សមយុទ្ធ លើកម្លំាង

ដៃគូយោធាក្នុងតំបន់ធ្វើឱ្យមានទំនាក់ទំនងឡើងវិញ និងពង្រឹងការត្រៀមខ្លួន

បុគ្គលិករបស់ទស្សនាវដ្តី FORUM

ពេលសាធារណរដ្ឋប្រជាមានិតចិន និងប្រទេស រុស្ស៊ីបានព្យាយាមបង្ហាញសមយុទ្ធយោធាទ្វេភាគីរបស់ខ្លួននាពាក់កណ្តាលឆ្នាំ 2022 ថាជាភស្តុតាង នៃមិត្តភាព «ឥតដែនកំណត់» ផ្ទុយទៅវិញប្រទេស ទាំងពីរនេះបានបង្ហាញចេញដោយមិនដឹងខ្លួននូវ ចំណុចខ្សោយនៃមិត្តភាពរបស់ខ្លួន ដែលធ្វើឱ្យការអះអាងដ៏ឱឡារិកនៃភាពជាដៃគូរបស់ប្រទេសទាំងពីរនេះស្តាប់ទៅហាក់ដូចជាមិនសូវមានភាពស្ថិតស្ថេរគង់វង្សល្អទេ។ ផ្ទុយពីសមយុទ្ធលើដែនអាកាស និងកងទ័ពជើងទឹករបស់ចិន-រុស្ស៊ី ដែលចូលចិត្តបង្កសង្គ្រាម — ត្រូវបានថ្កោលទោសដោយប្រទេសជប៉ុន និងកូរ៉េខាងត្បូង ជាមួយនឹងសមយុទ្ធនៃការរក្សាសន្តិភាពពហុជាតិសាសន៍ត្រូវបានធ្វើឡើងក្នុងពេលតែមួយក្បែរប្រទេសចិន និងរុស្ស៊ី។

សមយុទ្ធ Khaan Quest ឆ្នំា 2022 ដែលរៀបចំដោយកងកម្លាំងប្រដាប់អាវុធម៉ុងហ្គោលី រួមគ្នាជាមួយនឹងកងទ័ពសហរដ្ឋអាមេរិកប្រចំាតំបន់ប៉ាស៊ីហ្វិក បានទាក់ទាញសមាជិកយោធាមកពីប្រទេសនៃតំបន់ឥណ្ឌូប៉ាស៊ីហ្វិក និងអឺរ៉ុបចំនួន 15 ប្រទេសសម្រាប់ការហ្វឹកហាត់រួមគ្នារយៈពេលពីរសប្តាហ៍ដើម្បីបង្កើនយល់ដឹងអំពីឧបករណ៍បំផ្ទុះ ជំនួយសង្គ្រោះបឋមក្នុងការប្រយុទ្ធ និងការគ្រប់គ្រងកុប្បកម្ម ដែលបានធ្វើឡើងនៅក្នុងការសម្របសម្រួលជាមួយនឹងអង្គការមនុស្សធម៌។ លោកឧត្តមសេនីយ៍ទោ Chris Smith នៃកងទ័ពជើងគោកអូស្ត្រាលី ដែលត្រូវបានតែងតាំងជាអគ្គមេបញ្ជាការរងនៃយុទ្ធសាស្ត្រ និងផែនការសម្រាប់កងទ័ពអាមេរិកប្រចាំតំបន់ប៉ាស៊ីហ្វិកបានមានប្រសាសន៍ក្នុងសេចក្តីប្រកាស​ព័ត៌មានថា​៖ «នេះមិនត្រឹមតែជាឱកាសដ៏ល្អក្នុងការដោះដូរបទពិសោធន៍ និងបច្ចេកទេសប៉ុណ្ណោះទេ នេះគឺជាការបង្ហាញអំពីការប្តេជ្ញាចិត្តរបស់ប្រទេសដែលចូលរួមចំពោះធម្មនុញ្ញរបស់អង្គការសហប្រជាជាតិ និងអ្វីៗទាំងអស់ដែលខ្លួនគាំទ្រ និងប្រឆាំង»។ «ដល់ទីបញ្ចប់ សមយុទ្ធនេះទាញចេញពីភាពចម្រុះនៃអ្នកចូលរួមដែលភាពស៊ីសង្វាក់គ្នា ដោយសមយុទ្ធយោធាមួយចំនួនផ្សេងទៀតនៅជុំវិញពិភពលោក»។

ពីជម្រាលភ្នំនៃតំបន់អាស៊ីឦសានរហូតដល់ប្រជុំកោះដែលមានបន្ទុះភ្នំភ្លើងនៃមហាសមុទ្រប៉ាស៊ីហ្វិក ការបន្ធូរបន្ថយលើការបិទខ្ទប់នៃការរាតត្បាត និងការធ្វើច​ត្តា​ឡី​ស័កដែលបានរង់ចាំជាយូរមកហើយ បានធ្វើឱ្យមានការរីកចម្រើននៃសមយុទ្ធយោធាពហុភាគីនៅទូទាំងតំបន់ឥណ្ឌូប៉ាស៊ីហ្វិក ដោយមានការកើនឡើងកាន់តែច្រើនកាលពីប៉ុន្មានឆ្នាំមុន ដូចជាប្រទេសនានាដែលមានគំនិតដូចគ្នា ដើម្បីធ្វើឱ្យមានទំនាក់ទំនងឡើងវិញ និងពង្រឹងការត្រៀមខ្លួននៅក្នុងគ្រានៃភាពប្រែប្រួលភូមិសាស្ត្រនយោបាយ។ លោកឧត្តមសេនីយ៍ឯក Rick Burr មេបញ្ជាការកងទ័ពជើងគោកអូស្ត្រាលីបានថ្លែងប្រាប់ក្នុងអំឡុងពេលធ្វើសន្ទរកថាក្នុងកិច្ចប្រជុំរបស់គាត់នៅឯសន្និសីទកងកម្លាំងជើងគោកប្រចំាតំបន់ប៉ាស៊ីហ្វិក នៅហាវ៉ៃក្នុងខែឧសភា ឆ្នាំ 2022 ថា តួនាទីនៃការហ្វឹកហាត់ពហុជាតិសាសន៍ និងការត្រៀមខ្លួនរួមគ្នា ព្រមទំាងការរួបរួមក្នុងការពង្រឹងសម្ព័ន្ធភាព និងភាពជាដៃគូ គឺជាប្រធានបទដ៏សំខាន់។ លោក​បានថ្លែង​ថា ការ​សហការ​គ្នា «​ជួយ​ឱ្យយើង​ហ៊ានគិតធំជាង​អ្វីដែលយើងកំពុងគិត … ហើយ​ធ្វើ​ឲ្យ​ភាព​ធន់​របស់​យើង​មានការប្រសើរ​ឡើង។

លោក Burr បានថ្លែងប្រាប់អ្នកចូលរួមក្នុងសន្និសីទដ៏ធំបំផុតសម្រាប់កងទ័ពរបស់តំបន់ឥណ្ឌូប៉ាស៊ីហ្វិកថា ការលុកលុយដោយមិនញញើតរបស់ប្រទេសរុស្ស៊ីនៅដើមឆ្នាំ 2022 បានគូសបញ្ជាក់ពី «តម្លៃនៃភាពជាដៃគូ និងផលប្រយោជន៍រួមជុំវិញការការពារអធិបតេយ្យភាព»។ «ពីរដ្ឋាភិបាលមួយទៅរដ្ឋាភិបាលមួយទៀត ពីយោធាមួយទៅយោធាមួយទៀត ពីប្រជាជនមួយទៅប្រជាជនមួយទៀត — ការពង្រឹងសម្ព័ន្ធភាព និងភាពជាដៃគូនៅក្នុងតំបន់របស់យើង គឺជាធាតុដ៏សំខាន់នៃយុទ្ធសាស្ត្រការពារជាតិ ដើម្បីរៀបចំ ទប់ស្កាត់ និងឆ្លើយតប។ ការហ្វឹកហាត់ជាមួយកងកម្លាំងប្រដាប់អាវុធដទៃទៀត នំាឱ្យមានវត្តមាន និងកសាងសមត្ថភាព ព្រមទំាងមានការទំនាក់ទំនងគ្នានៅក្នុងតំបន់របស់យើង ហើយជួយយ៉ាងសកម្មក្នុងការរៀបចំស្ថិរភាព និងអធិបតេយ្យភាពក្នុងតំបន់»។

ការកសាងទំនុកចិត្ត អន្តរប្រតិបត្តិការ

មួយសប្តាហ៍បន្ទាប់ពីការអះអាងសារជាថ្មីលើកទី 18 នៃសមយុទ្ធ Khaan Quest ដែលបានបញ្ចប់នៅឯតំបន់ហ្វឹកហាត់ Five Hills ក្បែររដ្ឋធានីអ៊ូលេនបាធរ នៃប្រទេសម៉ុងហ្គោលី ប្រទេសអូស្ត្រាលីស្ថិតក្នុងចំណោមអ្នកចូលរួមទំាង 10 ប្រទេសដែលបានបញ្ជូនសមាជិកយោធា និងធនធានទៅកាន់ដែនទឹកជុំវិញប្រជុំកោះហាវ៉ៃ និងភាគខាងត្បូងនៃរដ្ឋកាលីហ្វ័រញ៉ាសម្រាប់សមយុទ្ធ Rim of the Pacific (RIMPAC)។ ​បើ​តាម​កង​ទ័ព​ជើង​ទឹក​អាមេរិកបានលើកឡើងថា ក្រោមប្រធានបទ «សមត្ថភាព សម្របខ្លួន ដៃគូ» សមយុទ្ធដែលកើតឡើងរយៈពេលពីរឆ្នាំម្តងដែលដឹកនាំដោយអាមេរិក ចាប់ពីចុងខែមិថុនា រហូតដល់ដើមខែសីហា ឆ្នាំ 2022 បានទាញយកសមាជិកយោធាចំនួន 25 000 នាក់ មកពីប្រមាណម្ភៃផ្លាយប្រទេសនៅក្នុងតំបន់ឥណ្ឌូប៉ាស៊ីហ្វិក អឺរ៉ុប មជ្ឈិមបូព៌ា អាមេរិកខាងជើង និងខាងត្បូង។ បានធ្វើឡើងជាលើកដំបូងនៅក្នុងឆ្នាំ 1971 សមយុទ្ធដែនសមុទ្រដ៏ធំបំផុតរបស់ពិភពលោកបានបង្ហាញពីប្រតិបត្តិការឆ្នេរសមុទ្រ ការប្រយុទ្ធប្រឆាំងទៅនឹងនាវាមុជទឹក ការការពារដែនអាកាស ការប្រើកាំភ្លើងធំ និងការបាញ់គ្រាប់មីស៊ីល ប្រតិបត្តិការដើម្បីការពារពីការលួចប្លន់តាមសមុទ្រ ប្រតិបត្តិការបោសសំអាតគ្រាប់មីន ការកម្ចាត់ចោលអាវុធដែលអាចផ្ទុះ ព្រមទំាងប្រតិបត្តិការមុជទឹក និងការជួយសង្គ្រោះ។

សម្រាប់កងកម្លាំងប្រដាប់អាវុធសិង្ហបុរី ដែលបានចូលរួមក្នុងសមយុទ្ធ Khaan Quest និង RIMPAC សមយុទ្ធបែបនេះពិតជាសំខាន់ណាស់ ដោយផ្តល់ឱ្យសមាជិកយោធារបស់ខ្លួនអាចចូលទៅកាន់កន្លែងហ្វឹកហាត់ជាច្រើនដង ដែលមានទំហំ 719 គីឡូម៉ែត្រការ៉េ ធំជាងប្រទេសរបស់ខ្លួនទៅទៀត។ លោកឧត្តមសេនីយ៍ត្រី Frederick Choo ដែលជានាយសេនាធិការកងទ័ពជើងគោកសឹង្ហបូរីបានលើកឡើងនៅក្នុងពេលធ្វើបទបង្ហាញរបស់គាត់ដែលមានចំណងជើងថា «ការហ្វឹកហាត់រួមបញ្ចូលគ្នា — បទពិសោធន៍របស់ប្រទេសសិង្ហបុរី និងឱកាសនាពេលអនាគត» នៅឯ LANPAC ថា៖ «ការហ្វឹកហាត់ឯកតោភាគី គឺជាធាតុផ្សំនៃផលប័ត្ររួមរបស់យើង»។ «ឱកាស​ហ្វឹកហាត់​ជាមួយ​កង​ទ័ព​ផ្សេង​ទៀត​គឺមានភាព​ស្មើ​គ្នា ប្រសិនបើមិនចំាបាច់ខ្លំាងនោះទេ។ ការហ្វឹកហាត់នេះអនុញ្ញាតឱ្យកងទ័ពអាចរៀនពីគ្នាទៅវិញទៅមក ពង្រឹងទំនាក់ទំនងមិត្តភាព កសាងទំនុកចិត្តគ្នាទៅវិញទៅមក និងបង្កើនសមត្ថភាពអន្តរប្រតិបត្តិការរបស់យើង។ សមយុទ្ធបែបនេះនៅក្នុងឆ្នាំដំបូងរបស់កងទ័ពសិង្ហបុរីបានអនុញ្ញាតឱ្យយើងអាចរៀន ដៅចំណុចគោល និងបង្កើនគុណវុឌ្ឍិបានយ៉ាងឆាប់រហ័ស។»

នាយករដ្ឋមន្ត្រីសិង្ហបុរី លោក Lee Hsien Loong បានមានប្រសាសន៍ក្នុងពេលធ្វើដំណើរទៅកាន់ទីក្រុងតូក្យូសម្រាប់សន្និសីទអន្តរជាតិកាលពីចុងខែឧសភា ឆ្នាំ 2022 កន្លងទៅនេះថា ដូចដែលប្រទេសនានាធ្វើការវាយតម្លៃឡើងវិញនូវស្ថានការណ៍ដើម្បីការពាររបស់ពួកគេ ក្នុងការយល់ដឹងអំពីសង្គ្រាមនៅទ្វីបអឺរ៉ុប និងភាពតានតឹងរបស់ពិភពលោកផ្សេងទៀត ដូច្នេះពួកគេគួរតែ «ធ្វើការឆ្ពោះទៅរកការបង្កើតសន្តិសុខបែបសមូហភាព ទោះបីជាពួកគេបង្កើនការការពារផ្ទាល់ខ្លួនក៏ដោយក្តី»។ យោងតាមកាសែត The Straits Times របស់ប្រទេសសិង្ហបុរី លោក Lee បានថ្លែងប្រាប់ថា៖ «សន្តិសុខមិនមែនគ្រាន់តែនិយាយ [អំពី] ប្រទេសផ្ទាល់ខ្លួនតែប៉ុណ្ណោះទេ… ដូច្នេះហើយ​យើង​​ត្រូវ​ធ្វើ​ការ​ជាមួយ​ប្រទេស​ផ្សេង​ទៀត​ដើម្បី​ធានា​បាននូវសន្តិសុខបែប​សមូហភាព​ផង​ដែរ‍»។ 

ការព្រួយបារម្ភរួមគ្នាជុំវិញបូរណភាពនៃអធិបតេយ្យភាពជាតិ រួមមានការប៉ុនប៉ងរបស់សាធារណរដ្ឋប្រជាមានិតចិនក្នុងការដណ្តើមយកសិទ្ធិអំណាចនៅក្នុងតំបន់នៃប្រជុំកោះប៉ាស៊ីហ្វិក រួមមានសន្ធិសញ្ញាសន្តិសុខដែលបានចុះហត្ថលេខាជាមួយកោះសូឡូម៉ុង ក្នុងខែឧសភា ឆ្នាំ 2022 ដែលបង្កឱ្យមានការខ្លាចញញើតទៅដល់មូលដ្ឋានយោធាចិនដែលកំពុងតែត្រូវបានសាងសង់នៅក្នុងកោះសូឡូម៉ុង ជា​ប្រទេស​មួយ​ដែល​មាន​ប្រជាជនចំនួន 700 000 នាក់​ដោយគ្មាន​កងកម្លាំង​យោធា​របស់​ខ្លួន។ សារព័ត៌មាន Associated Press បានរាយការណ៍ថា ទោះបីជាប្រទេសទាំងពីរបានបដិសេធថា ខ្លួនមិនមានគម្រោងសម្រាប់វត្តមានយោធាចិនជាអចិន្ត្រៃយ៍ — ជាការរំពឹងទុកដែលនាយករដ្ឋមន្ត្រីរបស់ប្រទេសនៃកោះនេះបានច្រានចោលម្តងទៀតក្នុងខែតុលា ឆ្នាំ 2022 ក៏ដោយ — ប៉ុន្តែការបែកធ្លាយនៃកិច្ចព្រមព្រៀងមួយបានកត់សម្គាល់ថានាវាចម្បាំងរបស់ចិនអាចឈប់ចតនៅកោះសូឡូម៉ុង សម្រាប់ការបំពេញបន្ថែមទៅលើផ្នែកភស្តុភារ ហើយថាបក្សកុម្មុយនិស្តចិនអាចបញ្ជូនប៉ូលិស និងកងកម្លាំងប្រដាប់អាវុធទៅទីនោះ «ដើម្បីជួយរក្សាសណ្តាប់ធ្នាប់សង្គម»។ អ្នកវិភាគក៏បានចង្អុលបង្ហាញទៅកំណត់ត្រាតាមដានរបស់បក្សកុម្មុយនិស្តចិន ដែលបំពានលើពាក្យសន្យារបស់ខ្លួនមិនទំនុកបម្រុងផ្នែកយោធាលើគ្រោងអាគារដែលខ្លួនបានសាងសង់នៅកន្លែងផ្សេងទៀត រួមមាននៅប្រទេសកម្ពុជា ជីប៊ូទី ប៉ាគីស្ថាន និងសមុទ្រចិនខាងត្បូង។

‘ដំណោះស្រាយតាមតំបន់រួម’

ផលវិបាកដែលអាចកើតមានក្នុងការរៀបចំសន្តិសុខរវាងចិន​ និងកោះសូឡូម៉ុង គឺផ្តោតសំខាន់នៅពេលធ្វើការពិភាក្សាជាក្រុម «ការហ្វឹកហាត់រួមគ្នាបែបរួមបញ្ចូលនៅតំបន់ឥណ្ឌូប៉ាស៊ីហ្វិក» នៅឯ LANPAC ក្នុងខែដដែលនោះ។ លោកឧត្តមសេនីយ៍ទោ Mark Goina នៃកងកម្លាំងការពារជាតិរបស់​ប្រទេសប៉ាពូអាស៊ីនូវែលហ្គីណេ បានថ្លែងប្រាប់អ្នកចូលរួមថា៖ «ប្រទេសប៉ាពូអាស៊ីនូវែលហ្គីណេ និងប្រទេសនៅដែនកោះប៉ាស៊ីហ្វិកទាំងអស់មានផលប្រយោជន៍រួមគ្នាសម្រាប់តំបន់ដែលមានសុវត្ថិភាព និងវិបុលភាព»។ «ដោយកត់សម្គាល់ថា ប្រទេសប៉ាពូអាស៊ីនូវែលហ្គីណេមានទីតាំងភូមិសាស្ត្រនៅច្រកទ្វារនៃតំបន់ប៉ាស៊ីហ្វិកភាគនិរតី និងអាស៊ីអាគ្នេយ៍ ប្រទេសនេះបានប្រឈមមុខទៅនឹងបញ្ហាប្លែកៗ … ដែលយើង​មិន​អាច​ដោះស្រាយ​ជាមួយនឹងបញ្ហា​ទាំង​នេះ​តែ​ម្នាក់​ឯងបាន​ទេ ប៉ុន្តែ​ទាមទារនូវ​ដំណោះស្រាយ​រួម​នៅក្នុង​តំបន់​តាម​រយៈ​ភាព​ជា​ដៃគូ។ សម្រាប់តំបន់ប៉ាស៊ីហ្វិកដែលមានសុវត្ថិភាព និងវិបុលភាព ភាពជាដៃគូរបស់យើងត្រូវតែផ្អែកលើការជឿទុកចិត្តគ្នា ការគោរពគ្នា ការប្តេជ្ញាចិត្តដើម្បីធ្វើការជាមួយគ្នា ហើយប្រសិនបើផលប្រយោជន៍របស់យើងស្របគ្នានោះ យើងអាចរួមបញ្ចូលគ្នានូវកិច្ចខិតខំប្រឹងប្រែងរបស់យើងដើម្បីបង្កើនប្រសិទ្ធភាពរបស់យើង»។

លោក Goina បានថ្លែងថា៖ «សម្រាប់កងកម្លាំងខ្នាតតូចមួយដែលមានសមត្ថភាពមានកម្រិត ដូចជាប្រទេសប៉ាពូអាស៊ីនូវែលហ្គីណេ ការគាំទ្រពីដៃគូប្រពៃណីដូចជា ប្រទេសអូស្ត្រាលី បារាំង នូវែលសេឡង់ និងអាមេរិក តាមរយៈសមយុទ្ធហ្វឹកហាត់រួមគ្នា គឺពិតជាមានសារៈសំខាន់ក្នុងការលើកកម្ពស់ «ប្រសិទ្ធភាពនៃកងកម្លាំងការពាររបស់យើង និងសមត្ថភាពរបស់ពួកគេក្នុងការបំពេញការងារដោយជោគជ័យរួមគ្នា»។ លោកបានបង្ហាញអំពីការចូលរួមរបស់ប្រទេសលោកជាមួយនឹងដៃគូក្នុងតំបន់រួមមាន ប្រទេសអូស្ត្រាលី ហ្វីជី នូវែលសេឡង់ និងតុងហ្កា ក្នុងការឆ្លើយតបទៅនឹងសំណើរបស់កោះសូឡូម៉ុង សម្រាប់ជំនួយក្នុងការលុបបំបាត់ភាពចលាចលស៊ីវិល និងការស្តារសន្តិសុខ ព្រមទំាងសេវាសាធារណៈដែលចាប់ផ្តើមនៅឆ្នាំ 2003។ បន្ទាប់ពីមួយទសវត្សរ៍មក បេសកកម្មចម្រុះជាតិសាសន៍ដែលគេស្គាល់ថាជា ប្រតិបត្តិការ Helpem Fren បានផ្លាស់ប្តូរទៅជាដៃគូជាមួយនឹងកងកម្លាំងប៉ូលិសនៅកោះសូឡូម៉ុង ដើម្បីធ្វើទំនើបកម្មលើសមត្ថភាពអនុវត្តច្បាប់របស់ប្រទេស។ លោក Goina បានមានប្រសាសន៍ថា៖ «ខ្ញុំប្រាកដថាអ្នកទំាងអស់គ្នានឹងយល់ស្របថានេះ គឺជាប្រតិបត្តិការរបស់ដៃគូនៃតំបន់ប៉ាស៊ីហ្វិកដ៏ល្អបំផុត ហើយជោគជ័យ [បំផុត] ដែលយើងបានធ្វើនៅក្នុងតំបន់របស់យើង» ដោយទទួលស្គាល់ការហ្វឹកហាត់រួមគ្នាបែបរួមបញ្ចូលដល់កងទ័ពរបស់ប្រទេសដែលចូលរួមបានធ្វើឡើងនៅទីក្រុង Darwin ប្រទេសអូស្ត្រាលី។

ក្រុមសមាជិករួមរបស់លោក Goina ដែលជាឧត្តមនាវីត្រីនៃកងទ័ពជើងទឹកអូស្ត្រាលីបានមានប្រសាសន៍ថា ការហ្វឹកហាត់បែបនេះត្រូវតែបានត្រួតពិនិត្យនៅក្នុងបរិបទនៃ «ការទទួលស្គាល់នូវកង្វះខាតពេលវេលាព្រមានជាយុទ្ធសាស្រ្ត និងប្រតិបត្តិការ ដែលឥឡូវនេះមាននៅក្នុងបរិយាកាសភូមិសាស្ត្រ»។ លោក Brett Sonter ដែលត្រូវបានតែងតាំងជាបុគ្គលិកកងនាវាចរប្រចំាតំបន់ប៉ាស៊ីហ្វិករបស់អាមេរិក ជានាយករងប្រតិបត្តិការដែនសមុទ្រនៅខែមករា ឆ្នាំ 2022។ «ហេតុដូច្នេះហើយ ការហ្វឹកហាត់ពីវិធីសាស្រ្តដែលអ្នកវាយប្រយុទ្ធ ដោយសារយើងលែងមានពេលវេលាដ៏មានតម្លៃពិតប្រាកដទៀតហើយ។ ដូច្នេះហើយ យើងត្រូវតែធ្វើការដោយផ្អែកលើអាកប្បកិរិយា ការអនុវត្តទាំងនោះ ឥឡូវនេះមុនពេលមានក្នុងកាលៈទេសៈដ៏អកុសលមួយ យើងត្រូវប្រើប្រាស់វាយ៉ាងពិតប្រាកដ។ … ហើយ​ប្រសិនបើ​យើង​ចង់​ទទួលបាន​តម្លៃ​រារាំង​អតិបរមា និង​តម្លៃ​ធានា​ចេញពី​លំហាត់ នោះ​ពួកគេ​ត្រូវ​មាន​ភាពបត់បែន។ ពួកគេត្រូវតែអាចធ្វើការផ្លាស់ប្តូរបាន នៅពេលដែលយើងឃើញការផ្លាស់ប្តូររបស់បរិយាកាសភូមិសាស្ត្រឆ្ពោះទៅមុខ»។

ខែលការពារដ៏អស្ចារ្យ

សមយុទ្ធយោធាកំពុងវិវឌ្ឍ និងពង្រីកខ្លួននៅទូទាំងតំបន់។ នៅខែមេសា ឆ្នាំ 2022 កងកម្លាំងប្រដាប់អាវុធជាតិរបស់ប្រទេសឥណ្ឌូណេស៊ីបានប្រកាសថា Garuda Shield ដែលជាសមយុទ្ធទ្វេភាគីរយៈពេលវែងរបស់ខ្លួនជាមួយអាមេរិកក្នុងខែសីហា ឆ្នាំ 2022 នឹងបន្ថែមប្រទេសចូលរួមចំនួនដប់ពីរប្រទេសទៀតរួមមាន ប្រទេសអូស្ត្រាលី ជប៉ុន ប៉ាពូអាស៊ីនូវែលហ្គីណេ និងសិង្ហបុរី។

ដំណឹង​នេះ​បាន​បែកធ្លាយ​ បន្ទាប់​ពី​ក្រុង​ប៉េកាំង​បាន​ដាក់​ពង្រាយ​នាវាកង​ឆ្មាំ​ឆ្នេរសមុទ្រ ​ដើម្បី​រារាំងប្រទេស​ឥណ្ឌូណេស៊ី​ពី​ការ​រុករក​ប្រេង​ និង​ឧស្ម័ន​នៅ​ជិត​កោះ Natuna ក្នុង​តំបន់​សេដ្ឋកិច្ច​ផ្តាច់មុខ​របស់​ប្រទេសឥណ្ឌូណេស៊ី។ លោក Collin Koh អ្នកស្រាវជ្រាវលើការសិក្សាអន្តរជាតិនៅសាលា S. Rajaratnam បានថ្លែងប្រាប់ដល់ CNN ថា នោះធ្វើឱ្យមានការពង្រីកដល់សមយុទ្ធ Garuda Shield «ដ៏គួរឱ្យកត់សម្គាល់ជាពិសេស»។ «ប្រទេសឥណ្ឌូណេស៊ីចង់ចូលរួមក្នុងតុល្យភាពខាងក្រៅនៅសមុទ្រចិនខាងត្បូង ខណៈពេលដែលប្រើវាជាវេទិកាមួយដើម្បីបង្ហាញពីភាពរឹងមាំ និងឥទ្ធិពលរបស់ខ្លួនទាក់ទងនឹងការទូតការពារពហុភាគី»។

សមយុទ្ធ Super Garuda Shield ឆ្នាំ 2022 បានក្លាយជាសមយុទ្ធទ្វេភាគី និងពហុភាគីជាង 60 ចុងក្រោយបង្អស់ ដែលមានការចូលរួមពីរាប់សិបប្រទេស ដែលក្នុងនោះមានកងកម្លាំងការពាររបស់អូស្ត្រាលីដែលតែងតែចូលរួមជារៀងរាល់ឆ្នាំ។ លោក Burr បានថ្លែងប្រាប់ក្នុងអំឡុងពេលសុន្ទរកថារបស់ LANPAC ថា «ក្នុងរយៈពេលប៉ុន្មានឆ្នាំថ្មីៗនេះ ជម្រៅ មាត្រដ្ឋាន និងភាពទំនើបនៃការចូលរួមជាមួយនឹងដៃគូរបស់យើងបានមានការវិវឌ្ឍយ៉ាងខ្លាំង»។ ទាំងនោះរួមមានសមយុទ្ធ Talisman Sabre ដែលជាព្រឹត្តិការណ៍ហ្វឹកហាត់ទ្វេភាគីដ៏ធំបំផុតដែលពាក់ព័ន្ធនឹងកងកម្លាំងអូស្ត្រាលី និងអាមេរិក ហើយសមយុទ្ធសង្គ្រាមត្រីភាគី Southern Jackaroo ជាមួយប្រទេសជប៉ុន និងអាមេរិក នៅឯតំបន់ហ្វឹកហាត់ Shoalwater Bay ដ៏ធំទូលាយរបស់ប្រទេសអូស្ត្រាលី។

លោក Burr បានថ្លែងប្រាប់ថា៖ «ឧទាហរណ៍ទាំងនេះបង្ហាញពីអ្វីដែលយើងទាំងអស់គ្នាហាក់ដូចជាកំពុងស្វែងរកកាន់តែខ្លាំងឡើង៖ សកម្មភាពដែលប្រកបដោយមហិច្ឆិតាកាន់តែមានភាពជឿនលឿន ពោរពេញដោយភាពសាំញុំា ហើយផ្តល់អត្ថប្រយោជន៍កាន់តែច្រើនដល់ប្រជាជនរបស់យើង ជាពិសេសអ្នកដឹកនាំនាពេលអនាគតរបស់យើង»។ «យើងទាំងអស់គ្នាយល់ពីតម្លៃនៃទំនាក់ទំនងជិតស្និទ្ធរបស់ប្រទេសរបស់យើង ដើម្បីធានាសន្តិសុខ និងលើកកម្ពស់វិបុលភាព»។  

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។