ឥណ្ឌានឹងដុសខាត់សមត្ថភាពប្រឆាំងនឹងនាវាមុជទឹកក្នុងសមយុទ្ធ Malabar ដើម្បីឆ្លើយតបទៅនឹងការគំរាមកំហែងរបស់សាធារណរដ្ឋប្រជាមានិតចិន
Mandeep Singh
យោងតាមអ្នកជំនាញបានឱ្យដឹងថា ការចូលរួមរបស់ប្រទេសឥណ្ឌាក្នុងសមយុទ្ធការពារជាតិពហុភាគនៅ Malabar ផ្តល់ឱ្យកងកម្លំាងប្រដាប់អាវុធរបស់ខ្លួននូវឱសកាសបង្ហាញនិងធ្វើតេស្តសមត្ថភាពនានា ដូចជាការប្រយុទ្ធប្រឆាំងនឹងនាវាមុជទឹក (ASW) និងកងកម្លាំងប្រតិបត្តិការពិសេស (SOF) ដោយសហការជាមួយនឹងដៃគូរបស់ខ្លួនពីកិច្ចសន្ទនាសន្តិសុខចតុភាគី (Quadrilateral Security Dialogue) ឬហៅកាត់ថា Quad។
Malabar ក៏សង្កត់ធ្ងន់ត្រង់ចំណុចថាសមាជិក Quad ដែលក៏រួមមានប្រទេសអូស្ត្រាលី ជប៉ុន និងសហរដ្ឋអាមេរិកនោះ រួបរួមគ្នាប្រឆាំងនឹងការឈោងចាប់ដែនដីរបស់សាធារណរដ្ឋប្រជាមានិតចិន (PRC) នៅក្នុងតំបន់ឥណ្ឌូប៉ាស៊ីហ្វិក។
លោក Prateek Joshi ដែលជាអ្នកវិភាគវិស័យការពារជាតិនៅមជ្ឈមណ្ឌលសិក្សាសន្តិភាពអន្តរជាតិ ដែលជាក្រុមអ្នកវិភាគដែលមានមូលដ្ឋាននៅទីក្រុង New Delhi បានប្រាប់ទស្សនាវដ្តី FORUM ឱ្យដឹងថា «Quad ផ្តល់សញ្ញារួបរួមជាយុទ្ធសាស្ត្ររវាងមហាអំណាចសំខាន់ៗ និងសំដៅយកប្រទេសចិនជាបច្ចាមិត្តដ៏ចម្បង»។
លោកបានមានប្រសាសន៍ថា នៅក្នុងសមយុទ្ធដូចជា Malabar និងសកម្មភាពពហុភាគីដទៃទៀត ទាក់ទងទៅនឹងការការពារជាតិ កិច្ចការទូត បច្ចេកវិទ្យា បរិយាកាសនិងសុខភាព ដៃគូរបស់ Quad «កាត់បន្ថយភាពស្របច្បាប់របស់ប្រទេសចិនក្នុងនាមជាប្រទេសដ៏មានអំណាចឥទ្ធិពលមួយនៅអាស៊ី និងជំរុញឱ្យប្រទេសចិនផ្លាស់ប្ដូរអាកប្បកិរិយារបស់ខ្លួន។»
ទាហានរបស់ប្រទេសឥណ្ឌាបានប្រឈមមុខតទល់នឹងកងកម្លាំងរបស់ប្រទេសចិន នៅក្នុងជម្លោះដែនដីមួយនៅតាមបណ្ដោយព្រំដែនជួរភ្នំហិមាល័យរបស់ប្រទេសទាំងនេះកាលពីប៉ុន្មានឆ្នាំកន្លងមកនេះ។ យ៉ាងណាមិញ សាធារណរដ្ឋប្រជាមានិតចិនបានបំពានចូលទៅក្នុងដែនទឹករបស់ប្រទេសជប៉ុនជាញឹកញាប់នៅជុំវិញកោះ Senkaku ដែលស្ថិតនៅក្រោមការគ្រប់គ្រងរបស់ប្រទេសជប៉ុន ហើយប្រទេសអូស្ត្រាលីនិងសហរដ្ឋអាមេរិកបានក្លាយទៅជាគោលដៅនៃការវាយប្រហារខាងផ្នែកសេដ្ឋកិច្ចពីទីក្រុងប៉េកាំង។
ជួរសម្ភារសមយុទ្ធនៅ Malabar របស់ឥណ្ឌារួមមាន នាវាចម្បាំងដែលបំបាំងខ្លួនពីរ៉ាដាថ្នាក់ Shivalik នាវាចម្បាំង ASW ដែលបំបាំងខ្លួនពីរ៉ាដាថ្នាក់ Kamorta និងយន្តហោះប្រភេទ P8I ASW។ សមយុទ្ធនេះដំណើរការចាប់ពីថ្ងៃទី ៨ ដល់ថ្ងៃទី ១៨ ខែវិច្ឆិកាឆ្នាំ ២០២២ នៅក្នុងដែនទឹកជិតកោះ Yokosuka នៃប្រទេសជប៉ុន ជាកន្លែងដែលប្រទេសឥណ្ឌានឹងទទួលបានការចូលរួមពីកងទ័ពជំនួយមកពីសមាជិក Quad ដទៃផ្សេងទៀត។ (រូបភាព៖ កងទ័ពជើងទឹកឥណ្ឌា កងកម្លាំងស្វ័យការពារម៉ារីនរបស់ជប៉ុន និងនាវាទ័ពជើងទឹករបស់ប្រទេសអូស្ត្រាលី ធ្វើដំណើរតាមនាវាជាទម្រង់ជាមួយនឹងនាវាចម្បាំង USS Barry ដែលបំពាក់ដោយប្រព័ន្ធចាប់មីស៊ីលរបស់ទ័ពជើងទឹកក្នុងអំឡុងពេលសមយុទ្ធ Malabar 2021)។
Joshi បានមានប្រសាសន៍ថា សមយុទ្ធ ASW ដែលបានរៀបចំឡើងនៅ Malabar មានសារៈសំខាន់ចំពោះប្រទេសឥណ្ឌា មួយផ្នែកដោយសារតែក្តីបារម្ភអំពីនាវាមុជទឹករបស់សាធារណរដ្ឋប្រជាមានិតចិននៅក្នុងមហាសមុទ្រឥណ្ឌា។
លោកបានមានប្រសាស៍ថា «កងទ័ពជើងទឹកនៃយោធារំដោះជាតិរបស់ប្រជាជនចិនបានបង្ហាញអំពីសមត្ថភាពរបស់ខ្លួនក្នុងការដាក់ពង្រាយនាវាជម្រុជទឹកដែលអាចវាយប្រហារដោយគ្រាប់នុយក្លេអ៊ែរ (SSN) បាននៅក្នុងខែសីហា ឆ្នាំ ២០១៥ នៅក្រោមរូបភាពជាការល្បាតប្រឆាំងនឹងក្រុមចោរសមុទ្រ»។ «SSN អាចប្រកួតប្រជែងជាមួយនឹងសមត្ថភាពរបស់ប្រទេសឥណ្ឌាដើម្បីបង្កើតការគ្រប់គ្រងលើដែនសមុទ្រ»។
អនុសេនីយ៍ឯកកងទ័ពជើងទឹកឥណ្ឌាលោក Anurag Bisen បានសរសេរក្នុងអត្ថបទចុះនៅខែសីហា ឆ្នាំ ២០២២ សម្រាប់វិទ្យាស្ថានសិក្សានិងវិភាគកិច្ចការការពារជាតិ Manohar Parrikar នៅក្រុង New Delhi ថានាវាជ្រមុជទឹក SSN ដែលបំបាំងខ្លួនពីរ៉ាដាបានរបស់ប្រទេសចិនត្រូវបានដាក់ពង្រាយនៅពេលដែលមានគោលបំណងយុទ្ធសាស្ត្រ។ ដោយសារតែនាវាប្រភេទដូច្នេះមិនស័ក្តិសមសម្រាប់ប្រតិបត្តិការនៅលើផ្ទៃទឹកដូចជាបេសកកម្មប្រឆាំងនឹងអំពើចោរកម្មសមុទ្រ Bisen បានប៉ានស្មានថាការដាក់ពង្រាយនេះជាក់ស្ដែងគឺដើម្បីធ្វើតេស្តសមត្ថភាពរបស់នាវាជ្រមុជទឹក SSN សម្រាប់ការល្បាតរយៈចម្ងាយវែង។
លោកបានសរសេរថា «ក៏អាចទៅរួចផងដែរដែលថា ប្រទេសចិនបានបង្កើតនូវហេដ្ឋារចនាសម្ព័ន្ធចាំបាច់នានា ជំនាញ និងពិធីសាបញ្ជា គ្រប់គ្រង និងប្រាស្រ័យទាក់ទង ដែលត្រូវមានសម្រាប់ប្រតិបត្តិការរយៈពេលយូររបស់នាវាជ្រមុជទឹក SSN ដែលរ៉ាដាមិនអាចចាប់បាននៅក្នុង IOR [តំបន់មហាសមុទ្រឥណ្ឌា]»។
Joshi បានមានប្រសាសន៍ថា សមយុទ្ធ ASW មានលក្ខណៈពិសេសត្រង់មានសមយុទ្ធក្នុងដែនទឹកដទៃទៀត ដែលជាប់ពាក់ព័ន្ធនឹងកងទ័ពជើងទឹកឥណ្ឌា រួមមានសមយុទ្ធ Varuna ជាមួយប្រទេសបារាំង និងសមយុទ្ធ Konkan ជាមួយចក្រភពអង់គ្លេស។
យ៉ាងណាមិញ ធាតុផ្សំ SOF របស់សមយុទ្ធនៅ Malabar បង្កើតឱ្យមានការចែករំលែកព័ត៌មាននិងសមត្ថភាពអន្តរប្រតិបត្តិការដើម្បីទប់ស្កាត់និងការពារប្រឆាំងទៅនឹងការគំរាមកំហែងបែបថ្មី។ លោក Joshi បានសរសេរថា «ទាំងនេះរួមបញ្ចូលទាំងការប្រឆាំងនឹងអំពើភេរវកម្ម ការជួយសង្គ្រោះចំណាត់ខ្មាំង ការជម្លៀសអ្នកមានរបួស ការប្រឆាំងទៅនឹងចោរកម្មលើដែនសមុទ្រ និងការជម្លៀសខ្លួនក្រោមការបដិសេធ។» «កងទ័ពជើងទឹករបស់ប្រទេសឥណ្ឌាត្រូវបានគេរំពឹងថានឹងក្លាយជាអ្នកឆ្លើយតបទីមួយនៅក្នុងហេតុការណ៍ទាំងនេះនៅក្នុងសមុទ្រឥណ្ឌា ហើយប្រទេសនេះសហការជាមួយនឹងប្រទេសជាដៃគូដើម្បីជួយដល់ប្រទេស IOR។»
លោកមានប្រសាសន៍ថា ជារួម Quad បម្រើការជាកម្លាំងប្រឆាំងទៅនឹងការប៉ុនប៉ងរបស់ទីក្រុងប៉េកាំងក្នុងការរឹបអូសយកដែនដី ឬមិនដូច្នោះទេក្នុងការផ្លាស់ប្ដូរស្ថានភាពនៅក្នុងតំបន់ដោយឯកតោភាគី ហើយកម្លាំងប្រឆាំងនេះបង្កើនកិច្ចខិតខំប្រឹងប្រែងតាមរយៈប្រព័ន្ធសម្ព័ន្ធភាពអាមេរិកពីដើម និងវេទិកាពហុភាគី ដូចជាសមាគមន៍ប្រជាជាតិអាស៊ីអាគ្នេយ៍។
Joshi បានមានប្រសាសន៍ថា «នៅក្រោមលក្ខខណ្ឌទាំងនេះ វេទិកាដែលមានភាគីចូលរួមចំនួនតិចដូចជា Quad បានលេចខ្លួនចេញមកជាវិធីសាស្ត្រនៃការទប់ស្កាត់ថ្មីមួយ។»
Mandeep Singh គឺជាអ្នករួមចំណែកដល់ទស្សនាវដ្ដី FORUM ដោយធ្វើការរាយការណ៍ពីទីក្រុង New Delhi នៃប្រទេសឥណ្ឌា។
ក្រឌីតរូបភាព៖ ចក្របាលរងទោ JUSTIN STACK/កងទ័ពជើងទឹកអាមេរិក
ទស្សនាវដ្តី FORUM បានផ្អាកការបកប្រែអត្ថបទប្រចាំថ្ងៃសម្រាប់គេហទំព័រជាភាសាខ្មែរ។ សូមមើលភាសាដទៃទៀតសម្រាប់ខ្លឹមសារប្រចាំថ្ងៃ។
