បានកើតឡើង នៅពេលដែលយោធាភូមា បង្កើនការវាយប្រហារ និងបើកការវាយប្រហារតាមអាកាសទៅលើកងកម្លាំងប្រឆាំង​ និងក្រុមជនជាតិភាគតិច ខណៈដែលខ្លួនព្យាយាមពង្រឹងអំណាចនៅមុនការបោះឆ្នោតដែលបានគ្រោងទុក។ ប៉ុន្មានថ្ងៃមុននេះ អ្នកវាយប្រហារមិនស្គាល់មុខ បានបាញ់ប្រហារទៅលើក្បួនរថយន្តអ្នកការទូតប្រចាំតំបន់ក្នុងប្រទេសភូមា ដែលកំពុងផ្តល់សម្ភារផ្គត់ផ្គង់ដល់មនុស្សជាង 1,3 លាននាក់ដែលផ្លាស់ទីលំនៅដោយសារជម្លោះ។

របបយោធាដែលបានដណ្តើមអំណាចនៅក្នុងរដ្ឋប្រហារខែកុម្ភៈឆ្នាំ 2021 នេះ​​មិនបានបង្ហាញឱ្យ​ឃើញនូវចេតនា​បន្តផែនការសន្តិភាពដែលបានព្រមព្រៀងគ្នាកាលពីខែមេសាឆ្នាំ 2021 ជាមួយអាស៊ាននោះទេ។

ប្រធានាធិបតី​ឥណ្ឌូណេស៊ី Joko Widodo ដែលជាប្រធាន​​អាស៊ាន​បច្ចុប្បន្នបាន​អំពាវនាវ​ឲ្យ​ប្លុក​នេះរួប​រួម​មតិ​ជាធ្លុង​មួយ​ចំពោះ​បញ្ហា​​លំបាក​ដែល​ខ្លួន​ប្រឈម​​ក្នុង​តំបន់។

លោកមានប្រសាសន៍ថា៖ «តើ​អាស៊ាន​នឹង​នៅ​ស្ងៀម ឬ​ តើ​អាស៊ាន​នឹង​អាច​ក្លាយ​ជា​អ្នក​ជំរុញ​សន្តិភាព​ឬ​ការ​រីក​ចម្រើន?»

អាស៊ានដែលមានគោលនយោបាយមិនជ្រៀតជ្រែកក្នុងកិច្ចការផ្ទៃក្នុងរបស់សមាជិក ​កាន់តែមានលក្ខណៈជំរុញ​ខ្លាំងឡើងជាមួយរបបយោធាភូមា ជុំវិញការបរាជ័យរបស់ខ្លួនក្នុងការអនុវត្ត «ការឯកភាព» ចំពោះប្រាំចំណុចដើម្បីសន្តិភាព ដែលនាយឧត្តមសេនីយ៍កំពូលរបស់ប្រទេស​នេះបានយល់ព្រមបន្ទាប់ពីរដ្ឋប្រហារបានបង្កឱ្យមានភាពចលាចល និងការបង្ហូរឈាម។ អង្គការសហប្រជាជាតិបានរាយការណ៍ថាគិតត្រឹមខែមីនាឆ្នាំ 2023 នេះ ជនស៊ីវិលជាង 3 000 នាក់​បានបាត់បង់ជីវិត ហើយយ៉ាងហោចណាស់មានអ្នកប្រឆាំងនយោបាយ 16 000 នាក់ត្រូវបានគេចាប់ដាក់គុក។

នាយករដ្ឋមន្ត្រីម៉ាឡេស៊ី លោក Anwar Ibrahim បាននិយាយថា៖ «ប្រទេសម៉ាឡេស៊ីមានការខកចិត្តចំពោះការនៅតែបន្តខ្វះខាត​ការវិវឌ្ឍប្រកបដោយអត្ថន័យ និងប្រាកដនិយមក្នុងការអនុវត្តផែនការនេះ»។

មេដឹកនាំរបបយោធារបស់​ភូមា ត្រូវបានហាមឃាត់មិនឱ្យចូលរួមក្នុងកិច្ចប្រជុំអាស៊ានកម្រិតខ្ពស់ រហូតដល់ពួកគេគោរពកិច្ចព្រមព្រៀងសន្តិភាព ដែលរួមមានការបញ្ឈប់អរិភាពនានា។

រដ្ឋមន្ត្រីការបរទេសឥណ្ឌូណេស៊ី លោកស្រី Retno Marsudi បាននិយាយកាលពីពេលថ្មីៗនេះថា ទីក្រុងហ្សាការតាបានទាក់ទង​យោធារបស់ប្រទេសភូមា និងរដ្ឋាភិបាលក្រៅផ្លូវការ​របស់ប្រទេស ក៏ដូចជាក្រុមជនជាតិភាគតិចប្រដាប់អាវុធ ដើម្បីព្យាយាមចាប់ផ្តើមកិច្ចចរចាសន្តិភាព។

រដ្ឋមន្ត្រីការបរទេសហ្វីលីពីន លោក Enrique Manalo បាននិយាយថា «អាស៊ានកំពុងធ្វើអ្វីជាច្រើនដែលអាចធ្វើទៅបាន ពីព្រោះនៅពេលដែលអ្នកទៅដល់ទីនោះ វាមិនងាយស្រួលនោះទេ»។

មេដឹកនាំអាស៊ានក៏បានចេញសេចក្តីប្រកាសរួមជាបន្តបន្ទាប់ រួមទាំងការប្តេជ្ញាចិត្តក្នុងការប្រយុទ្ធប្រឆាំងនឹងការជួញដូរមនុស្ស ការពារពលករចំណាកស្រុក និងគាំទ្រដល់ឧស្សាហកម្មរថយន្តអគ្គិសនីនៅទូទាំងតំបន់។

 

ប្រភពរូបភាព៖ សារព័ត៌មាន REUTERS


ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។

អត្ថបទ​ដែល​ទាក់ទង

ឆ្លើយ​តប

អាសយដ្ឋាន​អ៊ីមែល​របស់​អ្នក​នឹង​មិន​ត្រូវ​ផ្សាយ​ទេ។ វាល​ដែល​ត្រូវ​ការ​ត្រូវ​បាន​គូស *

Back to top button