ជប៉ុន និងអាមេរិកសហការលើការការពារហេដ្ឋារចនាសម្ព័ន្ធផ្កាយរណបសំខាន់ៗ

Tom Abke

ការបណ្តាក់ទុនរបស់ជប៉ុន និងអាមេរិក ដើម្បីការពារហេដ្ឋារចនាសម្ព័ន្ធផ្កាយរណបដ៏សំខាន់ប្រឆាំងនឹងសកម្មភាពប្រឆាំងផ្កាយរណបអរិភាព (ASAT) និងការបំផ្លាញ កម្ទេច​កម្ទី​អវកាសនឹងឈានដល់ទីបញ្ចប់នៅក្នុងឆ្នាំ 2023 និង 2024 ដែលមានផ្កាយរណបដែលបាញ់បង្ហោះនៅទីក្រុងតូក្យូដែលបំពាក់ជាមួយឧបករណ៍ចាប់សញ្ញាការយល់ដឹងអំពីស្ថានភាពអវកាស (SSA) ដែលផលិតដោយសហរដ្ឋអាមេរិក ក៏ដូចជាការបន្តកិច្ចសហប្រតិបត្តិការលើវិស័យឯកជន ដើម្បីបង្កើតផ្កាយរណបជាក់លាក់នៃការយល់ដឹងអំពីស្ថានភាពអវកាស។

លោក Bruce McClintock អ្នកដឹកនាំនៃគំនិតផ្តួចផ្តើមសហគ្រាសអវកាស នៅ Rand Corp. បានប្រាប់ទស្សនាវដ្តី FORUM ថា៖ «សមត្ថភាពផ្កាយរណបអាចដំណើរការមុខងារស្ទើរតែគ្រប់ទិដ្ឋភាពនៃជីវិតរបស់យើង ចាប់ពីរបៀបដែលយើងធ្វើកិច្ចការនៅក្នុងផ្ទះរបស់យើង ដល់វិស័យដឹកជញ្ជូន រហូតដល់បណ្តាញអគ្គិសនី ប្រព័ន្ធធនាគារ និងទំនាក់ទំនងជាសកលផងដែរ»។

ដើម្បីបង្ហាញពីភាពងាយរងគ្រោះនៃការវាយប្រហារលើផ្កាយរណបទាំងនេះ និងភាពងាយរងគ្រោះព្រោះតែកម្ទេចកម្ទី លោក McClintock បានលើកឡើងពីការសាកល្បងអាវុធប្រឆាំងផ្កាយរណបដោយសាធារណៈរដ្ឋប្រជាមានិតចិនក្នុងឆ្នាំ 2007 និងដោយប្រទេសរុស្ស៊ីក្នុងឆ្នាំ 2021 ដែលមិនត្រឹមតែបំផ្លាញផ្កាយរណបចាស់ៗមួយគូដែលជាកម្មសិទ្ធិរបស់ប្រទេសពួកគេនីមួយៗប៉ុណ្ណោះទេ ប៉ុន្តែថែមទាំងបង្កើតបាននូវកម្ទេចកម្ទីដ៏ច្រើនសន្ធឹកសន្ធាប់ ដែលធ្វើឱ្យទ្រព្យសម្បត្តិជុំវិញគន្លងផ្សេងទៀតប្រឈមនឹងហានិភ័យ រួមទាំង ស្ថានីយអវកាសអន្តរជាតិផងដែរ។

«ដើម្បីការពារផ្កាយរណប និងអវកាសយានិកពីកម្ទេចកម្ទីអវកាស ការយល់ដឹងឱ្យបានហ្មត់ចត់អំពីគន្លងរបស់ពួកវាគឺចាំបាច់ខ្លាំងណាស់។ ការដឹងអំពីស្ថានភាពអវកាសគឺជាគន្លឹះសម្រាប់ការយល់ដឹងបែបនេះ» យោងតាមទីភ្នាក់ងាររុករកអវកាសជប៉ុន (JAXA)។ «កិច្ចសហប្រតិបត្តិការជាមួយបណ្តាប្រទេសជុំវិញពិភពលោកមានសារៈសំខាន់ខ្លាំងណាស់ក្នុងការដោះស្រាយលើបញ្ហាកម្ទេចកម្ទីអវកាស»។

ប្រទេសជប៉ុននឹងបាញ់បង្ហោះផ្កាយរណបដែលបំពាក់ប្រព័ន្ធផ្កាយរណប Quasi-Zenith (QZSS) ជាមួយនឹងឧបករណ៍ចាប់សញ្ញាអុបទិកនៃប្រព័ន្ធការយល់ដឹងអំពីស្ថានភាពអវកាស នៅឆ្នាំ 2023 នេះបើយោងតាមទស្សនាវដ្តី Space News។ ឧបករណ៍ចាប់សញ្ញាអុបទិកត្រូវបានបង្កើតឡើងដោយមន្ទីរពិសោធន៍ Lincoln របស់វិទ្យាស្ថានបច្ចេកវិទ្យា Massachusetts។ ផ្កាយរណបបំពាក់ប្រព័ន្ធផ្កាយរណប Quasi-Zenith ទីពីរគ្រោងនឹងបាញ់បង្ហោះនៅឆ្នាំ 2024 ដែលបំពាក់ជាមួយឧបករណ៍ចាប់សញ្ញា Lincoln នៃប្រព័ន្ធការយល់ដឹងអំពីស្ថានភាពអវកាសផងដែរ។ ការបាញ់បង្ហោះទាំងពីរនឹងមកពីមជ្ឈមណ្ឌលអវកាស Tanegashima របស់ប្រទេសជប៉ុន ដូចបានបង្ហាញក្នុងរូបភាព។

កងកម្លាំងអវកាសអាមេរិកបានប្រកាសកាលពីក្នុងខែមករា ឆ្នាំ 2023 ថា ខ្លួនបានបញ្ជូនឧបករណ៍ចាប់សញ្ញាអុបទិកទៅប្រទេសជប៉ុនក្រោមអនុស្សរណៈនៃការយោគយល់ដែលខ្លួនបានចុះហត្ថលេខាជាមួយការិយាល័យគោលនយោបាយជាតិអវកាសរបស់ប្រទេសជប៉ុននៅក្នុងខែធ្នូ ឆ្នាំ 2020។

ផ្កាយរណបនេះនឹងបង្កើនសមត្ថភាពនៃការយល់ដឹងអំពីស្ថានភាពអវកាសរបស់ទីភ្នាក់ងាររុករកអវកាសជប៉ុន ដែលបច្ចុប្បន្នប្រើទិន្នន័យពីតេឡេស្កុបអុបទិក និងរ៉ាដា និងស្ថានីយរ៉ាដាដែលមានមូលដ្ឋានលើដី ដើម្បីវិភាគគន្លងគោចរនៃកម្ទេចកម្ទីអវកាស ភាពជិតរបស់វាទៅនឹងផ្កាយរណប និងការហោះធ្លាក់ចូលទៅក្នុងបរិយាកាសឡើងវិញ។ ដំណើរក្រោមគន្លងគោចរក្នុងរយៈចម្ងាយ 36 000 គីឡូម៉ែត្រ ផ្កាយរណបបំពាក់ប្រព័ន្ធផ្កាយរណប Quasi-Zenith ដែលមានសមត្ថភាពនៃការយល់ដឹងអំពីស្ថានភាពអវកាសនឹងត្រួតពិនិត្យខ្សែក្រវាត់ភូមិសាស្ត្រគន្លងគោចរ ដែលជាកន្លែងសម្រាប់ផ្កាយរណបទំនាក់ទំនង និងហេដ្ឋារចនាសម្ព័ន្ធសំខាន់ៗផ្សេងទៀត។

លោក McClintock បានលើកឡើងថា៖ «មានការរំពឹងទុកថាប្រទេសចិនទំនងជាកំពុងបន្តបង្កើតអាវុធប្រឆាំងផ្កាយរណបក្នុងភូមិសាស្ត្រគន្លងគោចរ»។ «ទីក្រុងប៉េកាំងបានបាញ់បង្ហោះវត្ថុមួយនៅក្នុងលំហនៅលើគន្លងចលនានៃការបាញ់គ្រាប់ដែលមានចម្ងាយលើសពី 30 000 គីឡូម៉ែត្រ ដែលនៅក្បែររយៈកម្ពស់ភូមិសាស្ត្រគន្លងគោចរទាំងនោះ»។

ដោយបានរចនា និងផលិតឡើងដោយក្រុមហ៊ុន IHI Corp របស់ប្រទេសជប៉ុន និងក្រុមហ៊ុន Northrop Grumman ដែលមានមូលដ្ឋាននៅសហរដ្ឋអាមេរិក ផ្កាយរណបមានប្រព័ន្ធយល់ដឹងអំពីស្ថានភាពអវកាសនេះ មានលក្ខខណ្ឌល្អក្នុងការចល័តដោយសារតែទំហំតូចរបស់វា ដែលអនុញ្ញាតឱ្យពួកវាចូលទៅជិតផ្កាយរណបគួរឱ្យសង្ស័យ និងរូបភាពបញ្ជូនបន្តសម្រាប់ការវិភាគ នេះបើយោងតាមទស្សនាវដ្តីព័ត៌មាន Nikkei Asia របស់ប្រទេសជប៉ុន។

ប្រភពរូបភាព៖ ទីភ្នាក់ងាររុករកអវកាសជប៉ុន

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។