ប្រទេសអូស្ត្រាលី និងប្រទេសប៉ាពូអាស៊ីនូវែលហ្គីណេកំពុងបញ្ចប់កិច្ចព្រមព្រៀងសន្តិសុខថ្មី

The Associated Press

មេដឹកនាំប្រទេសជិតខាងបានថ្លែងនៅក្នុងខែមករា ឆ្នាំ 2023 ថា ប្រទេសអូស្ត្រាលី និងប្រទេសប៉ាពូអាស៊ីនូវែលហ្គីណេកំពុងបញ្ចប់កិច្ចព្រមព្រៀងសន្តិសុខថ្មី ដែលជាវិធានការមួយដែលត្រូវបានគេមើលឃើញថា ជាការប្រឆាំងនឹងការអះអាងដែលកំពុងតែកើនឡើងរបស់សាធារណរដ្ឋប្រជាមានិតចិន (PRC) នៅក្នុងតំបន់។

ព័ត៌មានលម្អិតនៃសន្ធិសញ្ញាដែលបានគ្រោងទុកមិនត្រូវបានផ្សព្វផ្សាយនោះទេ ប៉ុន្តែនាយករដ្ឋមន្ត្រីអូស្ត្រាលី លោក Anthony Albanese បានមានប្រសាសន៍ថា លោករំពឹងថាការចរចានឹងបញ្ចប់នៅខែមេសា ឆ្នាំ 2023 ហើយសន្ធិសញ្ញានឹងត្រូវបានចុះហត្ថលេខានៅក្នុងខែមិថុនា ឆ្នាំ 2023 ខាងមុខនេះ។

លោក Albanese បានថ្លែងថា សន្ធិសញ្ញានេះនឹងផ្អែកលើជំនឿចិត្តយ៉ាងជ្រាលជ្រៅរវាងប្រជាជាតិនានា ដោយកត់សម្គាល់ពីរបៀបដែលប្រជាជននៃប្រទេសប៉ាពូអាស៊ីនូវែលហ្គីណេបង្ហាញពីវីរភាព និងមនុស្សធម៌ក្នុងអំឡុងសង្គ្រាមលោកលើកទីពីរ។

លោក Albanese បានលើកឡើងថា៖ «នៅប៉ុន្មានឆ្នាំខាងមុខនេះ អូស្ត្រាលី និងប៉ាពូអាស៊ីនូវែលហ្គីណេ មានឱកាសគោរពដល់ប្រវត្តិនៃការបម្រើរួមគ្នារបស់យើងក្នុងបុព្វហេតុសន្តិភាព តាមរយៈការបម្រើបន្ថែមពីលើនេះ»។ «ការពង្រឹងទំនាក់ទំនងផ្នែកការពារជាតិរបស់យើង និងការពង្រឹងកិច្ចសហប្រតិបត្តិការសន្តិសុខជាតិរបស់យើង និងការសម្រេចបាននូវការបញ្ចប់យ៉ាងឆាប់រហ័សចំពោះការចរចាលើសន្ធិសញ្ញាសន្តិសុខទ្វេភាគី»។

សុន្ទរកថារបស់លោក Albanese គឺជាសុន្ទរកថាដំបូងទៅកាន់សភានៃប្រទេសប៉ាពូអាស៊ីនូវែលហ្គីណេ ដោយមេដឹកនាំបរទេសចាប់តាំងពីប្រទេសដែលមានប្រជាជនចំនួន 10 លាននាក់នេះទទួលបានឯករាជ្យកាលពីឆ្នាំ 1975 មក។

លោកបានមានប្រសាសន៍ថា៖ «អូស្ត្រាលី និងប៉ាពូអាស៊ីនូវែលហ្គីណេ គឺជាអ្នកជិតខាងដ៏ជិតស្និទ្ធបំផុត។ យើង​គឺ​ជា​មិត្ត​ដ៏​អស្ចារ្យ​បំផុត»។

លោក Albanese បានថ្លែងថា សន្ធិសញ្ញានេះនឹងដំណើរការដើម្បីដោះស្រាយតម្រូវការរបស់ប្រទេសប៉ាពូអាស៊ីនូវែលហ្គីណេ រួមទាំងការពង្រឹងប្រព័ន្ធយុត្តិធម៌ផងដែរ។

នាយករដ្ឋមន្ត្រីនៃប្រទេសប៉ាពូអាស៊ីនូវែលហ្គីណេ លោក James Marape បានមានប្រសាសន៍ថា គាត់ និងលោក Albanese នឹងកែសម្រួលទំនាក់ទំនង រួមទាំង «ការគាំទ្រសម្រាប់វិស័យច្បាប់ និងយុត្តិធម៌ រួមទាំងប៉ូលិស ការផ្លាស់ប្តូរផ្នែកយោធាផងដែរ»។ (រូបភាព៖ នាយករដ្ឋមន្ត្រីនៃប្រទេសប៉ាពូអាស៊ីនូវែលហ្គីណេ លោក James Marape នៅខាងឆ្វេង ស្វាគមន៍នាយករដ្ឋមន្ត្រីអូស្ត្រាលី លោក Anthony Albanese នៅក្នុងរដ្ឋធានី Port Moresby ក្នុងខែមករា ឆ្នាំ 2023។)

លោក Marape បាន​មានប្រសាសន៍ថា ​សុវត្ថិភាព​នៃ​ប្រទេស​ទាំង​ពីរ​គឺ​មាន​ទំនាក់ទំនង​គ្នា។ លោក​បាន​លើកឡើងថា ប្រទេស​អូស្ត្រាលី​គឺ​លើសពី​ដៃគូ​ទ្វេភាគី​ ​ព្រោះប្រទេសប៉ាពូអាស៊ីនូវែលហ្គីណេបានស្ថិត​នៅ​ក្រោម​ការ​គ្រប់គ្រង​របស់​ប្រទេសអូស្ត្រាលី​មុន​ពេល​ទទួល​បាន​ឯករាជ្យ។

លោក Marape បានថ្លែងថា «មនុស្សម្នាក់មិនអាចនិយាយអំពីតំបន់ឥណ្ឌូប៉ាស៊ីហ្វិកដោយមិនបន្តរបៀបវារៈនៃប្រទេសប៉ាពូអាស៊ីនូវែលហ្គីណេបានទេ ពីព្រោះយើងស្ថិតនៅចំបេះដូង និងចំណុចកណ្តាលនៃចំណុចប្រសព្វនៃតំបន់ឥណ្ឌូប៉ាស៊ីហ្វិក»។ «ដើម្បីឱ្យប្រទេសប៉ាពូអាស៊ីនូវែលហ្គីណេចូលរួមក្នុងតំបន់ឥណ្ឌូប៉ាស៊ីហ្វិកប្រកបដោយមានសុវត្ថិភាពជាងមុន ប៉ាពូអាស៊ីនូវែលហ្គីណេខ្លួនឯងត្រូវតែរឹងមាំផ្នែកសេដ្ឋកិច្ច»។

លោក Albanese បានមានប្រសាសន៍ថា គាត់ចង់បង្កើនពាណិជ្ជកម្មទ្វេភាគី «ចំពោះគ្រប់វិស័យចាប់តាំងពីកាហ្វេ និងកាកាវ រហូតដល់ការនេសាទ និងទេសចរណ៍» និងធ្វើការជាមួយប្រទេសប៉ាពូអាស៊ីនូវែលហ្គីណេលើគម្រោងរួមទាំងការធ្វើឱ្យកំពង់ផែ ផ្លូវថ្នល់ និងហេដ្ឋារចនាសម្ព័ន្ធឌីជីថលមានភាពប្រសើរឡើងផងដែរ។

នៅក្នុងឆ្នាំ 2022 សាធារណរដ្ឋប្រជាមានិតចិន បានចុះហត្ថលេខាលើកតិកាសញ្ញាសន្តិសុខជាមួយនឹងកោះសាឡូម៉ុង (Solomon Island) ដែលជាការបង្កើនការជូនដំណឹងថានឹងអាចនាំឱ្យមានការបង្កើនយោធានៅក្នុងតំបន់ប៉ាស៊ីហ្វិកខាងត្បូង។

លោក Albanese បានលើកឡើងថា ការពិភាក្សា​អំពីសន្ធិសញ្ញា​ផ្តោតទៅលើ​ការ​បង្កើន​កិច្ច​សហប្រតិបត្តិការ​លើ​វិស័យ​ការពារជាតិ និង​បណ្តុះបណ្តាល​រួម​គ្នា ព្រមទាំង​សក្តានុពល​នៃកិច្ចប្រតិបត្តិការ​រួម​គ្នា។

លោក Marape បានមានប្រសាសន៍​ថា​៖ «​​គេមិនបានគិតទៅលើប្រទេសចិន ឬប្រទេសណាមួយផ្សេងទៀតនោះទេទោះបីជាក្នុងស្ថានភាពណាក៏ដោយ»។

ទំនាក់ទំនងដ៏តានតឹងរវាងអូស្ត្រាលី និងសាធារណរដ្ឋប្រជាមានិតចិនបានសាបរលាបបន្តិចបន្តួចហើយចាប់តាំងពីការឈ្នះការបោះឆ្នោតរបស់លោក Albanes កាលពីក្នុងខែឧសភា ឆ្នាំ 2022 មក។ នៅក្នុងខែធ្នូ ឆ្នាំ 2022 រដ្ឋមន្ត្រីការបរទេសអូស្ត្រាលី លោកស្រី Penny Wong បានជួបជាមួយរដ្ឋមន្ត្រីការបរទេសចិន លោក Wang Yi នៅទីក្រុងប៉េកាំង សម្រាប់ដំណាក់កាលថ្មីនៃកិច្ចចរចាដែលបានផ្អាកជាយូរមកហើយលើបញ្ហាបរទេស និងយុទ្ធសាស្ត្រ។

ប្រភពរូបភាព៖ រូបភាព AFP/GETTY

ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។